போசன் பௌர்ணமி விழாவை முன்னிட்டு நாடு முழுவதும் 18,412 தான்சாலைகள் இதுவரை பதிவு செய்யப்பட்டுள்ளதாக தெரிவிக்கப்பட்டுள்ளது. உணவுப் பாதுகாப்பு மற்றும் பொதுச் சுகாதாரத் தரநிலைகள் பின்பற்றப்படுகிறதா என்பதை உறுதிப்படுத்துவதற்காக பொது சுகாதார பரிசோதகர்கள் (PHI) தீவிர கண்காணிப்பில் ஈடுபட்டுள்ளனர்.
பொது சுகாதார பரிசோதகர்கள் சங்கத்தின் செயலாளர் சமில் முதுகுடா தெரிவிக்கையில், தான்சாலைகளுடன் சேர்த்து போசன் விழா நடைபெறும் பகுதிகளில் அமைந்துள்ள கடைகள் மற்றும் தற்காலிக விற்பனை நிலையங்களிலும் போசன் வாரம் முழுவதும் சோதனைகள் மேற்கொள்ளப்படும் என்றார்.
உணவு மற்றும் பானங்களை வழங்கும் போது பிளாஸ்டிக் பொருட்களை பயன்படுத்த வேண்டாம் என தான்சாலை ஏற்பாட்டாளர்களுக்கு PHI சங்கம் வலியுறுத்தியுள்ளது. குறிப்பாக சூடான அல்லது குளிர்ந்த உணவுகளை பொலித்தீன் பைகளில் சேமிப்பது கடுமையான உடல்நலப் பாதிப்புகளை ஏற்படுத்தும் என்றும் எச்சரித்துள்ளது.
மேலும், உணவால் பரவும் நோய்களைத் தடுக்கும் வகையில் பாதுகாப்பான உணவு கையாளும் நடைமுறைகளை கண்டிப்பாக பின்பற்றுமாறும் ஏற்பாட்டாளர்களுக்கு அறிவுறுத்தப்பட்டுள்ளது.
அத்துடன், பானங்களை வழங்க பயன்படுத்தப்படும் பிளாஸ்டிக் குவளைகள் மற்றும் ஒருமுறை பயன்படுத்தும் பொருட்கள் பொறுப்பற்ற முறையில் கைவிடப்படுவதால், அவை டெங்கு கொசுக்கள் பெருகும் இடங்களாக மாறக்கூடும் என்றும் எச்சரிக்கப்பட்டுள்ளது.
எனவே, கழிவுகளை முறையாக அகற்றி சுற்றுச்சூழலை சுத்தமாக வைத்திருப்பதன் மூலம் டெங்கு பரவலைக் கட்டுப்படுத்த பொதுமக்கள் ஒத்துழைக்குமாறும் PHI சங்கம் கேட்டுக்கொண்டுள்ளது.
