மாநில புலனாய்வு சேவையின் (SIS) முன்னாள் பணிப்பாளர் மேஜர் ஜெனரல் (ஓய்வு) சுரேஷ் சல்லேயின் மனைவி மனோரி சல்லே, தனது கணவருக்கு மிகவும் ஆழமான மற்றும் மனிதாபிமானமற்ற உடல் சோதனை மேற்கொள்ளப்பட்டதாக குற்றப் புலனாய்வு திணைக்களம் (CID) இன்று முதல் முறையாக ஒப்புக்கொண்டுள்ளதாக தெரிவித்தார்.
மனித உரிமைகள் ஆணைக்குழுவில் நடைபெற்ற விசாரணைக்கு பின்னர் ஊடகங்களிடம் பேசிய அவர், CID அதிகாரிகள் தனது கணவரை சிறைக் கூடத்திலிருந்து வெளியே கொண்டு வந்து, மற்றவர்களின் முன்னிலையில் நிர்வாணமாக்கி, கைக்கட்டுடன் வைத்தபடி ஆழமான மலவாய்வு (rectal examination) சோதனை மேற்கொண்டதாக அதிகாரப்பூர்வமாக ஏற்றுக்கொண்டதாக கூறினார்.
மனோரி சல்லேயின் கூற்றுப்படி, கடந்த மார்ச் 8ஆம் தேதி இந்த சம்பவம் நடந்ததிலிருந்து CID தொடர்ந்து இந்த குற்றச்சாட்டுகளை மறுத்து வந்தது. ஆனால் சமீபத்தில் நடைபெற்ற மனித உரிமைகள் ஆணைக்குழு அமர்வில், முன்னதாக ஆஜராகத் தவறியிருந்த CID அதிகாரிகள் பங்கேற்றபோது, இந்த நடைமுறையை அதிகாரப்பூர்வமாக ஒப்புக்கொண்டதாக அவர் தெரிவித்தார்.
இந்த ஒப்புதலின் பின்னர், சம்பவத்துடன் தொடர்புடைய CCTV காட்சிகள், சோதனையில் ஈடுபட்ட அதிகாரிகளின் பெயர்கள் மற்றும் இத்தகைய நடைமுறைகளுக்கு வழிகாட்டும் அதிகாரப்பூர்வ சுற்றறிக்கைகளை சமர்ப்பிக்குமாறு ஆணைக்குழு CID-யிடம் கோரியுள்ளதாக அவர் கூறினார்.
“சுரேஷ் சல்லே முதலில் நீதிமன்றக் காவலில் வைக்கப்பட்டபோது, நீதிமன்ற மருத்துவ அதிகாரியால் (JMO) பரிசோதிக்கப்பட்டு நல்ல உடல்நலத்துடன் இருந்தார். ஆனால் பின்னர் அவர் ‘தண்டனைச் சிறைக் கூடம்’ எனக் கூறப்படும் விசேட அறைக்குக் மாற்றப்பட்ட பிறகே இந்த கடுமையான சோதனைகளும் சித்திரவதைகளும் இடம்பெற்றன,” என அவர் தெரிவித்தார்.
தற்போதைய சிறைநிலை குறித்து விளக்கமளித்த மனோரி சல்லே, தனது கணவர் காற்றோட்டமே இல்லாத 6×4 அடி அளவிலான சிறிய அறையில் அடைக்கப்பட்டுள்ளதாக கூறினார். மேலும், மன உளைச்சலை ஏற்படுத்தும் நோக்கில் 24 மணி நேரமும் மின்விளக்கு எரியவிடப்படுவதாகவும், முதல் 40 நாட்கள் வெறும் சிமெண்டு தரையிலேயே தூங்க வைக்கப்பட்டதாகவும் குற்றஞ்சாட்டினார்.
அந்த பகுதி எலிகள் அதிகம் காணப்படும் இடமாக இருப்பதாகவும், அதே தளத்தில் இருந்த மற்ற கைதிகளில் இருவர் அல்லது மூவர் எலி கடியால் மருத்துவ சிகிச்சை பெற்றதாகவும் அவர் கூறினார். மேலும், கழிப்பறைக்கு அருகில் அமைந்துள்ள அந்த அறையிலிருந்து வரும் துர்நாற்றம், அவரது கணவரின் நீண்டகால ஒற்றைத்தலைவலி (Migraine) நோயை மேலும் மோசமாக்கியுள்ளதாகவும் தெரிவித்தார்.
தனது கணவர் தொடர்ந்து உணவும் நீரும் மறுத்துவருவதால், மருத்துவர்கள் குறைந்தளவிலான சிரை வழி திரவங்கள் (IV fluids) மூலம் மட்டுமே அவரை உயிருடன் வைத்திருக்க முயற்சிப்பதாக அவர் கூறினார். தற்போது அவர் மிகவும் பலவீனமான நிலையில் இருப்பதுடன், பேசுவதற்கும் சிரமப்படுவதாகவும், நீண்ட நேரம் நேராக அமர முடியாத நிலை உள்ளதாகவும், தொடர்ந்து பயன்படுத்தப்படும் கானுலா (Cannula) காரணமாக கைகளில் கடுமையான வீக்கம் ஏற்பட்டுள்ளதாகவும் தெரிவித்தார்.
மேலும், இந்த மனித உரிமை மீறல்கள் குறித்து ஜனாதிபதிக்கு இரண்டு முறை கடிதம் எழுதி தலையீடு கோரியிருந்தாலும், இதுவரை எந்த உத்தியோகபூர்வ பதிலும் அல்லது குறைந்தபட்ச அங்கீகாரமும் குடும்பத்தினருக்கு கிடைக்கவில்லை என மனோரி சல்லே தெரிவித்தார்.
