இலங்கையைச் சேர்ந்த முக்கிய போதைப்பொருள் கடத்தல்காரராகக் கூறப்படும் முகமது சித்திக், இந்தியப் பிரஜை போல் மாறுவேடமிட்டு இந்திய கடவுச்சீட்டை வைத்திருந்த நிலையில் ஓமானில் கைது செய்யப்பட்டதாக புலனாய்வு வட்டாரங்கள் தெரிவித்துள்ளன.
முகமது சித்திக் தொடர்பாக இந்திய பாதுகாப்பு மற்றும் புலனாய்வு அமைப்புகளால் நீண்ட காலமாக மேற்கொள்ளப்பட்ட நடவடிக்கையின் படி, அவர் ஓமானிற்குள் நுழைந்தது குறித்து ஓமன் அதிகாரிகளுக்கு அவர்கள் தெரிவித்தனர்.
முகமது சித்திக் அபுதாபி எல்லையை ஒட்டிய பகுதியில் கைது செய்யப்பட்டதாக கூறப்படுகிறது.
இலங்கைக்குள் பாரிய போதைப்பொருள் கடத்தலுக்கு மூளையாக செயல்பட்ட முகமது சித்திக், பாகிஸ்தானில் உள்ள ஒரு சக்தி வாய்ந்த போதைப்பொருள் கடத்தல்காரரின் சகோதரியை திருமணம் செய்து கொண்டதோடு, இலங்கைப் பெண்ணையும் திருமணம் செய்துள்ளதாக கூறப்படுகிறது.
முகமது சித்திக் முன்பு நேபாள எல்லையை ஒட்டிய பகுதியில் இந்தியாவில் தங்கியுள்ளார்.
மகிழங்கமுவ சஞ்சீவ மற்றும் கோத்தா அசங்க என்ற இரு பாதாள உலக குற்றவாளிகளும் அவருடன் தங்கியிருந்ததாகவும் கூறப்படுகிறது.
சஞ்சீவ மற்றும் அசங்க ஆகியோர் இந்திய பாதுகாப்பு பிரிவினரால் கைது செய்யப்பட்டுள்ளதாகவும், அவர்களிடம் விசாரணை நடத்திய பின்னர் சித்திக் இருக்கும் இடத்தை அவர்கள் கண்டுபிடித்துள்ளதாகவும் தெரியவருகிறது.
ஆனால் சஞ்சீவ மற்றும் அசங்க இன்னும் இந்திய காவலில் இருக்கிறார்களா என்பது குறித்த தெளிவான தகவல்கள் இன்னும் கிடைக்கவில்லை.
இங்குள்ள சில பாதுகாப்பு அதிகாரிகள் தங்கள் தனிப்பட்ட தொடர்புகளின் அடிப்படையில் இந்தியாவிடம் இருந்து தகவல்களைக் கேட்டபோது, முகமது சித்திக் கைது செய்யப்பட்டதை அதிகாரப்பூர்வமற்ற மட்டத்தில் இந்திய அதிகாரிகள் உறுதிப்படுத்தினர்.
முகமது சித்திக் இந்தியாவில் உள்ள நீதிமன்றத்தால் நீண்ட கால சிறைத்தண்டனை விதிக்கப்பட்டிருப்பதும், அவருக்கு எதிராக இன்டர்போல் மூலம் இந்தியா சிவப்பு நோட்டீஸ் அனுப்பியதும் தெரியவந்துள்ளது.
அந்தக் குற்றத்திற்காக சித்திக் இந்தியாவில் கைது செய்யப்பட்டதாகவும், பின்னர் அவர் சிறையில் இருந்து தப்பிச் சென்றதாகவும் கூறப்படுகிறது. அதன்படி அவரை கைது செய்வதற்கான நடவடிக்கையை இந்திய பாதுகாப்பு படையினர் மேற்கொண்டுள்ளனர்.
தற்போது ஓமன் பிடியில் உள்ள சித்திக் என்பவரை இந்தியா அழைத்து வர இந்திய பாதுகாப்பு படையினர் நடவடிக்கை எடுத்து வருவதாக கூறப்படுகிறது.
பாகிஸ்தானில் உள்ள தீவிரவாதிகள் மற்றும் பயங்கரவாத குழுக்களுடன் நெருங்கிய தொடர்பு வைத்திருப்பதில் சித்திக் பிரபலமானவர்.
2003ஆம் ஆண்டு பொரலஸ்கமுவ பகுதியில் ஜீப்பில் ஹெரோயின் போதைப்பொருளை ஏற்றிச் சென்ற மொஹமட் சித்தீக் உள்ளிட்ட ஐவரை மேல்மாகாண வடக்கு குற்றப் பிரிவினர் கைது செய்தனர்.
நீண்ட நாட்களாக தடுப்புக் காவலில் வைக்கப்பட்டிருந்த அவர், பிணையில் வெளிவந்து பின்னர் நாட்டை விட்டு வெளியேறி டுபாய், பாகிஸ்தானில் தங்கியிருந்தார்.
ஹெரோயின் போதைப்பொருளை இந்தியா ஊடாக இலங்கைக்கு கொண்டு வருவதற்கு பதிலாக பாகிஸ்தானில் இருந்து கொள்கலன்களில் மறைத்து ஹெரோயினை இலங்கைக்கு கொண்டு வர சித்தீக் ஆரம்பித்துள்ளதாக தெரிவிக்கப்படுகின்றது.
இங்கிருந்து சீஷெல்ஸ் மற்றும் மாலத்தீவுகளுக்கு போதைப்பொருள் விநியோக வலையமைப்பையும் சித்திக் ஆரம்பித்திருந்தார்.
நீண்ட விசாரணைக்கு பின், அவருக்கு எதிராக இன்டர்போலில் இருந்து சிவப்பு அறிவிப்பு பெற போலீசார் நடவடிக்கை எடுத்தனர்.
இதனையடுத்து, மொஹமட் சித்திக் மற்றும் வெலே சுதா ஆகியோர் பாகிஸ்தானில் வைத்து பாகிஸ்தான் பாதுகாப்பு படையினரால் கைது செய்யப்பட்டு இலங்கையிடம் ஒப்படைக்கப்பட்டனர். கடந்த 2015ஆம் ஆண்டு மார்ச் மாதம் குற்றப் புலனாய்வுப் பிரிவின் பொலிஸ் குழுவொன்று சென்று சித்தீக்கை இலங்கைக்கு அழைத்து வந்தது.
அவர் குற்றப் புலனாய்வுப் பிரிவினரால் தடுப்புக் காவலில் வைக்கப்பட்டு செப்டம்பர் மாதம் நீதிமன்றத்தில் ஆஜர்படுத்தப்பட்டு விளக்கமறியலில் வைக்கப்பட்டார்.
பொரலஸ்கமுவ பிரதேசத்தில் சித்தீக்குடன் கைது செய்யப்பட்ட போதைப்பொருளின் மொத்த எடை 8.3 கிராம் என அரசாங்க பகுப்பாய்வாளர் தெரிவித்துள்ளார். அது தொடர்பிலான நீண்ட விசாரணைக்குப் பின்னர், 2018 ஆம் ஆண்டு செப்டம்பர் 13 ஆம் திகதி கொழும்பு உயர் நீதிமன்றம், சித்திக் உட்பட வழக்கில் குற்றம் சாட்டப்பட்ட 5 பேரையும் விடுதலை செய்தது. அவர் மீதான குற்றச்சாட்டுகளை நியாயமான சந்தேகத்திற்கு அப்பால் நிரூபிக்கத் தவறியதன் அடிப்படையிலும், முரண்பட்ட சாட்சியங்களின் அடிப்படையிலும் அது அமைந்தது. இதையடுத்து அவர் இந்தியாவுக்கு தப்பிச் சென்றுவிட்டார்.
சர்வதேச பொலிஸாரின் ஊடாக இந்தியா சித்திக்கிற்கு எதிராக சிவப்பு நோட்டீஸ் பிறப்பித்துள்ள போதிலும், அவருக்கு எதிராக இலங்கையிலிருந்து அவ்வாறான உத்தரவு எதுவும் இல்லை என பொலிஸ் தகவல் மூலம் தெரியவந்துள்ளது.
மொஹமட் சித்திக் பாரியளவிலான போதைப்பொருள் கடத்தல்காரராக இருந்தாலும், அவருக்கு எதிராக இலங்கையில் எந்தவிதமான குற்றச்சாட்டுகளும் இல்லை என சிரேஷ்ட பொலிஸ் அதிகாரி ஒருவர் தெரிவித்தார்.
