சோவியத் ஒன்றியத்தின் கடைசி ஜனாதிபதியான மைக்கேல் கோர்பச்சேவ் தனது 91வது வயதில் மருத்துவமனையில் உயிரிழந்தார்.
பனிப்போரை இரத்தம் சிந்தாமல் முடிவுக்குக் கொண்டுவந்ததாக மேற்கு நாடுகளால் விதந்தோதப்படும் அதேவேளை, சோவியத் யூனியன் என்ற மாபெரும் சாம்ராஜ்ஜியத்தின் வீழ்ச்சிக்கு காரணமானவர் என இன்னொரு சாரரால் விமர்சிக்கப்படும் கோர்பச்சேவ் வரலாற்றில் இருவேறு முரண் பாத்திரங்களாக அறியப்படுகிறார்.
நேற்று செவ்வாயன்று தனது 91 வயதில் இறந்தார் என்று மருத்துவமனை அதிகாரிகளை மேற்கோள் காட்டி ரஷ்ய செய்தி நிறுவனங்கள் தெரிவித்துள்ளன.
கோர்பச்சேவ், இரண்டாம் உலகப் போருக்குப் பிறகு ஐரோப்பாவைப் பிளவுபடுத்திய இரும்புத்திரையை அகற்றி ஜெர்மனியை மீண்டும் ஒன்றிணைக்க அமெரிக்காவுடன் ஆயுதக் குறைப்பு ஒப்பந்தங்களையும் மேற்கத்திய சக்திகளுடன் கூட்டுறவையும் உருவாக்கினார்.
1989 இல் கம்யூனிச கிழக்கு ஐரோப்பாவின் சோவியத் தொகுதி நாடுகளில் ஜனநாயக சார்பு எதிர்ப்புக்கள் பரவியபோது, அவர் சக்தியைப் பயன்படுத்துவதைத் தவிர்த்தார். 1956 இல் ஹங்கேரி மற்றும் 1968 இல் செக்கோஸ்லோவாக்கியாவில் கிளர்ச்சிகள் ஏற்பட்ட போது, முன்னைய ரஷ்ய தலைவர்கள் இராணுவத்தை பயன்படுத்தி அவற்றை அடக்கியிருந்தனர்.
ஆனால் எதிர்ப்புக்கள் சோவியத் யூனியனின் 15 குடியரசுகளில் சுயாட்சிக்கான அபிலாஷைகளைத் தூண்டின, அவை குழப்பமான பாணியில் அடுத்த இரண்டு ஆண்டுகளில் சிதைந்தன.
அந்த சரிவைத் தடுக்க கோர்பச்சேவ் போராடினார்.
1985 இல் சோவியத் கம்யூனிஸ்ட் கட்சியின் பொதுச் செயலாளராக ஆனபோது, வெறும் 54 வயதில், அவர் வரையறுக்கப்பட்ட அரசியல் மற்றும் பொருளாதார சுதந்திரங்களை அறிமுகப்படுத்துவதன் மூலம் அமைப்பைப் புதுப்பிக்கத் தொடங்கினார், ஆனால் அவரது சீர்திருத்தங்கள் கட்டுப்பாட்டை மீறின.
அவரது ‘கிளாஸ்னோஸ்ட்’ கொள்கை – பேச்சு சுதந்திரம் – கட்சி மற்றும் அரசு மீது முன்னர் நினைத்துப் பார்க்க முடியாத விமர்சனங்களை அனுமதித்தது, ஆனால் லாட்வியா, லிதுவேனியா, எஸ்டோனியா மற்றும் பிற இடங்களில் உள்ள பால்டிக் குடியரசுகளில் சுதந்திரத்திற்கு அழுத்தம் கொடுக்கத் தொடங்கிய தேசியவாதிகளையும் உற்சாகப்படுத்தியது.
பல ரஷ்யர்கள் கோர்பச்சேவ் சீர்திருத்தங்கள் கட்டவிழ்த்துவிட்ட கொந்தளிப்பை ஒருபோதும் மன்னிக்கவில்லை, அதன்பிறகு அவர்களின் வாழ்க்கைத் தரம் வீழ்ச்சியடைந்ததைக் கருத்தில் கொண்டு, ஜனநாயகத்திற்கு செலுத்த வேண்டிய விலை அதிகம் என கருதினர்.
ஜூன் 30 அன்று கோர்பச்சேவை மருத்துவமனையில் சந்தித்த பிறகு, தாராளவாத பொருளாதார நிபுணர் ருஸ்லான் கிரின்பெர்க் பின்வருமாறு கூறினார்: “அவர் எங்களுக்கு எல்லா சுதந்திரத்தையும் கொடுத்தார் – ஆனால் அதை என்ன செய்வது என்று எங்களுக்குத் தெரியவில்லை.”
