தனது கடை விளம்பரத்தில் நடிக்கத் துவங்கிய லெஜண்ட் சரவணன் தற்போது கோலிவுட்டில் ஹீரோவாகிவிட்டார். இந்த வயதில் லெஜண்ட் ஹீரோவா, யார் அவரை வைத்து படம் தயாரிக்கிறார்கள் என்று எல்லாம் கேட்கக் கூடாது. வயதானாலும் இன்னும் இளைஞர் போன்று இருக்கும் லெஜண்ட், தனது படத்தை தானே தயாரிக்கிறார்.
பெரிய பட்ஜெட்டில் பிரமாண்டமாக உருவாகி வரும் அந்த படத்தை ஜே.டி. மற்றும் ஜெர்ரி ஆகியோர் இயக்கி வருகிறார்கள். லெஜண்ட் படத்திற்காக பிரபல பாலிவுட் நடிகை ஊர்வசி ரவ்தெலாவை ஒப்பந்தம் செய்திருக்கிறார்கள். அம்மணி நிச்சயம் பெரிய தொகை கேட்டிருப்பார். ஆனால் அதெல்லாம் அண்ணாச்சிக்கு ஒரு பெரிய விஷயமே இல்லை.
முன்னதாக ஸ்டண்ட் காட்சியை படமாக்கியபோது லெஜண்ட் பலரை அடித்து நொறுக்கிய புகைப்படங்கள் வெளியாகின. லெஜண்ட் படப்பிடிப்பின்போது எடுக்கப்பட்ட புகைப்படங்களை ரோபோ ஷங்கர் ட்விட்டரில் வெளியிட்டார். லெஜண்ட் படத்தில் விவேக் இருக்கிறார் என்றால் காமெடிக்கு பஞ்சம் இருக்காது என்று எதிர்பார்க்கப்படுகிறது.
தற்போது கோலிவுட்டின் ஹாட் டாபிக் லெஜண்ட் சரவணனும், ஹரி நாடாரும் தான். ஒரு பக்கம் லெஜண்ட் ஹீரோவாகிவிட்டார். மறுபக்கம் ஹரி நாடாரும் ஹீரோவாகி காதல் செய்து கொண்டிருக்கிறார். 2கே அழகானது காதல் என்கிற படத்தை தயாரித்து ஹீரோவாக நடித்து வருகிறார் ஹரி நாடார். அந்த படத்தின் ஹீரோயின் வனிதா விஜயகுமார்.
