நாரஹேன்பிட்டி பொலிஸ் நிலையத்தில் கடமையாற்றும் பொலிஸ் பரிசோதகர், தெல்தெனிய பொலிஸ் நிலையத்தில் கடமையாற்றும் உப பொலிஸ் பரிசோதகர் மற்றும் ஹோமாகம பொலிஸ் நிலையத்தில் கடமையாற்றும் பொலிஸ் கான்ஸ்டபிள் ஆகியோர் பொலிஸ் சேவையில் இருக்கும் போதே இரகசியமாக வெளிநாட்டில் வேலை தேடிச் சென்றுள்ளதாக உயர் பொலிஸ் அதிகாரி ஒருவர் தெரிவித்தார்.
இந்த மூன்று உத்தியோகத்தர்களுக்கும் சேவையில் இருந்து விலகுமாறு உத்தரவு பிறப்பிக்க நுகேகொட மற்றும் கொழும்பு தெற்கு பிரிவுக்கு பொறுப்பான சிரேஷ்ட பொலிஸ் அத்தியட்சகர்கள் நேற்று (15) நடவடிக்கை எடுத்திருந்தனர்.
நாரஹேன்பிட்டி பொலிஸ் நிலையத்தில் கடமையாற்றும் பொலிஸ் பரிசோதகர் பெப்ரவரி 03 ஆம் திகதி முதல் கடமைக்கு சமூகமளிக்கவில்லை எனவும் அவர் பெப்ரவரி 13 ஆம் திகதி நாட்டை விட்டு வெளியேறியுள்ளதாகவும் தெரியவந்துள்ளது.
தெல்தெனிய உப பொலிஸ் பரிசோதகரும் பெப்ரவரி 03 ஆம் திகதி முதல் பணிக்கு சமூகமளிக்காமல் நாட்டை விட்டு வெளியேறியுள்ளதாக குறிப்பிடப்படுகின்றது.
ஹோமாகம பொலிஸ் கான்ஸ்டபிள் 2023 ஆம் ஆண்டு நவம்பர் 15 ஆம் திகதி இரண்டு நாள் விடுமுறை எடுத்துவிட்டு பணிக்கு திரும்பவில்லை. அதை விசாரித்ததில், அவர் நாட்டை விட்டு வெளியேறியது தெரியவந்துள்ளது.
பதுளைப் பிரிவின் குற்றப் புலனாய்வுப் பிரிவின் (SCO) நிலைய பொறுப்பதிகாரி நாட்டை விட்டு வெளியேறியது கடந்த வாரம் தெரியவந்தது.
பொலிஸ் இன்ஸ்பெக்டராக உள்ள அந்த அதிகாரி, உயர் அதிகாரிகளுக்கு எந்த அறிவிப்பும் இல்லாமல் உரிய அனுமதியின்றி நாட்டை விட்டு வெளியேறியுள்ளார். இதன்படி, கடந்த 14ஆம் திகதி அவரை பணியிலிருந்து இடைநிறுத்துவதற்கு பதுளை பொலிஸ் அத்தியட்சகர் நடவடிக்கை எடுத்தார்.
இந்த அதிகாரியின் மனைவியிடம், இது குறித்து மூத்த போலீஸ் அதிகாரிகள் கேட்டபோது, தனது கணவர் வேலைக்காக நாட்டை விட்டு வெளியேறியதாக அவர் கூறினார்.
கடந்த காலங்களில் பொலிஸ் சேவையில் ஈடுபட்டிருந்த பல பொலிஸார் இவ்வாறு நாட்டை விட்டு வெளியேறியிருந்தனர். இவர்களில் பொலிஸ் விளையாட்டுப் பிரிவைச் சேர்ந்த குழுவொன்று சர்வதேச பொலிஸ் சங்கத்தின் மாநாட்டில் பங்குபற்றச் சென்ற பின்னர் காணாமல் போனமை தொடர்பில் அதிக கவனம் செலுத்தப்பட்டது. அத்துடன் கொழும்பு குற்றத்தடுப்பு பிரிவில் கடமையாற்றும் பொலிஸ் பரிசோதகர் ஒருவர் தமக்கு பாதாள உலக அச்சுறுத்தல் இருப்பதாகக் கூறி பிரான்ஸ் நாட்டுக்கு சுற்றுலா சென்று தஞ்சம் புகுந்துள்ளார்.
