2.5 மில்லியன் அமெரிக்க டொலர் இழப்பு ஏற்பட்டதாகக் கூறப்படும் இணையவழித் திருட்டு தொடர்பாக விளக்கம் அளிப்பதற்காக, திறைசேரி செயலாளர் ஹர்ஷன சூரியப்பெரும பொது நிதிக் குழுவின் (COPF) முன் ஆஜராகுமாறு அழைக்கப்பட்டுள்ளார்.
வியாழக்கிழமை (30) அன்று, நிதி அமைச்சகத்தின் பிற சிரேஷ்ட அதிகாரிகளுடன் குழுவின் முன் ஆஜராகுமாறு அவருக்கு அறிவுறுத்தப்பட்டுள்ளதாக பொது நிதிக் குழுவின் தலைவர் ஹர்ஷ டி சில்வா தெரிவித்தார்.
ஊடகங்களுக்குப் பேட்டியளித்த ஹர்ஷ டி சில்வா, இச்சம்பவத்தின் தீவிரத்தை சுட்டிக்காட்டி, அதிகாரிகளை அழைக்கும் முடிவு குழுவால் ஒருமனதாக எடுக்கப்பட்டதாகக் குறிப்பிட்டார்.
“இதை நாம் ஒரு தேசியப் பிரச்சினையாகப் பார்க்க வேண்டும். இதை நாம் ஒருதலைபட்சமான பார்வைகளால் தீர்க்க முடியாது. தெளிவாக ஒரு பிரச்சினை உள்ளது, மேலும் பொது நிதி மீது பாராளுமன்றத்திற்கே முழு அதிகாரம் உள்ளது,” என்று அவர் கூறினார்.
மேலும், அதிகாரிகளை அழைப்பதற்கும், இவ்விவகாரம் குறித்து விரிவான விசாரணை நடத்துவதற்கும் நிலையான விதிகளின் கீழ் குழுவிற்கு அதிகாரங்கள் வழங்கப்பட்டுள்ளன என்றும் அவர் கூறினார்.
