காரைதீவு கண்ணகி இந்து வித்தியாலய மாணவர்களின் கற்றல் செயற்பாடுகளை மேலும் மேம்படுத்தும் நோக்கில், திகாமடுல்ல மாவட்ட நாடாளுமன்ற உறுப்பினர் கவீந்திரன் கோடீஸ்வரன் அவர்களின் பன்முகப்படுத்தப்பட்ட நிதி ஒதுக்கீட்டின் கீழ் ஸ்மார்போர்ட் ஒன்று இன்று (01) பாடசாலைக்கு வழங்கி வைக்கப்பட்டது.
சிறுவர் தினத்தை முன்னிட்டு நடைபெற்ற இந்த நிகழ்வு, காரைதீவு கண்ணகி வித்தியாலய அதிபர் திரு.உதயநாதன் தலைமையில் இடம்பெற்றது.
மாணவர்களின் நாளாந்த கற்றல் நடவடிக்கைகளுக்கு தேவையான அடிப்படை வசதிகளை மேம்படுத்துவதன் ஊடாக, பாடசாலையில் சிறந்த கற்றல் சூழலை உருவாக்கும் நோக்கில் இந்த மார்போர்ட் வழங்கப்பட்டதாக தெரிவிக்கப்பட்டது.
சிறுவர் தினமான ஒக்டோபர் 1ஆம் திகதியில் இவ்வாறான கல்விசார் உதவி வழங்கப்பட்டமை, மாணவர்களின் கல்வி உரிமை மற்றும் அவர்களுக்கான சமமான கற்றல் வாய்ப்புகளை உறுதிப்படுத்துவதன் முக்கியத்துவத்தை எடுத்துக்காட்டுவதாக அமைந்தது.
இந்நிகழ்வில் காரைதீவு பிரதேச சபை தவிசாளர் சுப்ரமணியம் பாஸ்கரன், காரைதீவு சுகாதார வைத்திய அதிகாரி டாக்டர் தஸ்லிமா வசீர், காரைதீவு கோட்டக்கல்வி அதிகாரி ஏ. சஞ்சீவன் உள்ளிட்ட பிரதேச செயலக மற்றும் சமூக பிரதிநிதிகள், பாடசாலை ஆசிரியர்கள், மாணவர்கள், பெற்றோர் மற்றும் சமூக பிரதிநிதிகள் உள்ளிட்ட பலரும் கலந்து கொண்டனர்.
மாணவர்களின் கல்வி முன்னேற்றத்திற்குத் தேவையான உட்கட்டமைப்பு மற்றும் கற்றல் உபகரணங்களை வழங்குவதில் அரசியல் பிரதிநிதிகள், உள்ளூராட்சி நிறுவனங்கள் மற்றும் சமூக அமைப்புகள் இணைந்து செயற்படுவது அவசியம் என நிகழ்வில் வலியுறுத்தப்பட்டது.
குறிப்பாக, கிராமப்புற பாடசாலைகளில் மாணவர்களின் கற்றல் தேவைகளை அடையாளம் கண்டு, அவற்றுக்கான வளங்களை பெற்றுக்கொடுப்பதன் மூலம் கல்வித் தரத்தை மேலும் உயர்த்த முடியும் எனவும் சுட்டிக்காட்டப்பட்டது.
மாணவர்களின் கல்வி நடவடிக்கைகளுக்கு தொடர்ச்சியான ஆதரவை வழங்குவதற்கும், பாடசாலையின் கற்றல் சூழலை மேலும் மேம்படுத்துவதற்கும் எதிர்காலத்திலும் தேவையான நடவடிக்கைகள் முன்னெடுக்கப்பட வேண்டும் என நிகழ்வில் வலியுறுத்தப்பட்டது. இதன்போது காரைதீவு பிரதேச செயலகம் வரை சிறுவர் ஊர்வலமும் இடம்பெற்றது.
