நுவரெலியா மாவட்டத்தில் நிலவும் மோசமான வானிலை காரணமாக, நாளை (25) பாடசாலைகளைத் திறப்பதா இல்லையா என்பதைத் தீர்மானிக்கும் அதிகாரம் பாடசாலை அதிபர்களிடம் வழங்கப்பட்டுள்ளதாகக் கல்வி அதிகாரிகள் தெரிவித்துள்ளனர்.
இதற்கமைய, நுவரெலியா வலயக் கல்வி அலுவலகத்தின் கீழ் உள்ள ஆறு பாடசாலைகளுக்கு நாளை (25) விடுமுறை அளிக்க நடவடிக்கை எடுக்கப்பட்டுள்ளதாக நுவரெலியா வலயக் கல்விப் பணிப்பாளர் டி.எம்.எஸ்.பி. திஸாநாயக்க தெரிவித்தார்.
மேலும், ஏனைய பாடசாலைகளைத் திறப்பது குறித்து நிலவும் வானிலைக்கேற்ப முடிவெடுக்குமாறும், அந்த முடிவை அலுவலகத்திற்குத் தெரிவிக்குமாறும் அதிபர்களுக்கு அறிவுறுத்தியுள்ளதாக வலயக் கல்விப் பணிப்பாளர் குறிப்பிட்டார்.
அத்துடன், ஹட்டன் வலயக் கல்வி அலுவலகப் பகுதியில் இன்று (24) பெய்த கடும் மழை காரணமாக, பாடசாலைகளை வழமைக்கு முன்னதாகவே மூடுவதற்கு கல்வி அதிகாரிகள் நடவடிக்கை எடுத்துள்ளனர்.
இது குறித்து கருத்துத் தெரிவித்த ஹட்டன் வலயக் கல்வி உதவிப் பணிப்பாளர் வசந்த கவிராஜ், நிலவும் வானிலைக்கேற்ப நாளை (25) பாடசாலைகளைத் திறப்பதா இல்லையா என்பதைத் தீர்மானிக்கும் அதிகாரம் பாடசாலை அதிபர்களிடம் ஒப்படைக்கப்பட்டுள்ளதாகத் தெரிவித்தார்.
ஏதேனும் பாடசாலைகள் மூடப்பட முடிவு செய்யப்பட்டால், அது குறித்து தமது அலுவலகத்திற்கு அறிவிக்குமாறும் அவர் மேலும் அறிவுறுத்தினார்.
