விஜய்யின் 66வது படத்தின் அறிவிப்பை, அவரது பிறந்த நாளில் வெளியிட படக்குழு தயாராகி வருகிறது.
‘மாஸ்டர்’ படத்திற்கு பிறகு நடிகர் விஜய் தற்போது நெல்சன் இயக்கத்தில் நடித்து வருகிறார். பெயரிடப்படாத இப்படத்தில் விஜய்க்கு ஜோடியாக பூஜா ஹெக்டே நடிக்கிறார். இந்த படத்தை பிரம்மாண்டமாக தயாரித்து வருகிறது சன் பிக்சர்ஸ். இப்படத்தின் முதற்கட்ட படப்பிடிப்பு ஜார்ஜியாவில் 16 நாட்கள் முடிந்துள்ள நிலையில் அடுத்தக்கட்ட படப்பிடிப்பு சென்னையில் வரும் ஜூலை மாதம் முதல் வாரத்தில் துவங்கவுள்ளது.
இந்த படத்திற்கு பிறகு விஜய் அடுத்து நடிக்கவிருக்கிற படம் குறித்த தகவல் ஏற்கனவே வெளியாகியுள்ளது. விஜய்யின் 66வது படமாக உருவாகும் இந்த படத்தை பிரபல தெலுங்கு இயக்குனர் வம்ஷி படைப்பள்ளி இயக்கவுள்ளார். இவர், தமிழில் கார்த்தியின் நடிப்பில் வெளியான ‘தோழா’, மகேஷ் பாபுவின் ‘மகரிஷி’ உள்ளிட்ட வெற்றிப்படங்களை இயக்கியவர். தமிழ், தெலுங்கில் உருவாகும் இந்த படத்தை தில் ராஜு தயாரிக்கவுள்ளார்.
இந்த படத்தின் ஸ்கிரிப் பணிகளை வேகமாக செய்து வருகிறார் இயக்குனர் வம்சி. இதோடு நடிகர், நடிகைகள் தேர்வும் விரைவில் நடைபெறவுள்ளது. இந்த படத்தின் படப்பிடிப்பை அடுத்த ஜனவரியில் தொடங்க திட்டமிட்டுள்ளார் வம்சி. இந்நிலையில் நடிகர் விஜய்யின் பிறந்தநாள் வரும் ஜூன் 22ம் கொண்டாடப்படுகிறது. இதையொட்டி விஜய்யின் 66வது படத்தின் அறிவிப்பை அதிகாரப்பூர்வமாக வெளியிட படத்தின் தயாரிப்பாளர் தில் ராஜு திட்டமிட்டிருப்பதாக கூறப்படுகிறது. இதனால் விஜய் ரசிகர்கள் மகிழ்ச்சி அடைந்துள்ளனர்.
