பதுளை – மஹியங்கனை வீதியில் லொக்கல்ல ஓயா நீர்த்தேக்கத்தில் மூழ்கி உயிரிழந்த 17 வயதுடைய பாடசாலை மாணவியின் சடலம் நேற்று (21) பிற்பகல் மீட்கப்பட்டுள்ளதாக மஹியங்கனை பொலிஸார் தெரிவித்தனர்.
உயிரிழந்தவர் பதுளை கந்தேகெதர, வட்டகோகெதர, இலுக முகவரியில் வசிக்கும் ஜி.எச். திலினி உபேக்ஷா சண்டமாலி 17 வயதுடைய பாடசாலை மாணவி.
பதுளை கந்தேகெதர பிரதேசத்தில் வசிக்கும் இரண்டு மாணவிகளின் பெற்றோர்கள் நேற்று முன்தினம் (20) காலை பதுளை நகரில் பயிற்சி வகுப்பிற்கு செல்வதற்காக வீடுகளை விட்டு வெளியேறிய தமது மகள்கள் வீடு திரும்பவில்லையென அருகாமையில் உள்ள பொலிஸ் நிலையங்களுக்கு அறிவித்ததன் பின்னர், ரிதிமாலியத்த பொலிஸில் மாணவி ஒருவர் இருப்பது குறித்த தகவல் தெரியவந்துள்ளதாக பதுளை பொலிஸார் தெரிவித்தனர்.
20ம் திகதி இரவு 7.30 மணியளவில் பதுளை பகுதியிலிருந்து மொனராகலை பகுதிக்கு பயணித்த மோட்டார் சைக்கிளில் பயணித்த ஒருவர், 17 வயதுடைய பாடசாலை மாணவியை ரிதிமாலியத்த பகுதியில் போக்குவரத்து கடமையில் ஈடுபட்டிருந்த பொலிசாரிடம் கையளித்துள்ளார். பின்னர், சிறுமி ரிதிமாலியத்த பொலிஸாருக்கு அழைத்து வரப்பட்டதாக ரிதிமாலியத்த பொலிஸார் தெரிவித்தனர்.
பொலிஸாரிடம் ஒப்படைக்கப்பட்ட சிறுமியிடம் நடத்தப்பட்ட விசாரணையில், அவர் தனது தோழியுடன் நெருங்கிய நட்பு கொண்டிருந்ததாகவும், நேற்று முன்தினம் (20) இருவரும் தற்கொலை செய்து கொள்ள சம்மதம் தெரிவித்து, காலை 8 மணியளவில் வீட்டில் இருந்து பதுளை நகருக்கு வந்ததாகவும் தெரியவந்துள்ளது. அதன்பின் மஹியங்கனை பஸ்ஸில் ஏறி, அவர்களின் கைபேசியில் இருந்த சிம்கார்டுகளை கழற்றி எறிந்துவிட்டு, மஹியங்கனை நகருக்கு வந்து, சாப்பாட்டுக்கடையில் சோற்று பார்சல் வாங்கி, பாதியை சாப்பிட்டு, மீதியை மீண்டும் பார்சல் செய்துவிட்டு, மீண்டும் பஸ்சில் ஏறினார். பதுளை, லொக்கல்ல ஓயா ஏரி பந்தலுக்கு அருகில் பேருந்தில் இருந்து இறங்கி அதனை அடுத்துள்ள காட்டுப்பகுதிக்கு சென்றுள்ளார். அப்போது கொண்டு வந்த சோற்று பார்சலை சாப்பிட்டனர். பின்னர், உயிரிழந்த மாணவி தனது புத்தகப் பையில் இருந்த புத்தகத்தில், ‘நாங்கள் இருவரும் தற்கொலை செய்து கொள்கிறோம். எங்களைத் தேடாதீர்கள்’ எனத் வாசகம் எழுதி வைத்துவிட்டு, மாலை 6.30 மணியளவில் இரண்டு யுவதிகளும் தங்களுக்குள் பேசிவிட்டு தற்கொலை செய்து கொள்வதற்காக லொக்கல்ல ஓயா நீர்த்தேக்கத்திற்குச் சென்றுள்ளனர்.
போலீஸ் காவலில் இருக்கும் மாணவி, சாக முடியாது, திரும்பிப் போகலாம் என்றுள்ளார். ஆனால் மற்றைய மாணவி, இப்போது வீடு திரும்பினால் பெற்றோர் கேட்கும் கேள்விகளுக்கு எப்படி பதில் சொல்வாள் என்று கூறியுள்ளார். உங்களால் முடியாவிட்டால் நான் குதிப்பேன் என்றுவிட்டு அந்த நீர்த்தேக்கத்தில் குதித்துள்ளார். பின்னர் மற்றைய மாணவி வீதியில் பயணித்த மோட்டார் சைக்கிளை நிறுத்தி, ஏற்றிச் செல்லுமாறு கூறியதுடன், சாரதி சிறுமியை பொலிஸாரிடம் ஒப்படைத்துள்ளதாக ஆரம்பக்கட்ட விசாரணைகளில் தெரியவந்துள்ளது.
நேற்று (21) பிற்பகல் மஹியங்கனை நீதவான் ஆர்.எஸ்.ஜினதாச சம்பவ இடத்திற்கு வந்து, சடலத்தை பிரேத பரிசோதனைக்காக மஹியங்கனை ஆதார வைத்தியசாலைக்கு கொண்டு செல்ல உத்தரவிட்டார்.
இந்த பாடசாலை மாணவி தனது தோழியுடன் தற்கொலை செய்து கொள்ள வந்ததற்கான காரணம் இதுவரையில் வெளியாகவில்லை எனவும், மஹியங்கனை, ரிதிமாலியெத்த மற்றும் பதுளை பொலிஸ் நிலையங்கள் இணைந்து விசாரணைகளை ஆரம்பித்துள்ளதாகவும் பொலிஸார் தெரிவித்தனர்.
