முன்னாள் நாடாளுமன்ற உறுப்பினரும், இராஜாங்க அமைச்சருமான லொஹான் ரத்வத்த தனது 57வது வயதில் காலமானார்.
அவர் இறக்கும் போது உடல்நிலை சரியில்லாமல் இருந்ததாகவும், மருத்துவ சிகிச்சை பெற்று வந்ததாகவும் குடும்ப வட்டாரங்கள் தெரிவித்தன.
முன்னாள் பிரதி பாதுகாப்பு அமைச்சர் ஜெனரல் அனுருத்த ரத்வத்தவின் மகனான லொஹான், 2000 ஆம் ஆண்டு கண்டி மாவட்டத்தைப் பிரதிநிதித்துவப்படுத்தி நாடாளுமன்றத்தில் நுழைந்தார். பல ஆண்டுகளாக, சிறைச்சாலை மற்றும் கைதிகள் மறுவாழ்வு இராஜாங்க அமைச்சர் மற்றும் இரத்தினக்கல் மற்றும் நகைகள் தொடர்பான தொழில்துறை இராஜாங்க அமைச்சர் உள்ளிட்ட பல பதவிகளை வகித்தார்.
இலங்கையின் அரசியல் களத்தில் ஒரு முக்கிய நபராகவும் அவர் இருந்தார், இலங்கை சுதந்திரக் கட்சியுடனும் பின்னர் இலங்கை பொதுஜன பெரமுனவுடனும் நெருங்கிய தொடர்பு கொண்டதற்காக அறியப்பட்டார்.
அவர் சிறைச்சாலை அமைச்சராக இருந்தபோது, மதுபோதையில் நண்பர்களுடன் அனுராதபுரம் சிறைக்குள் நுழைந்து தமிழ் அரசியல் கைதிகளின் தலையில் துப்பாக்கியை வைத்து மிரட்டியதும் குறிப்பிடத்தக்கது.
