திருகோணமலை திருக்கோணேஸ்வரர் ஆலயத்தை அரசு ஆக்கிரமிக்க முயன்றால், 1200 மில்லியன் இந்துக்களும் பொறுத்துக் கொண்டிருக்க மாட்டார்கள் என, இந்தியாவிலுள்ள இந்து மக்கள் கட்சியின் தலைவர் அர்ஜூன் சம்பத் எச்சரித்துள்ளார்.
திருகோணமலை திருக்கோணேஸ்வரம் ஆலயத்தின் சில பகுதிகளை ஆக்கிரமிக்க மேற்கொள்ளப்படும் முயற்சிகள் தொடர்பில் இந்து மக்கள் கட்சியின் தலைவர் அர்ஜுன் சம்பத், சென்னையில் உள்ள இலங்கை துணை உயர் ஸ்தானிகருக்கு கடிதம் எழுதியுள்ளார்.
அந்த கடிதத்திலேயே மேற்படி எச்சரிக்கையை விடுத்துள்ளார்.
“பௌத்த விரிவாக்கம் மற்றும் ஆக்கிரமிப்பு ஆகிய திட்டத்தின் ஒரு பகுதியாக பாராளுமன்றத்தில் பௌத்த பெரும்பான்மையைக் கொண்ட இலங்கை அரசாங்கம் சில நூறு ஆண்டுகளுக்கு முன்பு அயோத்தியில் பாபர் செய்ததைச் செய்ய விரும்பினால், நாங்கள், 1200 மில்லியன் உலகளாவிய இந்துக்கள், எங்கள் கண்களையும் காதுகளையும் மூடி அமைதியாக இருக்க மாட்டோம், ”என்று கடிதத்தில் குறிப்பிட்டார்.
அதே நேரத்தில் ஆலயத்திற்கு சொந்தமாக இருந்த 400 ஏக்கர் நிலத்தையும் திரும்ப ஒப்படைக்க வேண்டுமென்றும் கோரியுள்ளார்.
