போர் எட்டு மாதங்களை நெருங்கிக்கொண்டிருக்கும் வேளையிலும், எரிபொருள் விலை உயர்வு அமெரிக்க இடைக்காலத் தேர்தல்களில் தாக்கத்தை ஏற்படுத்தி வரும் நிலையிலும், ஈரானுக்கு எதிராக அமெரிக்கா மற்றொரு இராணுவ நடவடிக்கையை மேற்கொள்ளக்கூடும் என்று அமெரிக்க ஜனாதிபதி டொனால்ட் டிரம்ப் வெள்ளிக்கிழமை தெரிவித்தார்.
“நாம் மற்றொரு சிறிய ‘எபிக் ஃபியூரி’யை (Epic Fury) மேற்கொள்ளக்கூடும்,” என்று புளோரிடாவில் நடந்த ஒரு பேரணியில் போரைப் பற்றிப் பேசியபோது டிரம்ப் கூறினார். அவர் அதுகுறித்து விரிவாகக் கூறவில்லை.
“ஒப்ரேஷன் எபிக் ஃபியூரி” (Operation Epic Fury) என்பது ஈரானுக்கு எதிரான தனது போருக்கு அமெரிக்க இராணுவம் பயன்படுத்தும் பெயராகும்.
வெள்ளிக்கிழமை முன்னதாக, அமெரிக்காவால் போரை விரைவாக முடிவுக்குக் கொண்டுவர முடியும் என்று கூறிய டிரம்ப், வாஷிங்டன் ஒரு விரைவான முடிவை நாட வேண்டுமா அல்லது மோதலைப் படிப்படியாக முடிவுக்கு வர அனுமதிக்க வேண்டுமா என்று கேள்வி எழுப்பினார்.
போருக்கான இலக்குகளையும் காலக்கெடுவையும் மாற்றிவரும் டிரம்ப், காங்கிரஸின் கட்டுப்பாடு யாருக்கு என்பது தீர்மானிக்கப்பட உள்ள இடைக்காலத் தேர்தல்களுக்கு முன்பு ஈரான் மீது அமெரிக்கா தாக்குதல் நடத்தாது என்று இந்த மாத தொடக்கத்தில் கூறியிருந்தார்.
ஈரான் மீதான அமெரிக்க-இஸ்ரேலியத் தாக்குதல்களும், லெபனான் மீதான இஸ்ரேலியத் தாக்குதல்களும் ஆயிரக்கணக்கானோரைக் கொன்று, மில்லியன் கணக்கானோரை இடம்பெயரச் செய்துள்ளன.
