இசையமைப்பாளர் அனிருத் ரவிச்சந்தர், தொழிலதிபர் காவ்யா கலாநிதி மாறனின் திருமண வரவேற்பு நிகழ்ச்சிக்கு வருமாறு, பிரதமர் நரேந்திர மோடி, தமிழக முதல்வர் விஜய்க்கு நேரில் அழைப்பிதழ் வழங்கப்பட்டுள்ளது.
சன் குழும தலைவர் கலாநிதி மாறனின் மகளும் ஹைதராபாத் சன்ரைசர்ஸ் கிரிக்கெட் அணியின் நிர்வாக பொறுப்பாளருமான காவ்யா கலாநிதி மாறனுக்கும் இசையமைப்பாளர் அனிருத் ரவிச்சந்தருக்கும் திருமணம் நிச்சயிக்கப்பட்டுள்ளது. இவர்கள் திருமணம் கிரீஸ் நாட்டில் நவ. 11-ம் தேதி நடைபெற இருப்பதாகக் கூறப்படுகிறது. இந்த திருமணத்தில் முன்னணி திரைபிரபலங்கள் மற்றும் இரு குடும்பத்தாரின் நெருங்கிய உறவினர்கள், நண்பர்கள் மட்டும் கலந்துகொள்கின்றனர். இவர்களின் திருமண வரவேற்பு நிகழ்ச்சி சென்னையில் நவம்பர் 21-ம் தேதி நடைபெற இருக்கிறது.
இதற்காக பிரபலங்களைச் சந்தித்து திருமண வரவேற்பு அழைப்பிதழை சன் குழுமத் தலைவர் கலாநிதி மாறன், காவேரி கலாநிதி மாறன் வழங்கி வருகின்றனர். தெலங்கானா முதல்வர் ரேவந்த் ரெட்டியை சந்தித்து நேற்று முன் தினம் அழைப்பிதழை வழங்கினர்.
இந்நிலையில் பிரதமர் நரேந்திர மோடியை டெல்லியில் சந்தித்த, கலாநிதி மாறன் திருமண வரவேற்புக்கான அழைப்பிதழை வழங்கினார். காவேரி கலாநிதி மாறன், அனிருத்தின் தந்தை ரவிச்சந்தர், அவரது மனைவி லட்சுமி ஆகியோர் உடனிருந்தனர். இதே போல் சென்னையில் நேற்று முன்தினம் தமிழக முதல்வர் விஜய்யை சந்தித்தும் திருமண வரவேற்புக்கான அழைப்பிதழை கலாநிதி மாறன் வழங்கினார். காவேரி கலாநிதி மாறன், அனிருத் ஆகியோர் உடன் இருந்தனர். அவர்களுக்கு முதல்வர் விஜய் வாழ்த்து தெரிவித்தார்.
