இங்கிலாந்து சுற்றுப் பயணத்தில் தனக்கு வாய்ப்பு கிடைப்பது கடினம் என இந்திய அணி வீரர் தெரிவித்துள்ளார்.
இந்தியா, நியூசிலாந்து பங்கேற்கும் உலக டெஸ்ட் சாம்பியன்ஷிப் தொடரின் இறுதிப் போட்டி வருகிற ஜூன் 18 முதல் 22ஆம் தேதிவரை இங்கிலாந்தில் நடைபெறவுள்ளது. இதனைத் தொடர்ந்து ஆகஸ்ட் 4ஆம் தேதி முதல் துவங்கும் இங்கிலாந்துக்கு எதிரான ஐந்து போட்டிகள் கொண்ட டெஸ்ட் தொடரிலும் இந்திய அணி பங்கேற்கவுள்ளது.
இதற்கான இந்திய அணி சமீபத்தில் அறிவிக்கப்பட்டது. 20 ரெகுலர் வீரர்கள், 4 ரிசர்வ் வீரர்கள் இடம்பெற்றுள்ளனர். விக்கெட் கீப்பருக்கான இடத்தில் விருத்திமான் சாஹா, ரிஷப் பந்த் ஆகியோர் உள்ளனர்.
விக்கெட் கீப்பருக்கான இடம்:
6 ஆண்டுகளுக்கு முன்பு இந்திய டெஸ்ட் அணியிலிருந்து மகேந்திரசிங் தோனி ஓய்வுபெற்ற பிறகு, விக்கெட் கீப்பர் பேட்ஸ்மேனுக்கான இடத்திற்கு தினேஷ் கார்த்திக், ரிஷப் பந்த், கே.எல்.ராகுல், விருத்திமான் சாஹா ஆகியொருக்கு இடையில் போட்டி நிலவியது. சாஹா சிறப்பாக பேட்டிங் செய்யக் கூடியவர் என்பதால் இவருக்குத்தான் முன்னுரிமை கொடுக்கப்பட்டது.
சமீபத்தில் நடைபெற்ற ஆஸ்திரேலியாவுக்கு எதிரான டெஸ்ட் தொடரின் முதல் போட்டியில் களமிறங்கிய சாஹா சிறப்பாக சோபிக்கவில்லை. இதனால், ரிஷப் பந்திற்கு சோதனை அடிப்படையில் வாய்ப்பு கொடுக்கப்பட்டது. அவரும் சிறப்பாக விளையாடித் தொடர்ந்து அடுத்தடுத்த டெஸ்ட்களில் இடம்பெற்றார். தற்போது இங்கிலாந்து சுற்றுப் பயணத்திலும் சாஹா, ரிஷப் பந்த் இடம்பெற்றுள்ளனர். இவர்களில் யாருக்கு களமிறங்க வாய்ப்பு கிடைக்கும் என விவாதங்கள் நடைபெற்று வரும் நிலையில், இதுகுறித்து சாஹா சில கருத்துக்களை கூறியுள்ளார்.
பத்திரிகை ஒன்றுக்குப் பேட்டிகொடுத்துள்ள சாஹா, “உலக டெஸ்ட் சாம்பியன்ஷிப் தொடரின் இறுதிக்கட்ட போட்டிகளில் ரிஷப் பந்த் சிறப்பாக விளையாடினார். இதனால், இங்கிலாந்து சுற்றுப் பயணத்தில் அவர்தான் முதல் தேர்வாக இருப்பார். நான் எனக்கான வாய்ப்புக்காகத் தொடர்ந்து காத்திருப்பேன். ஒருவேளை வாய்ப்பு கிடைத்தால் நிச்சயம் சிறப்பாகச் செயல்பட்டு எனது திறமை நிரூபிப்பேன். அந்த ஒரு வாய்ப்புக்காகத்தான் நான் காத்திருக்கிறேன்” எனத் தெரிவித்தார்.
