உலக டெஸ்ட் சாம்பியன்ஷிப் இறுதிப் போட்டியில் பங்கேற்கும் இந்திய அணியில் இந்த 5 பௌலர்கள் இடம்பெற வேண்டும் என ஆஷஸ் நெஹ்ரா தெரிவித்துள்ளார்.
இந்தியா, நியூசிலாந்து பங்கேற்கும் உலக டெஸ்ட் சாம்பியன்ஷிப் தொடரின் இறுதிப் போட்டி வருகிற ஜூன் 18 முதல் 22ஆம் தேதிவரை இங்கிலாந்தில் நடைபெறவுள்ளது. இதில் பங்கேற்கும் இந்திய அணி என்னென்ன யுக்திகளைக் கையாண்டால் வெற்றிபெறும் என்பது குறித்து கிரிக்கெட் விமர்சகர்கள், முன்னாள் வீரர்கள் பேட்டி கொடுத்து வருகின்றனர்.
பல கிரிக்கெட் விமர்சகர்கள் வெளியிட்டுள்ள கணிப்பில் இந்திய அணிதான் வெற்றிபெறும் எனத் தெரிவிக்கப்பட்டுள்ளது. ஆனால், மைக்கேல் வான் போன்ற முக்கியமான விமர்சகர்கள் நியூசிலாந்து அணிதான் வெற்றிபெறும் எனத் தெரிவித்துள்ளனர். காரணம், நியூசிலாந்து அணி டெஸ்ட் சாம்பியன்ஷிப் தொடரின் இறுதிப் போட்டியில் பங்கேற்பதற்கு முன்பு இங்கிலாந்து சுற்றுப் பயணம் மேற்கொண்டு இரண்டு டெஸ்ட் போட்டிகளில் பங்கேற்கவுள்ளது இதனால், நியூசிலாந்து அணிக்குக் காலநிலை பழக்கப்பட்டுவிடும். சிரமமின்றி விளையாடுவார்கள் எனக் கூறுகின்றனர்.
இந்நிலையில் தற்போது பத்திரிகை ஒன்றுக்குப் பேட்டிகொடுத்துள்ள இந்திய அணி முன்னாள் வீரர் ஆஷிஸ் நெஹ்ரா, இந்திய அணி வெற்றிபெற வேண்டும் என்றால் முக்கியமான 5 பௌலர்களுக்கு வாய்ப்பு கொடுக்க வேண்டும் எனத் தெரிவித்துள்ளார்.
“இந்தியா, நியூசிலாந்து இரண்டு அணிகளிலும் சிறந்த பௌலர்கள் இருக்கிறார்கள். இருப்பினும், இந்திய அணியின் ஜஸ்பரீம் பும்ரா, முகமது ஷமி ஆகியோர் பேட்ஸ்மேனுக்கு சாதகமான தட்டையான மைதானத்திலும் சிறப்பாக பந்துவீசக் கூடியவர்கள். இஷாந்த் ஷர்மாவும்தான். இவர் அதிக டெஸ்ட்களில் விளையாடியுள்ளார். இவரின் அனுபவம் அணிக்குக் கைகொடுக்கும்” என்றார்.
மேலும் பேசிய நெஹ்ரா, “கூடுதலாக ஒரு வேகப்பந்து வீச்சாளரைச் சேர்க்க வேண்டும் என்றால் முகமது சிராஜை சேர்க்கலாம். இல்லையென்றால் பும்ரா, ஷமி, இஷாந்த் இந்த மூன்று வேகப்பந்து வீச்சாளர்கள் போதும். அதேபோல், ஸ்பின்னர்களில் ரவிச்சந்திரன் அஸ்வின், ரவீந்திர ஜடேஜா இருவர் களமிறங்க வேண்டும். பௌலிங் பிட்ச் பசுமையாக இருந்தால், ஒரு ஸ்பின்னரை குறைத்துவிட்டு, கூடுதல் வேகப்பந்துவீச்சாளருடன் களமிறங்க வேண்டும் எனத் தெரிவித்தார்.
