ஈரான் தனது முந்தைய சில நிபந்தனைகளைக் கைவிட்டு, அமெரிக்காவுடனான பேச்சுவார்த்தைகளில் தனது அணுசக்தித் திட்டத்தையும் சேர்க்க ஒப்புக்கொண்டுள்ளது என்று ஞாயிற்றுக்கிழமை தகவலறிந்த வட்டாரங்கள் தெரிவித்தன. இது, இவ்விவகாரத்தை ஒத்திவைக்க வேண்டும் என்ற அதன் முந்தைய நிலைப்பாட்டிலிருந்து ஒரு மாற்றத்தைக் குறிக்கிறது.
டெஹ்ரானின் முன்மொழிவு, முதலில் ஹோர்முஸ் ஜலசந்தியில் கப்பல் போக்குவரத்தை மீண்டும் தொடங்குவதிலும், அமெரிக்கக் கடற்படை முற்றுகையை முடிவுக்குக் கொண்டு வருவதிலும் கவனம் செலுத்தும் என்றும், அணுசக்திப் பேச்சுவார்த்தைகளைப் பிற்கட்டத்திற்கு விட்டுவிடும் என்றும் ஒரு மூத்த ஈரானிய அதிகாரி சனிக்கிழமை ரொய்ட்டர்ஸிடம் தெரிவித்திருந்தார்.
இருப்பினும், ஈரான் இப்போது தனது அணுசக்தித் திட்டம் குறித்து விவாதிக்க ஒப்புக்கொண்டுள்ளது என்றும், யுரேனியம் செறிவூட்டலை 3.5 சதவீதமாகக் கட்டுப்படுத்தவும், தற்போதுள்ள செறிவூட்டப்பட்ட யுரேனியத்தின் இருப்பைப் படிப்படியாகக் குறைக்கவும் முன்மொழிந்துள்ளது என்றும் வட்டாரங்கள் தெரிவித்தன.
திருத்தப்பட்ட இந்த முன்மொழிவில், அமெரிக்க முற்றுகையை நீக்குவதற்கு ஈடாக ஹோர்முஸ் ஜலசந்தியைப் படிப்படியாக மீண்டும் திறப்பதற்கான ஒரு சலுகையும் அடங்கும் என்றும், இப்பகுதியிலிருந்து அமெரிக்கப் படைகளைத் திரும்பப் பெற வேண்டும் என்ற தனது கோரிக்கையை டெஹ்ரான் கைவிட்டுள்ளது என்றும் அந்த வட்டாரங்கள் மேலும் தெரிவித்தன.
மாறாக, ஈரான் இப்போது தனது எல்லைகளைச் சுற்றியுள்ள அமெரிக்க இராணுவக் குவிப்பை முடிவுக்குக் கொண்டுவரவும், எதிர்காலத் தாக்குதல்களுக்கு எதிரான சர்வதேச உத்தரவாதங்களையும் கோருகிறது என்று தகவல்கள் தெரிவிக்கின்றன.
அமெரிக்க அதிபர் டொனால்ட் டிரம்ப், ஈரானின் அசல் முன்மொழிவின் சரியான வார்த்தைகளைத் தாம் இன்னும் மதிப்பாய்வு செய்யவில்லை என்றும், ஆனால் அதை ஏற்க வாய்ப்பில்லை என்றும், தெஹ்ரான் இன்னும் “போதுமான பெரிய விலையைக் கொடுக்கவில்லை” என்றும் கூறியதைத் தொடர்ந்து இது வந்துள்ளது.
