கொழும்பில் உள்ள நட்சத்திர ஹோட்டல் ஒன்று, காலி முகத்திடல் போராட்டத்தின் ஆரம்பத்திலிருந்து செயற்பாட்டாளர்களுக்கு உணவு வழங்கியதாக கூறப்படும் சம்பவம் தொடர்பில் பொலிஸார் விசாரணைகளை ஆரம்பித்துள்ளதாக கூறியுள்ளனர்.
ஹோட்டலில் இருந்து நாளொன்றுக்கு 500-600 உணவுப் பொட்டலங்கள் மக்கள் போராட்டக்காரர்களுக்கு வழங்கப்பட்டுள்ளதாக தமக்கு தகவல் கிடைத்துள்ளதாகவும் பொலிஸார் தெரிவித்தனர்.
போராட்டம் தொடங்கியதில் இருந்து சமீப காலம் வரை உணவு பொட்டலங்கள் வழங்கப்பட்டு வருவதாக கூறப்படுகிறது.
இந்த உணவுப் பொட்டலங்கள் இலவசமாக வழங்கப்பட்டதா அல்லது ஏதேனும் அமைப்பினால் ஓர்டர் செய்யப்பட்டு வழங்கப்பட்டதா என விசாரணைகள் ஆரம்பிக்கப்பட்டுள்ளதாக பொலிஸ் வட்டாரங்கள் தெரிவிக்கின்றன.
பொலிஸாரினால் கைது செய்யப்பட்ட போராட்டக்காரர் ஒருவரிடம் மேற்கொள்ளப்பட்ட விசாரணைகளின் போது இது தெரியவந்துள்ளதாக பொலிஸ் வட்டாரங்கள் தெரிவிக்கின்றன.
நாட்டை கொள்ளையடித்த ஊழல் அரசியல்வாதிகளை வீட்டுக்கு அனுப்பும் போராட்டம் என பொதுமக்கள் தன்னெழுச்சியாக ஆரம்பித்த போராட்டத்திற்கு பல்வேறு தரப்பினர் தம்மால் முடிந்த பங்களிப்பை வழங்கியிருந்தது குறிப்பிடத்தக்கது.
