கோட்டாபய தப்பியோடிய கதை: ஜனாதிபதி மாளிகையிலிருந்து சிங்கப்பூர் சென்றது வரையான பரபரப்பு தகவல்கள்!

69 இலட்சம் வாக்குகளைப் பெற்று ஆட்சிக்கு வந்த கோத்தபாய ராஜபக்ஷ 969 நாட்கள் மாத்திரம் ஜனாதிபதியாக பதவி வகித்து, மாபெரும் மக்கள் எதிர்ப்பிற்கு முகம் கொடுக்க முடியாமல் நாட்டிலிருந்து தப்பியோடினார்.

ஜனாதிபதி திங்கட்கிழமை இலங்கையை விட்டு வெளியேறும் வரை இப்படியொரு சம்பவம் நடக்கும் என்று யாருக்கும் தெரிந்திருக்கவில்லை. குறைந்த பட்சம் ஜனாதிபதி எங்கே இருக்கிறார் என்றும் தெரிந்திருக்கவில்லை. அவரது இருப்பிடம் பற்றிய பல ஊகங்கள் மட்டும் வெளியாகியிருந்தன.

ஜூலை 9 ஆம் திகதி கொழும்பில் குவிந்த மக்கள் படை, ஜனாதிபதி மாளிகையை கையகப்படுத்தியது. போராட்டக்காரர்கள் அங்கு நுழைந்த போது, ஜனாதிபதி மாளிகையில் ஜனாதிபதியைக் காணவில்லை.

சனிக்கிழமை பிற்பகல், உயரடுக்கு பிரமுகர் குழுவொன்று கட்டுநாயக்க விமான நிலையத்திற்கு அதிவேக நெடுஞ்சாலையில்  செல்வது, கட்டுநாயக்க விமான நிலையத்திற்குள் நுழைவது போன்ற காணொளிகள் சமூக ஊடக வலையமைப்புகளில் பரவியது.

துறைமுக வளாகத்தில் நங்கூரமிட்டிருந்த கப்பலில் பாதுகாப்புப் பணியாளர்கள்  அவசர அவசரமாக சில சூட்கேஸ்களை எடுத்துக்கொண்டு ஏறியது மற்றொரு காணொளியில் காட்டப்பட்டது.

அதன்படி சனிக்கிழமை இரவுக்குள் ஜனாதிபதி தொடர்பில் பல்வேறு தகவல்கள் பரவிக் கொண்டிருந்தன.

ஜனாதிபதி கட்டுநாயக்க விமான நிலையத்தில் இருந்து புறப்பட்டு அபுதாபிக்கு புறப்பட்டதாக கதை ஒன்று பரவியது. ஜனாதிபதி கடற்படைக் கப்பலில் ஏறி இந்தியாவுக்குப் புறப்பட்டதாக மற்றுமொரு கதை பரவியது.

ஜூலை 9ஆம் திகதி முதல், ஜனாதிபதி நாட்டை விட்டு வெளியேறியது வரையான பல்வேறு தகவல்கள் இப்போது வெளியாகியுள்ளன.

அதன்படி ஜூலை 09 சனிக்கிழமை போராட்டக்காரர்கள் கொழும்புக்கு வருவார்கள் என்று முடிவெடுத்த ஜனாதிபதி அதற்கு எவ்வாறு தயாரானார்? ஜனாதிபதி எங்கே தவறு செய்தார்? ஜனாதிபதி மாளிகையை விட்டு ஜனாதிபதி வெளியேறியது எப்படி? ஜனாதிபதி எங்கே மறைந்தார்? ஜனாதிபதியை ஏற்றுக்கொள்ள முடியாது என மேற்குலக நாடுகள் கூறிய போது ஜனாதிபதி எவ்வாறு நாட்டை விட்டு வெளியேறினார்? இது குறித்து பல தகவல்கள் வெளியாகியுள்ளன.

புலனாய்வு அறிக்கையின் தவறு!

ஜூலை 9 ஆம் திகதி இவ்வளவு பெருந்தொகையான மக்கள் கொழும்புக்கு வருவார்கள் என்று ஜனாதிபதியோ, பாதுகாப்புத் தரப்பினரோ நினைக்கவில்லை.  ஜூலை 09 போராட்டம் தொடர்பான பல அறிக்கைகளை, வெள்ளிக்கிழமைக்குள் தனக்கு சமர்ப்பிக்க ஜனாதிபதி உத்தரவிட்டிருந்தார்.

முதல் அறிக்கையில் 7,000 முதல் 10,000 பேர் வரை போராட்டத்தில் கலந்து கொள்ள கொழும்புக்கு வருவார்கள் என்று குறிப்பிடப்பட்டிருந்தது, மேலும் அவர்கள் கொழும்புக்கு வந்த பிறகு என்ன செய்வார்கள் என்று சில அனுமானங்கள் செய்யப்பட்டன.

ஆனால், அது போதாதென்று, சனிக்கிழமை போராட்டம் குறித்து மற்றுமொரு அறிக்கையை ஜனாதிபதி கோரியிருந்தார்.

அந்த அறிக்கையில், 7000 முதல் 10000 பேர் வரை கொழும்புக்கு வருவார்கள் என தெரிவிக்கப்பட்டிருந்தது. அதன்படி, சனிக்கிழமை நிலைமையை எதிர்கொள்ள பாதுகாப்பு திட்டம் தயாரிக்கப்பட்டு, அதற்கு ஏற்றாற்போல் இராணுவம், பொலிசார் வரவழைக்கப்பட்டு, நகரின் பாதுகாப்பு பலப்படுத்தப்பட்டு, ஜனாதிபதி இல்லத்தின் பாதுகாப்பு பலப்படுத்தப்பட்டு, வீதித் தடைகள் போடப்பட்டன. வெள்ளிக்கிழமை (08) இரவுக்குள் அந்தக் கடமைகள் அனைத்தையும் முடிப்பதற்கு பாதுகாப்பு தரப்பினர் நடவடிக்கை எடுத்திருந்தனர்.

எவ்வாறாயினும், ஜனாதிபதி மாளிகையில் இருந்து ஜனாதிபதியை வெளியேற்றும் அபாயம் எதுவும் இந்த அறிக்கைகளில் காணப்படாததால், ஜனாதிபதியை ஜனாதிபதி மாளிகையிலேயே தங்க வைக்க பாதுகாப்பு தரப்பினர் நடவடிக்கை எடுத்துள்ளனர்.

ஜனாதிபதி மாளிகையில் இருந்து ஜனாதிபதியை வெளியேற்றும் அளவுக்கு ஆபத்து இருக்காது என்பது அவர்களின் மதிப்பீடாக இருந்தது. எவ்வாறாயினும், ஜனாதிபதிக்கு பாதுகாப்பு அபாயம் ஏற்பட்டால், ஜனாதிபதி மாளிகையில் இருந்து அவரை இரகசியமாக வெளியேற்றும் பாதுகாப்புத் திட்டமும் இங்கு காணப்பட்டது.

தப்பியோடிய ஜனாதிபதி

சனிக்கிழமை காலை பாதுகாப்புப் படையினர் நிலவரத்தை மறுபரிசீலனை செய்த போது, அவர்களிற்கு அதிர்ச்சி காத்திருந்தது. நாடு முழுவதிலுமிருந்து கிடைத்த தகவலின்படி, காலை 8.00 -8.45 மணிக்குள் சில இலட்சம் மக்கள் கொழும்பு செல்வதற்கான பயணத்தைத் தொடங்கிவிட்டனர்  என்பது தெரிய வந்தது.

வெள்ளிக்கிழமைக்கு மன்னர் கிடைத்த புலனாய்வு அறிக்கைகளில், இந்த எண்ணிக்கை 7000 முதல் 10000 வரை இருக்கும் என்று கருதப்பட்டது, ஆனால் சனிக்கிழமை காலை 9 மணிக்கு, பாதுகாப்புப் படையினருக்கு கிடைத்த தகவலின் மூலம், இந்த எண்ணிக்கை சில இலட்சங்களை தாண்டும் என்பது உறுதி செய்யப்பட்டது.

அவ்வாறு வரும் மக்கள் ஜனாதிபதி மாளிகையை நோக்கித் திரும்பினால், பாதுகாப்புப் படையினரின் எண்ணிக்கையும், போடப்பட்ட வீதித் தடைகளும் ஜனாதிபதியின் பாதுகாப்பிற்கு எவ்வாறாயினும் பொருந்தாது என்பது அவர்களின் கருத்து. இதன்படி, சனிக்கிழமை காலை 9 மணியளவில் ஜனாதிபதியின் பாதுகாப்புக் குழு ஜனாதிபதியின் பாதுகாப்பை உறுதிப்படுத்தும் திட்டத்தை நடைமுறைப்படுத்த நடவடிக்கை எடுத்தது.

துறைமுகத்திற்கு செல்லும் சுரங்கப்பாதை

திடீரென இவ்வாறான அச்சுறுத்தல்ஏற்பட்டால் ஜனாதிபதி மாளிகைக்கு தெற்கே அமைந்துள்ள கொழும்பு துறைமுகத்தின் ஊடாக ஜனாதிபதியை மிக இரகசியமாக வெளியேற்றுவதற்கு பாதுகாப்பு தரப்பினர் முன்னர் திட்டமிட்டிருந்தனர்.

அதன்படி, ஜனாதிபதியை மீட்பதற்கான பாதுகாப்புத் திட்டத்தை முன்னெடுத்த பாதுகாப்புப் படையினர் முதலில் சனிக்கிழமை காலை 9 மணிக்குள் துறைமுகத்தின் 9 கதவுகளையும் சீல் வைத்து மூட நடவடிக்கை எடுத்தனர்.

அதன் பின்னர் ஜனாதிபதி மற்றும் ஜனாதிபதியின் மனைவி அயோமா ராஜபக்ஷவை ஜனாதிபதி மாளிகையில் இருந்து பாதுகாப்பு படையினருக்கு மட்டுமே தெரிந்த சுரங்கப்பாதை வழியாக துறைமுகத்திற்கு அழைத்துச் செல்ல திட்டமிட்டிருந்தனர். இந்த சுரங்கப்பாதை மிகவும் பழமையானது, 75 முதல் 100 மீட்டர் நீளம் கொண்டது, இது ஜனாதிபதி மாளிகையில் இருந்து தரைக்கு அடியில் உள்ள துறைமுகத்தில் உள்ள பழைய கட்டிடம் வரை செல்கிறது.

அதன்படி, காலை 9.30 மணியளவில் நிலைமை மிகவும் மோசமாக மாறும் என்பதற்கான அறிகுறிகள் தென்பட்டதால், உடனடியாக ஜனாதிபதி மற்றும் அவரது மனைவியை இந்த சுரங்கப்பாதை வழியாக அழைத்துச் சென்று  கொழும்பு துறைமுகத்தில் நிறுத்தி வைக்கப்பட்டிருந்த கடற்படைக்கு சொந்தமான கப்பலில் தங்க வைக்க பாதுகாப்பு தரப்பினர் நடவடிக்கை எடுத்தனர்.

கொழும்பில் கூடும் மக்கள் கலைந்து சென்ற பின்னர் நிலைமை சுமுகமாக இருக்கும் என்பதால் ஜனாதிபதியையும் அவரது மனைவியையும் சுரங்கப்பாதை ஊடாக ஜனாதிபதி மாளிகைக்கு அழைத்து வருவதே பாதுகாப்பு தரப்பினரின் திட்டமாகும். அதன் காரணமாக ஜனாதிபதி மற்றும் அவரது மனைவிக்கு தேவையான மேலதிக ஆடைகளை எடுத்துச் செல்ல அவர்கள் ஏற்பாடு செய்யவில்லை.

நீர்கொழும்பு கடலுக்கு கொண்டு செல்லப்படும்! இரவெல்லாம் கப்பலின் உள்ளே!

ஆனால் காலை 10 மணியளவில் நிலைமை விபரீதமானது. கொழும்பு வந்த ஆர்ப்பாட்டக்காரர்கள் ஜனாதிபதி மாளிகையை நோக்கித் திரும்புகிறார்கள் என்பது பாதுகாப்பு தரப்பினருக்கு தெரிந்தது.

அதன்படி, ஜனாதிபதி மாளிகை நோக்கிச் செல்லும் சைத்தம் வீதி மற்றும் இலங்கை வங்கி அவென்யூவை முற்றாக முடக்கிய போராட்டக்காரர்கள், வீதித் தடைகளை ஒவ்வொன்றாகக் கவிழ்த்துக்கொண்டு ஜனாதிபதி மாளிகைக்குள் நுழையத் திட்டமிட்டுள்ளனர் என்பதை பாதுகாப்புப் படையினருக்கு உணர அதிக நேரம் எடுக்கவில்லை.

இதேவேளை, ஜனாதிபதி மற்றும் அவரது மனைவிக்கு தேவையான அனைத்து ஆடைகள் மற்றும் அத்தியாவசிய பொருட்களை பல பெரிய சூட்கேஸ்களில் சுரங்கப்பாதை வழியாக துறைமுகத்தில் நிறுத்தி வைக்கப்பட்டிருந்த கப்பலுக்கு எடுத்துச் செல்ல பாதுகாப்பு தரப்பினர் உடனடியாக நடவடிக்கை எடுத்துள்ளனர்.

அதன் பின்னர் கடற்படைக்கு சொந்தமான இரண்டு டோரா கப்பல்களின் பாதுகாப்பில் ஜனாதிபதி மற்றும் அவரது மனைவி பயணித்த கப்பல் நீர்கொழும்பு கடல் எல்லையை நோக்கி கொண்டு செல்லப்பட்டு இலங்கைக்கு சொந்தமான கடற்பரப்பில் பாதுகாப்பாக நங்கூரமிடப்பட்டுள்ளது.

அரசியல் மாற்றம்

சனிக்கிழமை பிற்பகலில், ஜனாதிபதி மாளிகையைச் சுற்றியுள்ள பகுதிகள் போர்க்களமாக மாறியது. மக்கள் ஜனாதிபதி மாளிகையைச் சுற்றியிருந்த வீதித் தடைகளை ஒவ்வொன்றாகப் புரட்டிப் போட்டபடி முன்னேறியபோது பாதுகாப்புப் படையினர் அவர்கள் மீது கண்ணீர்ப்புகை மற்றும் நீர்த்தாரை பிரயோகம் மேற்கொண்டிருந்தனர்.

இறுதியாக, மக்கள் அனைத்து வீதித் தடைகளையும் உடைத்துக்கொண்டு ஜனாதிபதி மாளிகையின் கடைசி வாயிலை அடைந்ததை அடுத்து, படையினர் வானத்தை நோக்கி சுட்டு மக்கள் போராட்டத்தை அடக்க கடைசி முயற்சியில் ஈடுபட்டாலும், எதற்கும் அஞ்சாத மக்கள் படை, அனைத்து சோதனைச்சாவடிகளையும் உடைத்து வரலாற்று சிறப்பு மிக்க வெற்றியை பெற்றனர்.

ஜனாதிபதி மாளிகை கைப்பற்றப்பட்ட போதும்,  ஜனாதிபதி பற்றிய தகவல்கள்  அனைவருக்கும் புரியாத புதிராகவே இருந்தது.

ஜனாதிபதி உடனடியாக பதவிவிலக வேண்டும், அப்படி நடந்தால் மட்டுமே ஜனாதிபதி மாளிகையை விட்டு வெளியேறுவோம் என போராட்டக்காரர்கள் அறிவித்திருந்தனர்.

கடல் வழியாக இந்தியா சென்றாரா? ஜெட் விமானத்துடன் விமானத்தில் ஏறினாரா?

ஜனாதிபதியின் பதிலுக்காக அனைவரும் காத்திருந்தனர். ஆனால் ஜனாதிபதி எங்கே இருக்கிறார், ஜனாதிபதி என்ன செய்ய நினைக்கிறார் என்பதை எவராலும் புரிந்து கொள்ள முடியாத நிலை ஏற்பட்டது. அரசாங்கத்தின் சிரேஷ்ட அமைச்சர்கள் கூட ஜனாதிபதியை தொடர்பு கொள்ள முடியாத நிலையில் சிலர் ஜனாதிபதி தொடர்பில் வினவிய போது அவர்களுக்கும் தகவல் கிடைக்கவில்லை.

சனிக்கிழமை பிற்பகல் சமூக வலைதளங்களில், பாதுகாப்புப் படையினருடன் ட்ரக் வண்டியொன்று கட்டுநாயக்க நெடுஞ்சாலையில் வந்து விமான நிலைய வளாகத்தை வந்தடைந்த வீடியோ பரவியதால், ஜனாதிபதி கண்டிப்பாக இலங்கையை விமானம் மூலம் புறப்பட ஏற்பாடு செய்துவிட்டார் என பலரும் நினைத்தனர்.

இதுதவிர கொழும்பு துறைமுகத்தில் நிறுத்தி வைக்கப்பட்டுள்ள கப்பலில் பாதுகாவலர்கள் நிறைய பொதிகளை ஏற்றிக்கொண்டு செல்வது போன்ற காணொளி சமூக வலைத்தளங்களில் பரவியதால் ஜனாதிபதி கடல் மார்க்கமாக வேறு நாட்டுக்கு தப்பிச் சென்றிருக்கலாம் என சிலர் கருதினர்.

ஆனால் இங்கு நடந்தது இரண்டும் அல்ல, முற்றிலும் மாறுபட்ட சம்பவம்.

வரிசையில் அமைச்சர்கள் இராஜினாமா!

ஜனாதிபதி இவ்வாறு மறைந்திருந்த நிலையில், நாட்டின் அரசியலும் மிகவும் சூடுபிடித்திருந்தது. ஜனாதிபதியின் மறைவையடுத்து பந்துல, தம்மிக்க, ஹரீன், மனுஷ போன்ற அமைச்சரவை அமைச்சர்கள் ஒருவர் பின் ஒருவராக பதவி விலகும் போது அரசாங்கத்தில் பாரிய பிரச்சினை காணப்பட்டது.

பிரதமராக இருந்த ரணில் விக்கிரமசிங்க உடனடியாக கட்சித் தலைவர்களின் கூட்டத்தை நடத்த நடவடிக்கை எடுத்தார். பாதுகாப்புக் காரணங்களுக்காக கட்சித் தலைவர் கூட்டம் நடைபெறும் இடம் குறித்து எந்த தகவலையும் தெரிவிக்கவில்லை.

ஆனால் ஐக்கிய மக்கள் சக்தி மற்றும் ஜேவிபி ஆகிய கட்சிகள் இதில் பங்கேற்பதில்லை என தீர்மானித்ததையடுத்து ரணில் அழைப்பு விடுத்திருந்த கட்சித் தலைவர்களின் கூட்டம் அந்த இடத்திலேயே முடிவடைந்தது.

ரணிலை பிரதமராக நியமிக்க ஜனாதிபதி எடுத்த தீர்மானம் ஏற்றுக்கொள்ள முடியாதது எனவும் ரணில் அழைக்கும் எந்தவொரு கூட்டத்திலும் தாங்கள் பங்கேற்கப் போவதில்லை எனவும் அவர்கள் தெரிவித்திருந்தனர்.

ஆனால் சபாநாயகர் கட்சி தலைவர்கள் கூட்டத்தை அழைத்தால் பங்கேற்க தயாராக உள்ளோம் என்று தெரிவித்தனர்.

இதையடுத்து சபாநாயகர் தனது அதிகாரப்பூர்வ இல்லத்தில் அவசர கட்சித் தலைவர் கூட்டத்தை அழைத்தார்.

நடக்கடலில் கோட்டா!

ஜனாதிபதி தங்கியிருந்த இடம் குறித்த முதல் குறிப்பை சர்வதேச ஊடகங்கள் தெரிவித்தன. கடற்படை கப்பலில் இலங்கைக்கு சொந்தமான கடற்பரப்பில் ஜனாதிபதி பாதுகாப்பாக தங்கியிருப்பதாகவும், பாதுகாப்பு காரணங்களால் குறித்த இடத்தை வெளியிட முடியாது எனவும் கடற்படையின் சில தகவல் மூலங்களை மேற்கோள் காட்டி அவர்கள் செய்தி வெளியிட்டனர்.

அவ்வேளையில், நாட்டில் நிலமை மிகவும் பாரதூரமான நிலைக்கு நகர்ந்து கொண்டிருந்ததால், பிரச்சினைக்கு தீர்வு காணும் வகையில் ஜனாதிபதி உடனடியாக தனது பதவியை இராஜினாமா செய்வதாக அறிவிக்க வேண்டும் என பலரும் கருத்து வெளியிட்டுள்ளனர்.

இதனை எதிர்க்கட்சிகள் அனைத்தும் ஒரே குரலில் தெரிவித்த போது, ​​பொதுஜன பெரமுனவினை பிரதிநிதித்துவப்படுத்தும் டலஸ் அழகப்பெரும உள்ளிட்ட 16 சுயேச்சை எம்.பி.க்கள் ஜனாதிபதியை உடனடியாக பதவி விலகுமாறு ஜனாதிபதிக்கு கடிதம் அனுப்பியுள்ளனர்.

சனிக்கிழமை மாலை கப்பலில் இருந்து சபாநாயகரை அழைத்து அவர் பாதுகாப்பாக இருப்பதாகவும், கட்சித் தலைவர்களின் கூட்டத்தை உடனடியாக அழைத்து அங்கு எடுக்கப்பட்ட தீர்மானத்தை தனக்குத் தெரிவிக்கம் படியும், அதன்படி செயல்படத் தயாராக இருப்பதாகவும் ஜனாதிபதி தெரிவித்தார்.

இதேவேளை ஊடகங்களும் இதனைத் தெரிவித்ததால், சபாநாயகர் தலைமையில் சனிக்கிழமை மாலை ஆரம்பமான கட்சித் தலைவர்கள் கூட்டம் மீது நாட்டின் கவனம் செலுத்தப்பட்டது.

சபாநாயகரின் உத்தியோகபூர்வ இல்லத்தில் கட்சித் தலைவர்கள் கூட்டம் நடைபெற்றது இதில் பல கட்சித் தலைவர்கள் கலந்து கொண்டனர், ஆனால் பாதுகாப்பு காரணங்களுக்காக ஒரு சிலர் ஜூம் தொழில்நுட்பம் மூலம் அதில் இணைந்தனர்.

உடனடியாக பதவி விலகுமாறு ஜனாதிபதிக்கு அறிவிக்குமாறு சபாநாயகரிடம் அனைத்துக் கட்சித் தலைவர்களும் ஏகமனதாக அறிவித்தனர். பிரதமரை பதவி விலகச் சொல்லி ஜனாதிபதி மட்டுமல்ல நாட்டு மக்களும் போராடி வருவதாக கட்சித் தலைவர்கள் கருத்து தெரிவித்தனர்.

ஆரம்பத்தில் ரணில் பல தடவைகள் எதிர்ப்பு தெரிவித்த போதிலும் இறுதியில் அதற்கு சம்மதித்த ரணில், தானும் பிரதமர் பதவியை ராஜினாமா செய்ய தயார் என தெரிவித்துள்ளார்.

இதன்படி ஜனாதிபதி பதவி விலகியதன் பின்னர் சபாநாயகர் பதில் ஜனாதிபதியாகவும், பிரதமர் பதவி விலகியதன் பின்னர் உடனடியாக பாராளுமன்றத்தை கூட்டி பிரதமரை தெரிவு செய்து சர்வகட்சி அரசாங்கம் அமைக்கப்பட வேண்டுமென கட்சித் தலைவர்கள் தீர்மானித்திருந்தனர்.

இந்த இறுதித் தீர்மானத்தை எடுத்த பின்னர் சபாநாயகர் உடனடியாக ஜனாதிபதிக்கு எழுத்துமூலம் அறிவிக்க நடவடிக்கை எடுத்தார். சபாநாயகர் கூறிய முக்கிய தீர்மானங்கள் பின்வருமாறு.

ஜனாதிபதியும் பிரதமரும் கூடிய விரைவில் தமது பதவிகளை ராஜினாமா செய்ய வேண்டும்.
நாடாளுமன்ற ஜனநாயக நடைமுறைகளுக்கு ஏற்பவும், அரசியலமைப்பு ரீதியிலும் அடுத்த கட்டமாக ஏழு நாட்களுக்குள் நாடாளுமன்றத்தை கூட்டி ஒருமித்த கருத்து மூலம் செயல் ஜனாதிபதியை நியமிக்க முடிவு எடுக்க வேண்டும்.
அந்த ஜனாதிபதியின் கீழ் தற்போதைய பாராளுமன்றத்தை பிரதிநிதித்துவப்படுத்தும் சர்வகட்சி பொது பிரதிநிதிகளின் உடன்படிக்கையின் பிரகாரம் புதிய பிரதமர் தலைமையில் இடைக்கால அரசாங்கம் அமைக்கப்படும்.
அதன் பின்னர் குறிப்பிட்ட காலத்திற்குள் தேர்தலை நடத்தி புதிய பாராளுமன்றத்தை தெரிவு செய்வதற்கான வாய்ப்பை மக்களுக்கு வழங்குதல்.

இதேவேளை, மேலும் மூன்று மாற்று முன்மொழிவுகளையும் பிரதமர் முன்வைத்தார்.

ஜனாதிபதி உடனடியாக ராஜினாமா செய்து பிரதமரை தற்காலிக ஜனாதிபதியாக நியமிக்க வேண்டும்.
இதன்மூலம் அனைத்து கட்சிகளும் ஒன்றிணைந்து புதிய பிரதமர் தலைமையில் இடைக்கால அரசு அமைக்கப்படும்.
ஜனாதிபதி மற்றும் பிரதமர் இருவரும் பதவி விலகி, பாராளுமன்றத்தின் பிரதிநிதிகளை செயற்குழு ஜனாதிபதியாக நியமித்தால், அனைத்துக் கட்சிகளின் இணக்கப்பாட்டின் மூலம் புதிய பிரதமரை நியமித்து, ஒரு குறிப்பிட்ட காலத்திற்குள் இடைக்கால அரசாங்கத்தை அமைத்து புதிய அரசாங்கம் அமைய வாய்ப்பளிக்க வேண்டும்.

எனினும், கட்சித் தலைவர்கள் கூட்டத்தில் பிரதமர் பதவியில் இருந்து விலகுவதாக ரணில் அறிவித்த  போதிலும், பின்னர் பிரதமரின் ஊடகப் பிரிவு சற்று வித்தியாசமான அறிவித்தலை வெளியிட்டது. சர்வகட்சி அரசாங்கத்தை உருவாக்கி அதன் பிரதமரை நியமித்ததன் பின்னர் ரணில் விக்கிரமசிங்க பிரதமர் பதவியில் இருந்து விலக தீர்மானித்துள்ளதாக அதில் தெரிவிக்கப்பட்டுள்ளது.

சபாநாயகரின் கடிதம் ஜனாதிபதிக்கு அனுப்பப்பட்டதையடுத்து, நாடு முழுவதும் எதிர்பார்த்திருந்த ஜனாதிபதியின் பதில் ஒரு நொடியில் கிடைத்துள்ளது. கட்சித் தலைவரின் முடிவின்படி ஜூலை 13ஆம் திகதி ஜனாதிபதி பதவியை ராஜினாமா செய்ய முடிவு செய்துள்ளதாக தெரிவித்துள்ளார்.

ஜனாதிபதியின் இந்த முடிவால் நாடு சற்றே அமைதியடைந்தாலும், ஜனாதிபதியின் பாதுகாப்பை எவ்வாறு உறுதிப்படுத்துவது, ஜனாதிபதி எங்கே தங்க வைக்கப்படுவார், ஜனாதிபதியின் அடுத்த திட்டம் என்ன என்பதுதான் பாதுகாப்பு தரப்பினருக்கு எழுந்த அடுத்த பலமான பிரச்சினை.

கடலில் இருந்து நிலத்திற்கு அழைத்து வரப்பட்ட கோட்டா!

இதேவேளை, நீர்கொழும்பு கடற்பரப்பில் ஒரு நாள் முழுவதையும் கழித்த பாதுகாப்பு தரப்பினர் ஜனாதிபதியை கொழும்பு துறைமுகத்தில் உள்ள பாதுகாப்பான இடத்திற்கு ஞாயிற்றுக்கிழமை அழைத்து வர நடவடிக்கை எடுத்துள்ளனர்.

இதற்கிடையில், எதிர்க்கட்சித் தலைவர் சஜித், சபாநாயகர் மற்றும் அவருக்கு விசுவாசமான அமைச்சர்கள் பலருக்கு மூன்றாம் தரப்பினர் மூலம் பல செய்திகளை அனுப்ப ஜனாதிபதி நடவடிக்கை எடுத்தார்.

எதிர்க்கட்சித் தலைவர் சஜித்துக்கு அனுப்பப்பட்ட முதல் செய்தியில், தான் ஜனாதிபதியாக நீடிக்க விரும்புவதாகவும், 19வது திருத்தத்தை அமுல்படுத்தி நிறைவேற்று அதிகாரங்களை பிரதமர் தலைமையிலான பாராளுமன்றத்திற்கு வழங்குவேன், பிரதமர் பதவியை ஏற்றுக்கொள்கிறீர்களா என கேட்டிருந்தார்.

அமைச்சராகவும், பெயரளவுக்கு ஜனாதிபதி பதவியில் இருக்க அவருக்கு வாய்ப்பளிக்கவும் கோரியிருந்தார்.

ஆனால் சஜித் ஜனாதிபதியின் யோசனைய முற்றாக நிராகரித்து விட்டார். மக்களால் நிராகரிக்கப்பட்ட ஜனாதிபதியின் கீழ் பிரதமராக பதவிப் பிரமாணம் செய்ய தயாராக இல்லை என சஜித் ஜனாதிபதிக்கு செய்தியொன்றை விடுத்துள்ளார்.

சஜித்துக்கு அனுப்பப்பட்ட இரண்டாவது செய்தி!

அதனையடுத்து மீண்டும் சஜித்துக்கு வேறு தரப்பினரின் ஊடாக இன்னொரு செய்தியை ஜனாதிபதி அனுப்பினார்.

சஜித்தை பிரதமராக்கியதன் பின்னர் ஜனாதிபதி பதவியில் இருந்து விலகத் தயார் எனவும், ஆனால் அதன் பின்னர் தானும் தனது குடும்பமும் நாட்டில் பாதுகாப்பாக வாழ்வதற்கான சூழலை ஏற்படுத்திக் கொடுக்க வேண்டும் என கேட்டிருந்தார். அதாவது, தனது பாதுகாப்பிற்கு உத்தரவாதம் தர வேண்டுமென கேட்டிருந்தார்.

செய்தியை கொண்டு வந்த நபரிடம் சஜித் அளித்த பதில்- முன்னாள் ஜனாதிபதி ஒருவருக்கு அரசியலமைப்புப் பாதுகாப்பை வழங்குவதில் தனக்கு எந்தப் பிரச்சினையும் இல்லையென்றாலும்,  அதைத் தாண்டிச் சென்று ஜனாதிபதியைப் பாதுகாப்பதற்காக வழக்குகளில் இருந்தோ அல்லது வேறு எந்த சட்ட விஷயங்களிலோ இருந்தோ பாதுகாப்பதற்கான உத்தரவாதத்தை வழங்க முடியாது என்று அவர் கூறினார்.

கோட்டாவை கைகழுவிய அமெரிக்கா!