மியான்மரில் நேற்று (27) சனிக்கிழமையன்று பாதுகாப்புப் படையினரின் தாக்குதலில் 91 பொதுமக்கள் கொல்லப்பட்டுள்ளனர். பெப்ரவரி 1 இராணுவ ஆட்சிக்கு பின்னர் ஒரே நாளில் அதிகமானவர்கள் உயிரிழந்த நாள் இதுவாகும்.
நேற்று மியான்மரின் இராணுவ தினம். 1945ஆம் ஆண்டு முதல் இந்த தினம் கொண்டாடப்படுகிறது. ஆங் சாங்சூகியின் தந்தையாரினால் இந்த தினம் உருவாக்கப்பட்டது. ஜப்பானின் ஆக்கிரமிற்கு எதிரான போராட்டத்தை குறிக்கும் விதமாக இந்த தினம் அனுட்டிக்கப்படுகிறது. எனினும், அவமானத்தின் நாளாக நேற்றைய நாளை மியான்மர் மக்கள் வர்ணித்துள்ளனர்.
இராணுவ தினத்தில், தலைநகர் நெய்பிடாவில் நடைபெற்ற அணிவகுப்பின் போது ஆட்சிக்குழுவின் தலைவர் மூத்த ஜெனரல் மின் ஆங் ஹ்லேங் பேசும்போது, இராணுவம் மக்களை பாதுகாத்து, ஜனநாயகத்திற்காக போராடும் என்றார்.
ஆனால், உண்மையில் நேற்று அதிகளவான பொதுமக்கள் கொல்லப்பட்டனர். இராணுவ அணிவகுப்புக்களிற்கு எதிராக போராடிய பொதுமக்கள் சுட்டுக் கொல்லப்பட்டனர்.
மாண்டலே நகரில் குறைந்தது 29 பேர்கொல்லப்பட்டனர். இதில் ஐந்து வயதுடைய சிறுவனும் உள்ளடங்குவதாக ஊடகங்கள் செய்தி வெளியிட்ட ஒரு சிறுவன். யாங்கோனில் குறைந்தது 24 பேர் கொல்லப்பட்டனர்.
இதற்கிடையில், மியான்மரின் இரண்டு டஜன் இன ஆயுதக் குழுக்களில் ஒன்றான கரேன் நஷனல் யூனியன், தாய்லாந்து எல்லைக்கு அருகே ஒரு இராணுவ முகாமை கைப்பற்றியதாகவும், ஒரு லெப்டினன்ட் கேணல் உட்பட 10 பேரைக் கொன்றதாகவும், தமது தரப்பில் ஒரு போராளியை இழந்ததாகவும் கூறியது.
நேற்று சனிக்கிழமையன்று நடந்த மரணங்களுடன், ஆட்சி கவிழ்ப்பின் பின் இராணுவத்தால் கொல்லப்பட்டதாகக் கூறப்படும் பொதுமக்களின் எண்ணிக்கை 400 க்கும் ஐ கடந்துள்ளது.
“இந்த 76 வது மியான்மர் ஆயுதப்படை நாள் பயங்கரவாத மற்றும் அவமதிப்பு நாளாக பொறிக்கப்பட்டிருக்கும். குழந்தைகள் உட்பட நிராயுதபாணியான பொதுமக்கள் கொல்லப்படுவது மன்னிக்க முடியாத செயல்கள்” என்று மியான்மருக்கான ஐரோப்பிய ஒன்றிய தூதுக்குழு தெரிவித்துள்ளது.
மத்திய சாகிங் பிராந்தியத்திலும், கிழக்கில் லாஷியோ, பாகோ பிராந்தியத்திலும், யாங்கோனுக்கு அருகிலும், பிற இடங்களிலும் மரணங்கள் பதிவானதாக செய்தி அறிக்கைகள் தெரிவிக்கின்றன. ஒரு வயது குழந்தையின் கண்ணை ரப்பர் தோட்டா தாக்கியுள்ளது.
நய்பிடாவில், மின் ஆங் ஹ்லேங் எந்தவொரு கால அவகாசத்தையும் கொடுக்காமல், தேர்தல்களை நடத்துவதாக உறுதியளித்தார்.
“ஜனநாயகம் பாதுகாக்க இராணுவம் முழு தேசத்துடனும் கைகோர்க்க முற்படுகிறது” என்று கூறினார். “கோரிக்கைகளைச் செய்வதற்காக ஸ்திரத்தன்மையையும் பாதுகாப்பையும் பாதிக்கும் வன்முறைச் செயல்கள் பொருத்தமற்றவை.” என்றார்.
ஆங் சான் சூகியின் கட்சி வென்ற நவம்பர் தேர்தல்கள் மோசடியானவை என்பதால் இராணுவம் ஆட்சியைப் பிடித்ததாகக் கூறியுள்ளது, இது நாட்டின் தேர்தல் ஆணையத்தால் நிராகரிக்கப்பட்டது.
தேர்ந்தெடுக்கப்பட்ட தலைவரும், நாட்டின் மிகவும் பிரபலமான சிவில் அரசியல்வாதியுமான சூகி, வெளியிடப்படாத இடத்தில் தடுத்து வைக்கப்பட்டுள்ளார். அவரது கட்சியில் உள்ள பல நபர்களும் காவலில் வைக்கப்பட்டுள்ளனர்.
அமெரிக்க மற்றும் ஐரோப்பிய பொருளாதாரத் தடைகளுடன் இந்த வாரம் இராணுவ ஆட்சிக்குழுவின் மீதான சர்வதேச அழுத்தம் அதிகரித்தது. ஆனால் ரஷ்யாவின் துணை பாதுகாப்பு அmமைச்சர் அலெக்சாண்டர் ஃபோமின் ஒரு நாள் முன்னதாக மூத்த ஆட்சிக்குழு தலைவர்களை சந்தித்து நய்பிடாவில் நடந்த அணிவகுப்பில் கலந்து கொண்டார்.
“ரஷ்யா ஒரு உண்மையான நண்பர்” என்று மின் ஆங் ஹேலிங் கூறினார்.
ரஷ்யா, சீனா, இந்தியா, பாகிஸ்தான், பங்களாதேஷ், வியட்நாம், லாவோஸ் மற்றும் தாய்லாந்து ஆகிய எட்டு நாடுகள் பிரதிநிதிகளை அனுப்பியுள்ளன, ஆனால் ரஷ்யா மட்டுமே ஒரு அமைச்சரை அனுப்பியது என்று இராஜதந்திரிகள் தெரிவித்தனர்.
சனிக்கிழமையன்று யாங்கோனில் உள்ள யு.எஸ். கலாச்சார மையத்தில் துப்பாக்கி குண்டுகள் தாக்கின, ஆனால் யாரும் காயமடையவில்லை, இந்த சம்பவம் குறித்து விசாரணை நடத்தப்பட்டு வருவதாக யு.எஸ். தூதரக செய்தித் தொடர்பாளர் ஆர்யானி மன்ரிங் தெரிவித்தார்.
