கொரோனாவால் பாதிக்கப்பட்ட இளம்பெண் ஒருவரை காப்பாற்றுவதற்காக விமான ஆம்புலன்ஸ் ஏற்பாடு செய்து கொடுத்துள்ளார் சோனு சூட்.
கொரோனா முதல் அலையின் போது புலம் பெயர் தொழிலாளர்கள் சொந்த மாநிலம் திரும்ப உதவிய நடிகர் சோனு சூட், தற்போது இரண்டாம் அலையில் நோயாளிகளுக்கு படுக்கை வசதிகளும், ஆக்சிஜன் சிலிண்டரும் ஏற்பாடு செய்து கொடுத்து கொண்டிருக்கிறார். இந்நிலையில் கொரோனாவால் பாதிக்கப்பட்ட நபரை காப்பாற்றுவதற்காக, சோனு சூட் விமான ஆம்புலன்ஸ் ஏற்பாடு செய்த சம்பவம் இணையதளங்களில் வைரலாகி வருகிறது
உ.பி. மாநிலம் ஜான்ஸியை சேர்ந்த கைலாஷ் அகர்வால் என்பவருக்கு கொரோனா தொற்று ஏற்பட்டு உடல்நிலை கடுமையாக பாதிக்கப்பட்டிருந்தது. உள்ளூர் மருத்துவமனையில் அவருக்கு சிகிச்சை அளிக்க இயலாது என்றும் வேறு பெரிய மருத்துவமனைக்கு கொண்டு செல்லுமாறு அறிவுறுத்தியுள்ளனர் மருத்துவர்கள். அதனை தொடர்ந்து எங்கு தேடியும் அவருக்கு மருத்துவமனையில் இடம் கிடைக்கவில்லை.
இதனை அடுத்து அவரின் குடும்பத்தினர் ட்விட்டர் வாயிலாக நடிகர் சோனு சூட்டிடம் நிலைமை எடுத்துரைத்து, உதவி கேட்டுள்ளனர். அவர்களின் பதிவை பார்த்த சோனு சூட் உடனடியாக ஹைதரபாத் அப்போலோ மருத்துவமனையை தொடர்பு கொண்டு அங்கு வெண்டிலேட்டர் வசதியுடன் கூடிய படுக்கை இருப்பதை உறுதி செய்தார்.
ஆனால் நோயாளி உள்ள ஜான்ஸியில் விமான நிலையம் இல்லாததால் சோனு சூட்டின் உதவி குழுவினர் கைலாஷ் அகர்வாலை மத்திய பிரதேச மாநிலம் க்வாலியர் நகருக்கு ஆம்புலன்ஸில் அழைத்து வந்தனர். பின்னர் அங்கிருந்து அவர் ஆம்புலன்ஸ் விமானம் மூலம் ஹைதராபாத் அப்போலோ மருத்துவமனைக்கு அழைத்துச் செல்லப்பட்டார். அங்கு அவருக்கு தீவிர சிகிச்சை அளிக்கப்பட்டு வருகிறது
இதனை அடுத்து அந்த பெண்ணின் உறவினர்கள் சோனு சூட் அவர்களுக்கு தங்களது நன்றியை தெரிவித்துள்ளனர். இந்த செய்தி சமூக வலைத்தளங்களில் பரவியதை அடுத்து பலரும் சோனு சூட்டிற்கு வாழ்த்து தெரிவித்து வருகின்றனர். அண்மையில் கொரோனா தொற்றில் இருந்து மீண்ட சோனு சூட், மீண்டும் மக்கள் பணியில் தீவிரமாக இறங்கியுள்ளது குறிப்பிடத்தக்கது.
