அமெரிக்காவின் ஜனாதிபதி டொனால்ட் ட்ரம்புக்கு, இஸ்ரேல் பிரதமர் பெஞ்சமின் நெதன்யாகு ‘கோல்டன் பேஜர்’ (Golden Pager) எனப்படும் சிறப்பு பரிசை வழங்கியுள்ளார். இந்நிகழ்வு, நெதன்யாகுவின் அமெரிக்கா விஜயத்தின் போது நடந்ததாக தகவல்கள் தெரிவிக்கின்றன.
கடந்த ஆண்டு, லெபனானில் ஹிஸ்புல்லா அமைப்பினை குறிவைத்து இஸ்ரேல் மேற்கொண்ட ‘பேஜர்’ தாக்குதலை நினைவுகூரும் வகையில், வெட்டப்பட்ட மரத்தின் மேல் வைத்துப் பிரத்யேகமாக தயாரிக்கப்பட்ட ‘கோல்டன் பேஜர்’ ட்ரம்புக்கு வழங்கப்பட்டது. இதன்போது, “எங்களின் தலைசிறந்த நண்பர் மற்றும் சிறந்த கூட்டாளியுமான ஜனாதிபதி டொனால்ட் ஜே. ட்ரம்புக்கு, பிரதமர் பெஞ்சமின் நெதன்யாகு” என அந்தப் பரிசில் பொறிக்கப்பட்டிருந்தது.
இந்த பரிசை பெற்றுக்கொண்ட ட்ரம்ப், “இது ஒரு சிறந்த தாக்குதல்” எனக் கூறி, இஸ்ரேல் மேற்கொண்ட லெபனான் தாக்குதலை பாராட்டியதாக அமெரிக்க ஊடகங்கள் தகவல் வெளியிட்டுள்ளன. இது அரசியல் வட்டாரங்களில் பரபரப்பை ஏற்படுத்தியுள்ளது.
மேலும், ட்ரம்ப் தரப்பில் இருந்து நெதன்யாகுவிற்கு ஒரு பிரத்தியேக புகைப்படம் பரிசளிக்கப்பட்டுள்ளது. அதில், “சிறந்த தலைவர்” என எழுதியிருந்ததுடன், ட்ரம்பும், நெதன்யாகுவும் இணைந்து எடுத்துக்கொண்ட புகைப்படமும் இணைக்கப்பட்டிருந்ததாக கூறப்படுகிறது.
