சமீப காலங்களில் மோசடி மற்றும் ஊழல் குற்றச்சாட்டுகளுக்கு ஆளான சில அரசியல்வாதிகள் மற்றும் அரசு அதிகாரிகள் மீது சட்ட நடவடிக்கை எடுக்கப்பட்டது நாட்டில் ஒரு நேர்மறையான போக்கை உருவாக்கியுள்ளது. அரசியல் கலாச்சாரத்தில் ஒரு உண்மையான மாற்றம் ஏற்பட்டுள்ளது. பொது நிதியை முறைகேடாகப் பயன்படுத்துதல் மற்றும் ஊழலுக்கு எதிரான கடுமையான சட்ட நடவடிக்கைகள் தொடர்ந்து நடைமுறைப்படுத்தப்பட வேண்டும். தற்போதைய அரசாங்கத்தின் ஊழல் எதிர்ப்பு நடவடிக்கைகளைச் சீர்குலைக்க, அரசியல் ரீதியாகச் சரிவைச் சந்தித்த சில சக்திகள் ஒன்றிணைந்து வருவதாக ஃபீல்ட் மார்ஷல் சரத் பொன்சேகா தெரிவித்தார். நாடு முழுவதும் அவர் நடத்தி வரும் கருத்தரங்குத் தொடரின் ஒரு பகுதியாக, 15-ஆம் திகதி சிலாபத்தில்எநடைபெற்ற கருத்தரங்கில் கலந்துகொண்டபோது அவர் இந்தக் கருத்துகளைத் தெரிவித்தார்.
அவர் மேலும் கூறியதாவது: நீண்ட காலமாக இந்நாட்டில் நிலவிய அரசியல் கலாச்சாரம், மக்களின் நலனுக்காக அல்லாமல், அரசியல்வாதிகளின் அதிகாரத்தையும் இருப்பையும் தக்கவைத்துக்கொள்ளும் வகையிலான ஒரு அமைப்பாக மாறியிருந்தது. மக்களுடன் நெருக்கமாக இருப்பது போல நடித்து, அவர்களை ஏமாற்றித் தவறான வழியில் வழிநடத்துவதன் மூலம் அதிகாரத்தைத் தக்கவைத்துக் கொள்ளும் ஒரு அரசியல் கலாச்சாரம் நிலவியது. இத்தகைய சீரழிவான கலாச்சாரம் நாட்டின் ஒட்டுமொத்த அரசியல் அமைப்பையும் ஊழல் மயமாக மாற்றியது.
சமீபத்தில் ஏற்பட்ட பெரும் அரசியல் நெருக்கடியுடன் இணைந்து நாட்டின் அரசியலில் குறிப்பிடத்தக்க மாற்றம் ஒன்று நிகழ்ந்தது. மக்கள் நீண்ட காலமாக நிராகரித்து வந்த அரசியல் சக்திகளுக்குப் பதிலாக, ஒரு புதிய அரசியல் பாதையை அமைப்பதற்கான வாய்ப்பு இப்போது உருவாகியுள்ளது. அதே வேளையில், ஊழல் மற்றும் மோசடிக்கு எதிரான இந்தப் புதிய அரசியல் பாதையை மாற்றியமைக்க எதிர்க்கட்சிகள் உட்படப் பல்வேறு குழுக்கள் முயற்சித்து வருகின்றன.
…கூரைத் தகடுகள், சிமெண்ட் மூட்டைகள், உணவுப் பொட்டலங்கள் மற்றும் மதுபானம் போன்ற பொருட்களை விநியோகிப்பதன் மூலம், அவர்கள் மக்களுடன் நெருக்கமாக இருக்க முயன்றனர்… “அரசியல்வாதிகள் மக்கள் மீதோ அல்லது நாட்டின் மீதோ கொண்ட அன்பு அல்லது பற்றின் காரணமாக அல்லாமல், தங்கள் சொந்த இருப்பைத் தக்கவைத்துக்கொள்ளும் நோக்கிலேயே இத்தகைய உறவுகளை உருவாக்க முயன்றனர். இத்தகைய உதவிகள் மக்களுக்குத் தற்காலிக நிவாரணத்தை மட்டுமே அளிக்கின்றன; அவற்றால் மக்களின் நீண்டகாலப் பொருளாதாரப் பிரச்சினைகளுக்குத் தீர்வு காண முடியாது.”
