முன்னாள் பாராளுமன்ற உறுப்பினரும் ஊடகவியலாளருமான ஸ்ரீ ரங்காவால் ஏற்பட்ட விபத்தின் சாட்சியங்களை மறைத்ததாக குற்றம் சாட்டப்பட்டு அப்போது செட்டிகுளம் பொலிஸ் பொறுப்பதிகாரியாக கடமையாற்றிய பிரதம பொலிஸ் பரிசோதகர் சுகத் ரொஷான் சஞ்சீவ என்பவருக்கு வவுனியா மேல் நீதிமன்ற நீதிபதி மாணிக்கவாசகர் இளஞ்செழியன் 7 வருடங்களுக்கு ஒத்திவைக்கப்பட்ட ஆறுமாத சிறைத்தண்டனை விதித்து உத்தரவிட்டார்.
உயிரிழந்த பொலிஸ் சார்ஜன்ட்டின் மனைவிக்கு 500,000 ரூபா நட்டஈடாக வழங்கப்பட வேண்டுமென நீதிபதி உத்தரவிட்டுள்ளார்.
சாட்சிகளை மிரட்டிய குற்றச்சாட்டில் தற்போது விளக்கமறியலில் உள்ள முன்னாள் எம்பி ஜே.ஸ்ரீ ரங்காவை, நவம்பர் 6 ஆம் திகதி வரை விளக்கமறியலில் வைக்கவும் உத்தரவிட்டார்.
முன்னாள் பாராளுமன்ற உறுப்பினர் 2011 ஆம் ஆண்டு மார்ச் மாதம் 30 ஆம் திகதி (மகிந்த ராஜபக்சவின் ஆட்சிக்காலம்) மதவாச்சியிலிருந்து செட்டிகுளம் நோக்கி பதிவு செய்யப்படாத ஜீப் வண்டியில் பயணித்த போது செட்டிகுளம் வைத்தியசாலைக்கு எதிரே விபத்து ஏற்பட்டது. அலவ்வ, நவத்தல்வத்தையைச் சேர்ந்த மூன்று பிள்ளைகளின் தந்தையான ஜி. உதய ஜயமினி புஷ்பகுமார என்ற பொலிஸ் சார்ஜன்ட் (36759) கொல்லப்பட்டுள்ளார்.
இச்சம்பவத்தின் போது கடமையாற்றிய பொலிஸ் உத்தியோகத்தர்கள் பொய்யான தகவலை தெரிவித்ததாகவும், உயிரிழந்த சார்ஜன்ட் வாகனத்தை செலுத்தியதாக குறிப்பிட்டு விசாரணைகள் நிறைவடைந்துள்ளதாகவும் நீதிமன்றில் அறிவிக்கப்பட்டது.
சம்பவத்தில் உயிரிழந்த சார்ஜன்ட்டின் மனைவி செய்த முறைப்பாட்டின் அடிப்படையில் பொலிஸ் விசேட புலனாய்வுப் பிரிவினர் விசாரணைகளை மேற்கொண்டுள்ளனர். அப்போது சார்ஜென்ட் உயிரிழந்த சம்பவத்தில் வாகனத்தை செலுத்தியது முன்னாள் எம்பி ஜே.ஸ்ரீ ரங்கா என்பது தெரியவந்தது. சட்டமா அதிபர் வவுனியா மேல் நீதிமன்றத்தில் 11 குற்றச்சாட்டுகளின் கீழ் வழக்குத் தாக்கல் செய்திருந்தார்.
கடந்த மார்ச் மாதம் 28ஆம் திகதி, தொலைபேசியில் செல்வாக்கு செலுத்த முயன்றதாக குற்றம் சாட்டப்பட்ட முன்னாள் நாடாளுமன்ற உறுப்பினர் மீது பாதிக்கப்பட்டோர் பாதுகாப்புச் சட்டத்தின் கீழ் வழக்குப் பதிவு செய்யப்பட்டது.
குறித்த விசாரணையில் சாட்சியங்களை வழங்கிய இருவரை வாகனத்தில் ஏற்றி வேறு இடத்திற்கு அழைத்துச் சென்று சாட்சியமளிக்கக் கூடாது என அச்சுறுத்தியுள்ளனர்.
செட்டிகுளம் பொலிஸ் நிலையத்தின் முன்னாள் பொறுப்பதிகாரி பிரதம பரிசோதகர் சுகத் ரொஷான் சஞ்சீவ, தகவல்களை மறைத்ததாக குற்றம் சாட்டப்பட்டவர் நீதிமன்றத்தில் ஆஜராகி அனைத்து குற்றச்சாட்டுகளையும் ஒப்புக்கொண்டதாக அறிவித்தார்.
முன்வைக்கப்பட்ட உண்மைகளை பரிசீலித்த நீதிபதி, தலைமை பிரதம பரிசோதகர் சஞ்சீவாவுக்கு ஒத்திவைக்கப்பட்ட சிறைத் தண்டனையும் அபராதமும் விதித்து தீர்ப்பளித்தார்.
வவுனியா பிரிவிற்கு பொறுப்பாக இருந்த முன்னாள் பொலிஸ் அத்தியட்சகர் அமரசிறி சேனாரத்ன (ஓய்வு பெற்ற பிரதி பொலிஸ் மா அதிபர்), வவுனியா முன்னாள் உதவி பொலிஸ் அத்தியட்சகர் ஹரிச்சந்திர பண்டார (ஓய்வு பெற்ற எஸ்.எஸ்.பி), செட்டிகுளம் பொலிஸ் நிலையத்தில் கடமையாற்றிய பொலிஸ் சார்ஜன்ட் பிரியதர்ஷன ஹேரத் மற்றும் பொலிஸ் கான்ஸ்டபிள் டபிள்யூ.ஜி.பத்மபால ஆகியோர் இந்த இந்த வழக்கில் குற்றம் சாட்டப்பட்டனர்.
