16 வயது மாணவி ஒருவர் தற்கொலை செய்து கொண்ட சம்பவம் தொடர்பாக, குற்றம் சுமத்தப்பட்டுள்ள தனியார் கல்வி நிறுவனத்தை சேர்ந்த ஜேவிபி பிரமுகர் நாராயணப்பிள்ளை சிவானந்தராஜா நேற்று (09) குற்றப் புலனாய்வுத் திணைக்களத்தில் முறைப்பாடு பதிவு செய்துள்ளார்.
தனது பெயருக்கு அவதூறு ஏற்படுத்தும் வகையில், ஒரு குழுவினர் வேண்டுமென்றே பிரச்சாரங்களை மேற்கொள்வதாகவும், அதற்கு உரிய விசாரணை நடத்தப்பட வேண்டுமெனவும் அவர் கோரிக்கை விடுத்துள்ளார்.
உயிரிழந்த மாணவி உடல்நலக் குறைவுடன் வகுப்புக்களுக்கு வந்திருந்ததாகவும், மாணவியின் பெற்றோரை அழைத்து, மாணவி உடல்நலம் தேறிய பின்னர் வகுப்புகளில் பங்கேற்குமாறு மட்டுமே அறிவுறுத்தியதாகவும் அந்த நபர் தெரிவித்தார்.
தனது புகைப்படங்களைப் பயன்படுத்தி சமூக ஊடகங்களில் கடுமையான விமர்சனங்கள் முன்வைக்கப்பட்டு, தான் மன உளைச்சலுக்கு ஆளாகியிருப்பதாகவும், இது யாரோ வேண்டுமென்றே செய்யும் செயல் என சந்தேகிப்பதாகவும் அந்த நபர் கூறினார்.
கொட்டாஞ்சேனை, கல்பொத்த வீதியில் உள்ள குடியிருப்பு வளாகமொன்றில் வசித்து வந்த 16 வயது மாணவி டில்ஷி அம்ஷிகா, கடந்த 29ஆம் திகதி அந்த வளாகத்தின் 6ஆவது மாடியிலிருந்து குதித்து தற்கொலை செய்து கொண்டார்.
அவர் கடுமையான மன அழுத்தத்தால் பாதிக்கப்பட்டிருந்த நிலையில், அதனால் தற்கொலை செய்து கொண்டதாக அவரது பெற்றோர் தெரிவித்தனர்.
பம்பலப்பிட்டி இராமநாதன் மகளிர் கல்லூரியில் கல்வி கற்ற தனது மகளுக்கு, அங்கு பயிற்றுவிக்கும் ஆசிரியர் ஒருவர் பாலியல் துன்புறுத்தலில் ஈடுபட்டதாகவும், பின்னர் மாணவி பாடசாலை மாறிய பின்னர், குற்றம்சாட்டப்பட்ட ஆசிரியரின் நண்பரான கொட்டஹேனா ராஜேஸ்வரி கல்வி நிலைய உரிமையாளரான இந்த நபர், மாணவியை மாணவர்கள் மத்தியில் அவமானப்படுத்தியதாகவும் பெற்றோர் குற்றம் சாட்டியிருந்தனர்.
சிஐடியில் முறையிட்ட பின்னர் சிவானந்தராஜா கூறுகையில்,
“இந்த மாணவி, அம்சிகா, ஜனவரி 18 ஆம் திகதி எனது நிறுவனத்தில் சேர்ந்தார். முதல் வாரத்தில், அவள் இரத்தப்போக்கால் பாதிக்கப்பட்டு சுயநினைவை இழந்தார். முதலில் அவருக்கு முதலுதவி அளித்தோம், பின்னர் அவளுடைய தந்தையை அழைத்து அவருக்குத் தகவல் தெரிவித்தோம்,” என்று தெரிவித்தார்.
மற்றொரு சந்தர்ப்பத்தில், மாணவி வகுப்பறையில் மயங்கி விழுந்ததாகவும், மற்ற மாணவர்கள் மற்றும் ஆசிரியர்களுடன் சேர்ந்து, அவருக்கு முதலுதவி அளித்து, பின்னர் அவருளுடைய தந்தையுடன் அவரை வீட்டிற்கு அனுப்பி வைத்ததாகவும் அவர் மேலும் கூறினார்.
மூன்றாவது வாரத்தில், மாணவி அசாதாரண நடத்தையை வெளிப்படுத்துவதை அறிந்ததாக ஆசிரியர் கூறினார். அவர் செய்த ஒரு கண்காணிப்பின் போது, மாணவியின் அசாதாரண நடத்தையை கவனித்ததாகவும், அவரிடம் பேசியபோது, அவள்ர் ஏன் தனியாக இருக்கிறார் என்று கேட்டதாகவும் அவர் கூறுகிறார்.
“நான் அவரது அம்மவை அழைத்தேன். பிரதான மண்டபத்திற்குச் சென்று, அங்கே காத்திருந்து அவருடைய அம்மாவிடம் பேசினேன்.. இந்த மாணவிக்கு உடல்நிலை சரியில்லை என்றும், அவருக்கு முறையான மருத்துவ சிகிச்சை அளிக்கப்பட வேண்டும் என்றும் அவருடைய அம்மாவிடம் விளக்கினேன்,” என்று அவர் கூறினார்.
மேலும், அவரது தாயிடம் பேசிக் கொண்டிருக்கும் போது, வகுப்பறையில் மாணவி தனியாக இருப்பதைக் கண்டதாகவும், பின்னர் அவரது தாயிடம் பேசிக் கொண்டிருக்கும் போது, மாணவி, “அம்மா, வா, வீட்டிற்குப் போகலாம்” என்று கூறிவிட்டு, தனது பெற்றோருடன் விரைவாகச் சென்றதாகவும் ஆசிரியர் கூறினார்.
“அவர் பெபிப்ரவரி 15 ஆம் திகதி கிளம்பிவிட்டார். அதன் பிறகு அவர் திரும்பி வந்தாரா இல்லையா என்று எனக்குத் தெரியவில்லை. சில மாணவர்கள் ஒரு மாதம் அல்லது இரண்டு அல்லது ஆறு மாதங்களுக்குப் பிறகு திரும்பி வருகிறார்கள். நான் அதில் அதிக கவனம் செலுத்தவில்லை,” என்று அவர் கூறினார்.
இருப்பினும், பின்னர் சமூக ஊடகங்களில் பரவிய ஒரு அறிக்கையில்,
“நான் வகுப்பறைக்குச் சென்று, மாணவியை எழுப்பி, அவருடைய பெயரைச் சொல்லி, ‘உன் பாடசாலையில் உனக்கு ஒரு பிரச்சனை இருக்கிறது, அதனால் நீ வகுப்பிற்கு வருவதை நிறுத்த வேண்டும்’ என்று சொன்னேன் என கூறப்படுகிறது. அது என் மீது சுமத்தப்பட்ட தவறான குற்றச்சாட்டு என்றும் கூறினார்.
“இந்தக் குற்றச்சாட்டு முற்றிலும் தவறானது. நான் வகுப்பறைக்கு சென்றதில்லை. உண்மையில், நான் வகுப்பறைகளுக்கு அருகில் கூட செல்வதில்லை. “ஒரு வகுப்பறையில் ஐந்து மாணவர்கள் இருந்தாலும், நான் உள்ளே சென்று மாணவர்களைத் தொந்தரவு செய்ய விரும்பவில்லை,” என்று அவர் கூறுகிறார்.
சம்பவம் நடந்து 13 நாட்களுக்குப் பிறகு சமூக ஊடகங்களில் தனக்கு எதிரான குற்றச்சாட்டுகள் குறித்து கவனத்தை ஈர்த்துள்ளதாக அவர் மேலும் கூறினார்.
“உண்மை விரைவில் வெளிவரும். நான் இதைப் பற்றி மேலும் பேச விரும்பவில்லை, ஆனால் உண்மை வெளிவரும்,” என்று அவர் கூறுகிறார்.
இந்தக் குற்றச்சாட்டுகளுக்குப் பின்னால் உள்ள முக்கிய காரணம் அரசியல் என்று ஆசிரியர் கூறுகிறார். “நான் ஒரு அரசியல்வாதி என்பதால் இவ்வளவு தாக்கப்படுகிறேன். கடந்த 6-7 நாட்களாக எனக்கு எந்த நிம்மதியும் இல்லை. எனது அன்றாட நடவடிக்கைகள் சீர்குலைந்துள்ளன. சமூக ஊடகங்கள் மூலம் கொழும்பு பகுதியில் நான் ஒரு வெறுக்கத்தக்க நபராக மாற்றப்பட்டேன்,” என்று அவர் கூறினார்.
தனது பின்னணியை விளக்கி, ஆசிரியர் கூறுகையில், அவர் தேசிய மக்கள் சக்தியின் கொழும்பு வடக்கு அமைப்பாளராகவும் நிர்வாகக் குழு உறுப்பினராகவும் பணியாற்றுவதாகவும், கடந்த நாடாளுமன்றத் தேர்தலில் 35,000க்கும் மேற்பட்ட வாக்குகளைப் பெற்ற வேட்பாளராக இருந்ததாகவும் கூறுகிறார்.
அவர் இதுவரை மாணவர்களுடன் எந்தப் பிரச்சினையும் சந்திக்கவில்லை என்றும், கல்வித் துறையில் 35 ஆண்டுகளாகப் பணியாற்றி வருவதாகவும், குறைந்த வருமானம் பெறும் மாணவர்களுக்கு இலவசக் கல்வியை வழங்குவதற்காகக் கூட பாடுபட்டுள்ளதாகவும் அவர் வலியுறுத்துகிறார்.
