கட்சியில் தாம் வகித்து வந்த பதவிகளை இராஜினாமா செய்ததை உறுதிப்படுத்திய ஐக்கிய மக்கள் சக்தியின் பாராளுமன்ற உறுப்பினர்களான ஹேஷா விதானகே மற்றும் சமிந்த விஜேசிறி ஆகியோர், சதிகளில் ஈடுபடுபவர்களை அகற்றி கட்சியை சுத்தப்படுத்த வேண்டும் என கட்சித் தலைமையிடம் வலியுறுத்தியுள்ளனர்.
“சில நாட்களுக்கு முன்பு நாங்கள் கட்சி அமைப்பாளர் பதவியை ராஜினாமா செய்தோம், ஆனால் அது பற்றி பகிரங்கமாக செல்லவில்லை. இருப்பினும் சில சதிகாரர்கள் இந்த தகவலை ஊடகங்களுக்கு கசியவிட்டனர். இந்த தகவலை ஊடகங்களுக்கு கசியவிட்டவர்கள் யார் என்பதை கட்சித் தலைவர் கண்டுபிடித்து அவர்களுக்கு எதிராக நடவடிக்கை எடுக்க வேண்டும் என்று நாங்கள் விரும்புகிறோம்” என ஹேஷா விதானகே தெரிவித்தார்.
நேற்று (26) கொழும்பில் நடந்த செய்தியாளர் சந்திப்பில் இதனை தெரிவித்தனர்.
இரண்டு எம்.பி.க்களும் விரைவில் அரசாங்கத்தில் சேரப்போவதாக வெளியான தகவலை மறுத்தனர்.
“ஐக்கிய மக்கள் சக்தியின் தலைவர் சஜித் பிரேமதாச இலங்கையின் அரச தலைவராகும் நிலையில் இருக்கிறார், ஆனால் இந்த நடவடிக்கையை நாசப்படுத்த சிலர் உள்ளனர். எனவே சஜித் சதிகாரர்களுக்கு எதிராக நடவடிக்கை எடுத்து கட்சியை தூய்மைப்படுத்துவார் என எதிர்பார்க்கிறோம்,” என்றார்.
இரத்தினபுரி மாவட்டத்தில் கட்சியை ஆட்சிக்கு கொண்டு வருவதற்கான அவர்களின் உண்மையான நடவடிக்கைக்கு குந்தகம் விளைவிக்க முயற்சிக்கும் சில ஐக்கிய மக்கள் சக்தி உறுப்பினர்கள் உள்ளனர் என்றார்.
“எங்கள் முயற்சிகளை மற்றவர்கள் நாசப்படுத்த முயற்சிக்கும்போது, அத்தகைய பதவியை வகிப்பதில் அர்த்தமில்லை என்பதால், கட்சி அமைப்பாளர் பதவியை ராஜினாமா செய்ய முடிவு செய்தேன். இந்த சதிகாரர்களுக்கு எதிராக சஜித் நடவடிக்கை எடுக்கத் தவறினால், ஐக்கிய தேசியக் கட்சிக்கு ஏற்பட்ட கதியே ஐக்கிய மக்கள் சக்திக்கும் ஏற்படும்” என்றார்.
அத்துகோரளக்கள் உட்பட ஐக்கிய மக்கள் சக்தியின் சில உறுப்பினர்கள் அவரது அரசியல் வாழ்க்கையை முடிவுக்கு கொண்டு வருவார்களா என்ற கேள்விக்கு, அவரை அரசியலில் இருந்து யாராலும் அகற்றிவிட முடியாது என்று ஹேஷா விதானகே கூறினார்.
ஐக்கிய மக்கள் சக்தியின் தலைவர் கட்சியை சுத்தப்படுத்துவார் என தானும் எதிர்பார்ப்பதாகவும் விஜேசிறி தெரிவித்துள்ளார்.
