2026 ஆம் ஆண்டின் முதல் ஆறு மாதங்களில் இலங்கையில் 487 புதிய HIV தொற்றாளர்கள் அடையாளம் காணப்பட்டுள்ளதாக தேசிய பாலியல் நோய் மற்றும் எய்ட்ஸ் கட்டுப்பாட்டுத் திட்டம் தெரிவித்துள்ளது.
வெளியிடப்பட்டுள்ள சமீபத்திய புள்ளிவிபரங்களின்படி, 2026 ஆம் ஆண்டின் முதல் காலாண்டில் 249 பேரும், இரண்டாவது காலாண்டில் 238 பேரும் HIV தொற்றாளர்களாக அடையாளம் காணப்பட்டுள்ளனர்.
கடந்த 2025 ஆம் ஆண்டின் முதல் ஆறு மாதங்களில் 430 தொற்றாளர்கள் பதிவாகியிருந்த நிலையில், இவ்வாண்டு 13.3 சதவீத அதிகரிப்பு ஏற்பட்டுள்ளது.
மேலும், 2026 ஆம் ஆண்டின் இரண்டாவது காலாண்டில் பதிவான HIV தொற்றாளர்களில் ஆண்களுக்கும் பெண்களுக்கும் இடையிலான விகிதம் 7:1 ஆகக் காணப்படுகிறது. அதேவேளை, 15 முதல் 24 வயதுக்குட்பட்டவர்களில் 55 பேர் தொற்றாளர்களாக அடையாளம் காணப்பட்டுள்ளனர். இவர்களில் 48 ஆண்கள், 6 பெண்கள் மற்றும் ஒருவர் திருநங்கையாவார்.
இதற்கிடையில், 2026 ஆம் ஆண்டின் முதல் இரண்டு காலாண்டுகளிலும் தலா 4 பேர் வீதம் மொத்தமாக 8 AIDS தொடர்பான மரணங்கள் பதிவாகியுள்ளன. இதுவரை இலங்கையில் AIDS தொடர்பான மரணங்களின் ஒட்டுமொத்த எண்ணிக்கை 820 ஆக உயர்ந்துள்ளது.
மேலும், 111 மரணங்கள் AIDS தொடர்பற்ற மரணங்களாக வகைப்படுத்தப்பட்டுள்ளதுடன், 2025 ஆம் ஆண்டு வரையான அனைத்து HIV தொற்றாளர்களிடையேயும் சரிசெய்யப்பட்ட ஒட்டுமொத்த மரண எண்ணிக்கை 1,708 ஆகப் பதிவாகியுள்ளது.
அத்துடன், தாயிடமிருந்து குழந்தைக்குப் பரவியதன் மூலம் 117 HIV தொற்றாளர்கள் அடையாளம் காணப்பட்டுள்ளனர். 2025 ஆம் ஆண்டின் நான்காவது காலாண்டில் இவ்வாறான தொற்றுப் பரவல் எதுவும் பதிவாகவில்லை.
மறுபுறம், குடிவரவு சுகாதாரப் பிரிவின் ஊடாகவும் 73 HIV தொற்றாளர்கள் அடையாளம் காணப்பட்டுள்ளனர். இவர்களில் 9 பேர் 2026 ஆம் ஆண்டின் இரண்டாவது காலாண்டில் கண்டறியப்பட்டுள்ளனர்.
