தடுப்பூசி போடாவிட்டால் அரசு ஊழியர்களுக்கு சம்பளம் கிடையாது என்று பாகிஸ்தான் மாகாண அரசு ஒன்று அறிவித்துள்ளது
உலகம் முழுவதும் கொரோனா இரண்டாவது அலை தீவிரமாக பரவி வருகிறது. இதனைக் கட்டுக்குள் கொண்டு வர அரசுகள் பல்வேறு நடவடிக்கைகளை எடுத்து வருகின்றன. கொரோனாவுக்கு தடுப்பூசி மட்டுமே தீர்வு என்ற நிலையில், தடுப்பூசி போடும் பணிகள் விரைவு படுத்தப்பட்டுள்ளன.
மேலும், தகுதி வாய்ந்த அனைவரும் கட்டாயம் தடுப்பூசி செலுத்திக் கொள்ள வேண்டும் என்று அறிவுறுத்தப்பட்டு வருகின்றன. தடுப்பூசி போட்டுக் கொள்வது தொடர்பான பல்வேறு விழிப்புணர்வுகளும் மேற்கொள்ளப்பட்டு வருகின்றன.
இந்த நிலையில், தடுப்பூசி போட்டுக்கொள்ளாத அரசு ஊழியர்களுக்கு சம்பளம் வழங்கப்படாது என்று பாகிஸ்தான் நாட்டின் சிந்து மாகாண முதல்வர் முராத் அலிஷா அறிவித்துள்ளார். முன்னதாக, இந்தியாவில் கண்டுபிடிக்கப்பட்ட டெல்டா வகை வைரஸ் தொற்று பாகிஸ்தானிலும் பரவத் தொடங்கி உள்ளன. குறிப்பாக, சிந்து மாகாணத்தில் அதிக பாதிப்புகளை ஏற்படுத்தி வருகிறது.
எனவே தடுப்பூசி திட்டத்தை தீவிரப்படுத்த பாகிஸ்தான் அரசு முயற்சித்து வருகிறது. பாகிஸ்தானில் மொத்த மக்கள் தொகை 22 கோடி. அவர்களில் 2 கோடியே 20 லட்சம் பேருக்கு இதுவரை தடுப்பூசி போடப்பட்டுள்ளது. ஆனாலும், சிலர் தடுப்பூசி போட தயக்கம் காட்டி வருகின்றனர் என்பது குறிப்பிடத்தக்கது.
