தேசிய அடையாள அட்டை (NIC) இல்லாத காரணத்தால் மாதாந்திர முதியோர் கொடுப்பனவை பெற முடியாமல் உள்ள குறைந்த வருமானம் கொண்ட முதியவர்களுக்கு தேசிய அடையாள அட்டைகளை விரைவாக வழங்கும் சிறப்பு வேலைத்திட்டத்தை அரசு ஆரம்பித்துள்ளது.
இந்த வேலைத்திட்டம், ஊரக அபிவிருத்தி, சமூக பாதுகாப்பு மற்றும் சமூக வலுவூட்டல் அமைச்சின் கீழ் செயல்படும் தேசிய முதியோர் செயலகம், நபர்கள் பதிவு திணைக்களம் மற்றும் பதிவாளர் நாயகம் திணைக்களம் ஆகியவற்றின் இணைந்த முயற்சியாக முன்னெடுக்கப்படுகிறது.
தற்போது, தேசிய முதியோர் செயலகம் 70 வயது மற்றும் அதற்கு மேற்பட்ட குறைந்த வருமானம் கொண்ட முதியோருக்கு மாதாந்திர ரூ.5,000 கொடுப்பனவை வழங்கி வருகிறது. அண்மையில் தற்போதைய அரசு இந்த கொடுப்பனவை ரூ.3,000 இலிருந்து ரூ.5,000 ஆக உயர்த்தியதுடன், பயனாளிகளின் எண்ணிக்கையையும் 10 இலட்சமாக அதிகரித்துள்ளது.
தற்போது 698,790 முதியவர்கள் ‘அஸ்வெசும’ வங்கி கணக்குகள் மூலம் இந்த கொடுப்பனவைப் பெறுகின்றனர். மேலும் 232,496 பேர் தபால் நிலையங்கள் ஊடாக பணத்தைப் பெற்று வருகின்றனர்.
எனினும், தேசிய அடையாள அட்டை இல்லாததால் 76,716 தகுதியான முதியவர்கள் இதுவரை இந்த கொடுப்பனவைப் பெற முடியாமல் உள்ளனர்.
இந்த பிரச்சினைக்கு தீர்வு காணும் வகையில், பாதிக்கப்பட்ட முதியோருக்கு தேசிய அடையாள அட்டைகளை விரைவாக வழங்குவதற்கான சிறப்பு வேலைத்திட்டம் தற்போது நடைமுறைப்படுத்தப்பட்டுள்ளது.
தேசிய அடையாள அட்டை இல்லாத காரணத்தால் முதியோர் கொடுப்பனவை இழந்தவர்கள் உடனடியாக தங்களது கிராம அலுவலர், சமூக வலுவூட்டல் உத்தியோகத்தர் அல்லது முதியோர் உரிமைகள் மேம்பாட்டு உத்தியோகத்தரை தொடர்புகொள்ளுமாறு தேசிய முதியோர் செயலகம் கேட்டுக்கொண்டுள்ளது.
மேலும், பாதிக்கப்பட்ட பயனாளிகள் குறித்த தகவல்கள் மாவட்ட ஒருங்கிணைப்புக் குழுக்கள், பிராந்திய ஒருங்கிணைப்புக் குழுக்கள், சமூக சக்தி அமைப்புகள் மற்றும் சமூக அபிவிருத்தி சபைகள் மூலம் சேகரிக்கப்பட்டு வருவதாகவும், தகுதியான அனைத்து முதியோரும் விரைவில் இந்த வேலைத்திட்டத்தின் கீழ் இணைக்கப்படுவார்கள் என்றும் செயலகம் தெரிவித்துள்ளது.
