நீதவான் நீதிமன்ற நீதிபதி செல்வி அ. தர்ஷினி முன்னிலையில் நடைபெற்ற இவ்வழக்கு விசாரணையின்போது, பாராளுமன்ற உறுப்பினர் டாக்டர் இராமநாதன் அர்ச்சுனா, முன்னாள் இராஜாங்க அமைச்சர் சட்டத்தரணி எச்.எம்.எம்.ஹரீஸ், ஊடகவியலாளர் யூ.எல். மப்ரூக், ஐக்கிய சமாதான கூட்டமைப்பின் தலைவர் மிப்ளால் மௌலவி, ஓய்வுபெற்ற கல்வி பணிப்பாளர் ஏ.எல்.எம். முக்தார், தொழிலதிபர் எம்.எச்.எம். இப்ராஹிம் ஆகிய பிரதிவாதிகள் சார்பில் சிரேஷ்ட சட்டத்தரணிகளான ஹிஜாஸ் ஹிஸ்புல்லா,சாரிக் காரியப்பர், ஆரிகா காரியப்பர், எம். வை. அன்வர் சியாத், துல்ஹர் நயீன் துல்சன், ஏ.எல்.எம். றிபாஸ், சட்டத்தரணிகளான சிபான் மஹரூப், பீ.எம். றஸீன், எம்.ஏ. அன்சில், எம்.மனாப், எம். முஹம்மட் நப்ஸர் மற்றும் எம். முஹம்மட் முபின், கௌசல்யா நரேந்திரன் உள்ளிட்ட சட்டத்தரணிகள் ஆஜராகியிருந்தனர்.
சிரேஷ்ட சட்டத்தரணி ஹிஜாஸ் ஹிஸ்புல்லா தலைமையிலான பிரதிவாதிகளின் சட்டத்தரணிகள், நிகல்நிலை காப்புச்சட்டத்தின் கீழ் இவ்வழக்கினை விசாரிப்பதற்கான மன்றின் நியாயாதிக்கம் தொடர்பிலான ஆட்சேபனைகளை முன்வைத்ததுடன் இரண்டாம், மூன்றாம் மற்றும் நான்காம் பிரதிவாதிகள் எழுத்துமூல ஆட்சேபனைகளை முன்வைத்தனர். மேலும் சிலரின் ஆட்சேபனைகளை முன்வைக்கவும், வாதங்களை முன்வைக்கவும் குறித்த வழக்கின் அடுத்தகட்ட நடவடிக்கைக்காக எதிர்வரும் நவம்பர் 16 ஆம் திகதி பிற்பகல் 2 மணிக்கு வழக்கு நடைபெறவுள்ளது.
ஐந்தாம் பிரதிவாதி ஏ.எல்.எம். முக்தார் அவர்களின் முகப்புத்தகத்தில் வழக்காளி தொடர்பிலான விடயங்கள் இல்லாமலிருப்பதால் அவர் வழக்கிலிருந்து விடுவிக்க கோரப்பட்டுள்ளார்.
வழக்காளி டாக்டர் கு. சுகுணன் மன்றுக்கு சமூகமளித்திருக்கவில்லை என்பதுடன் அவர் சார்பில் சட்டத்தரணி க. கிசோபனா ஆஜராகி வழக்காளி தொடர்பிலான வாதங்களை முன்வைத்தார்.
