தடுப்பூசி பயன்பாட்டை விரைவுபடுத்தாவிடில் ஏற்படும் சிக்கல் சற்றே கலக்கத்தை ஏற்படுத்துகிறது.
இந்தியாவில் கொரோனா வைரஸ் பரவலைக் கட்டுப்படுத்த தடுப்பூசி பயன்பாடு ஊக்குவிக்கப்பட்டு வருகிறது. இதற்காக பதிவு செய்து கொள்ளும் நபர்கள் மற்றும் தடுப்பூசி போட்டுக் கொள்ளும் நபர்களுக்கு இடையிலான வித்தியாசம் நாளுக்கு நாள் அதிகரித்துக் கொண்டே செல்கிறது. கடந்த மே 1 முதல் 7ஆம் தேதி வரையிலான காலகட்டத்தில் Co-Win மூலம் 2.42 கோடி பேர் பதிவு செய்து கொண்டனர்.
தற்போது இந்த எண்ணிக்கை 19 கோடியை தாண்டிவிட்டது. ஆனால் மே 1 முதல் 7ஆம் தேதி வரை முதல் மற்றும் இரண்டாம் டோஸ் தடுப்பூசி போட்டுக் கொண்டவர்கள் நாளொன்றுக்கு 16.6 லட்சம் பேர் ஆவர். அதுவே ஏப்ரல் மாதத் தொடக்கத்தில் இந்த எண்ணிக்கை 40 லட்சத்திற்கும் மேல் இருந்தது குறிப்பிடத்தக்கது. எனவே படிப்படியாக குறைந்து கொண்டே செல்வதைக் காண முடிகிறது.
தற்போதைய சூழலில் ஒன்லைன் வாயிலாக பதிவு செய்து கொண்டவர்களுக்கு தடுப்பூசி போட்டு முடிப்பதற்கு குறைந்தது மூன்று மாதங்கள் ஆகும் என்று கூறப்படுகிறது. இந்தியாவின் மொத்த மக்கள்தொகையில் 45 வயதுக்கு மேற்பட்டவர்கள் மட்டும் 34 கோடி பேர். மே ஒன்றாம் தேதி முதல் 18 முதல் 44 வயது வரையிலான நபர்கள் தடுப்பூசி போட்டுக் கொள்ளலாம் என்று மத்திய அரசு அறிவித்த போது,
45 வயதுக்கு மேற்பட்ட நபர்களில் மூன்றில் ஒருபங்கு பேருக்கு மட்டுமே தடுப்பூசி போடப்பட்டிருந்தது. இந்நிலையில் மத்திய அரசின் அறிவிப்பிற்கு பின்னர் தடுப்பூசி செலுத்த வேண்டிய இலக்கு 60 கோடியை தாண்டிவிட்டது. தற்போது நாளொன்றுக்கு 17 லட்சம் பேருக்கு மட்டுமே தடுப்பூசி போடப்பட்டு வருகிறது. ஒட்டுமொத்தமாக 94 கோடி இளைஞர்களுக்கு 170 கோடி தடுப்பூசி டோஸ்கள் தேவைப்படுகின்றன.
இவற்றை போட்டு முடிப்பதற்கு சுமார் 1,000 நாட்கள் என்று கணக்கிடப்பட்டுள்ளது. அதாவது மூன்று வருடங்கள் ஆகும். இன்னும் இத்தனை வருடங்கள் இருப்பதால் அதற்குள் கொரோனாவின் வீரியமும், உருமாற்றமும் மாறுபடக் கூடும். அதுவரை பொதுமக்கள் மிகுந்த எச்சரிக்கையாக இருக்க வேண்டியது அவசியம்.
