நாடாளுமன்ற மரபுகளுக்கும் நிலையியல் கட்டளைகளுக்கும் (Standing Orders) அமையச் செயற்படுமாறு நாடாளுமன்ற உறுப்பினர் இராமநாதன் அர்ச்சுனாவுக்கு மீண்டும் எச்சரிக்கை விடுப்பதாக சபாநாயகர் கலாநிதி ஜகத் விக்ரமரத்ன நேற்று (21) நாடாளுமன்றத்தில் தெரிவித்தார்.
நாடாளுமன்றத்தில் நீண்டகாலமாகப் பேணப்பட்டு வரும் மரபுகளும் நிலையியல் கட்டளைகளும் நடைமுறையில் உள்ளன என்பதைச் சுட்டிக்காட்டிய சபாநாயகர், சபையைத் தவறாக வழிநடத்த முயற்சிப்பதைத் தவிர்க்குமாறு அவரிடம் வலியுறுத்தினார்.
நாடாளுமன்றச் செயலகமும் இத்தகைய மரபுகளுக்கும் நிலையியல் கட்டளைகளுக்கும் அமைவாகவே இயங்குகின்றது என்பதைக் குறிப்பிட்ட சபாநாயகர், அவர் ஒழுக்கமான முறையில் நடந்துகொள்ள வேண்டும் என்றும் அறிவுறுத்தினார்.
நிலையியல் கட்டளை 27(2)-இன் கீழ் சபையில் முன்வைப்பதற்காக, நாடாளுமன்ற உறுப்பினர் இராமநாதன் அர்ச்சுனா சபாநாயகரிடம் சமர்ப்பித்த ஆவணத்தில் உள்ளடக்கப்படாத விடயங்களை உள்ளடக்கிய கேள்வியொன்றை அவர் அமைச்சர் ஆனந்த விஜேபாலவிடம் முன்வைத்தார். இது குறித்து சபாநாயகர் அந்த இடத்திலேயே அவருக்கு எச்சரிக்கை விடுத்தார்.
இந்த விடயம் தொடர்பாகக் கருத்துத் தெரிவித்த அரசாங்கத்தின் பிரதம கொறடாவும் அமைச்சருமான நளிந்த ஜயதிஸ்ஸ, இத்தகைய சம்பவங்கள் மீண்டும் இடம்பெற இடமளிக்கக் கூடாது என்று குறிப்பிட்டார்.
சபாநாயகர்— “கௌரவ உறுப்பினரே, நீங்கள் இப்போது முன்வைத்தது, என்னிடம் சமர்ப்பித்த கேள்வி அல்ல. அமைச்சிற்கு அனுப்பப்பட்ட கேள்வி, நீங்கள் என்னிடம் சமர்ப்பித்த அதே வடிவத்தில்தான் உள்ளது. எனவே, இங்குள்ள நடைமுறைகளுக்கும் மரபுகளுக்கும் அமைவாக, ஒழுக்கமான முறையில் நடந்துகொள்ளுமாறு நான் உங்களுக்கு அறிவுறுத்துகிறேன்.”
நாடாளுமன்ற உறுப்பினர் இராமநாதன் அர்ச்சுனா— “சபாநாயகர் அவர்களே! நான் இந்த ஆவணத்தைச் சமர்ப்பித்தபோது, அதில் ஒரு பெயர் குறிப்பிடப்பட்டிருந்தது. ஆனால், நாடாளுமன்றச் செயலகம் அந்தப் பெயரை நீக்கி, ஆவணத்தில் பல மாற்றங்களைச் செய்து சுருக்கியுள்ளது. பெயரைச் சேர்க்க முடியாது என்று கூறி, அவர்கள் நிலையியல் கட்டளை 83-ஐச் சுட்டிக்காட்டினர். ஆனால், நிலையியல் கட்டளை 83 என்பது நாடாளுமன்ற உறுப்பினர்களின் தனிப்பட்ட விடயங்கள் தொடர்பானது. செயலகம் ஆவணத்தை இவ்வளவு தூரம் மாற்றியமைத்ததற்கு நான் பொறுப்பேற்க முடியாது.”
சபாநாயகர்— “கௌரவ உறுப்பினரே, என்னிடம் ஒப்படைக்கப்பட்ட ஆவணம் இதுதான். எனவே, இந்தச் சபையைத் தவறாக வழிநடத்த முயற்சிப்பதைத் தவிர்க்குமாறு கேட்டுக்கொள்கிறேன். மேலும், நாடாளுமன்றச் செயலகம் நீண்டகால மரபுகளுக்கு அமைவாகவே இயங்குகின்றது. அந்த மரபுகளுக்கு அமையவே அவர்கள் தொடர்ந்து செயற்பட வேண்டும் என்பதை மீண்டும் வலியுறுத்துகிறேன்.”
அரசாங்கத்தின் பிரதம கொறடாவும், சுகாதார மற்றும் வெகுஜன ஊடக அமைச்சருமான நளிந்த ஜயதிஸ்ஸ— “சபாநாயகர் அவர்களே! இந்த விடயம் குறித்து கூடுதல் கவனம் செலுத்தப்பட வேண்டும்.” செயலகத்தின் அங்கீகாரம் பெறாத உள்ளடக்கத்தைக் கொண்ட ஆவணத்தை ஒரு உறுப்பினர் சமர்ப்பிக்கும்போது சிக்கல் ஏற்படுகிறது.
எதிர்க்கட்சியின் முதன்மைக் கொறடா அவர்களே, உங்கள் கையில் உள்ள கேள்வியை நீங்கள் வாசிக்க வேண்டும். நாடாளுமன்றத்தின் விதிகள் மற்றும் நடைமுறை விதிகளுக்கு உட்பட்டு ஏற்றுக்கொள்ளப்பட்ட விவகாரங்களுக்கு மட்டுமே பதிலளிக்க நாங்கள் கடமைப்பட்டுள்ளோம். எனவே, தயவுசெய்து வழக்கமான மரபைப் பின்பற்றுங்கள். இந்த விவகாரம் இத்துடன் முடிவுக்கு வர வேண்டும். உண்மையில், அந்த அறிக்கையை முன்வைக்கவே அனுமதித்திருக்கக் கூடாது.
சபாநாயகர்— கௌரவ உறுப்பினர் அவர்களே, இந்த விஷயத்தைத் தெளிவாகப் புரிந்துகொள்ளுங்கள். இதை உங்களுக்கு மீண்டும் மீண்டும் சொல்ல வேண்டிய அவசியமில்லை.
