யாழ்ப்பாண மாவட்ட நாடாளுமன்ற உறுப்பினர் இராமநாதன் அர்ச்சுனா, “புலி” என்ற சொல்லை அந்த விலங்கைக் குறிக்க மட்டுமே பயன்படுத்தியதாகவும், அச்சொல்லைப் பயன்படுத்துவதன் மூலம் விடுதலைப் புலிகள் அமைப்புக்கு ஆதரவளிக்கும் நோக்கம் எதுவும் தனக்கு இருக்கவில்லை என்றும் தெரிவித்துள்ளார்.
“புலி புலம்பெயர் சமூகம்” (Tiger diaspora) என்பது குறித்து தான் எந்தக் கருத்தையும் வெளியிடவில்லை என்பறு கூறிய அவர், யாராவது தன்னை “நீங்கள் ஒரு புலியா?” என்று கேட்டால் அதை ஏற்றுக்கொள்வதாகவும், புலி தனக்குப் பிடித்த விலங்கு என்றும் குறிப்பிட்டார்.
சிலர் யானைகளையோ அல்லது பாம்புகளையோ விரும்புவதைப் போலவே தானும் புலியை விரும்புவதாகக் கூறிய அர்ச்சுனா, சிங்கள மக்கள் தங்களை “சிங்கங்கள்” என்று அடையாளப்படுத்திக்கொள்வது வழக்கம் என்றும் கூறினார். மேலும், தனது கைபேசியின் பின்னணியில் (wallpaper) புலியின் படத்தை வைத்திருப்பதாகவும் அவர் குறிப்பிட்டார்.
“புலம்பெயர் சமூகம்” (diaspora) குறித்த தனது கருத்துக்கள் வெளிநாடுகளில் வசிக்கும் இலங்கையர்களை—அதாவது தமிழ், சிங்கள மற்றும் முஸ்லிம் சமூகங்கள் அனைவரையும்—குறிப்பதாகவே அமைந்திருந்தன என்று நாடாளுமன்ற உறுப்பினர் கூறினார். தனது அறிக்கையில் “புலி புலம்பெயர் சமூகம்” (Tiger diaspora) என்ற சொல்லைப் பயன்படுத்தவில்லை என்பதையும் அவர் வலியுறுத்தினார்.
நாட்டின் மீள்கட்டமைப்புக்காக வெளிநாடுகளில் வசிக்கும் இலங்கைச் சமூகத்திடமிருந்து நிதியுதவி பெறப்பட்டதை ஏற்றுக்கொள்வதோடு, அதேவேளையில் அந்த நிதிகள் குறித்தும் தான் கேள்விகளை எழுப்பியிருந்ததாக அர்ச்சுனா தெரிவித்தார்.
மீண்டும் ஆயுதம் ஏந்துவதற்கோ அல்லது விடுதலைப் புலிகள் அமைப்புடன் தொடர்புகொள்வதற்கோ தனக்கு எந்தவித நோக்கமும் இல்லை என்றும் அவர் மேலும் கூறினார். களுபோவில மற்றும் பேராதனை உள்ளிட்ட மருத்துவமனைகளில் மருத்துவராகப் பணியாற்றிய காலங்களில், சிங்கள நோயாளிகளுக்கும் தான் சிகிச்சை அளித்துள்ளதாக அவர் குறிப்பிட்டார்.
இதற்கிடையில், அனுராதபுரத்தில் நடைபெற்ற இலங்கை பொதுஜன பெரமுன பேரணியில் அவர் ஆற்றியதாகக் கூறப்படும் கருத்துக்களின் அடிப்படையில், விடுதலைப் புலிகள் அமைப்பை ஊக்குவித்ததாக எழுந்த புகாரைத் தொடர்ந்து, இது குறித்த விசாரணையை பயங்கரவாதத் தடுப்புப் பிரிவிடம் ஒப்படைத்துள்ளதாகக் காவல்துறை தெரிவித்துள்ளது.
விசாரணைக்கு உட்படுத்தப்படுவதையோ அல்லது கைது செய்யப்படுவதையோ கண்டு தான் அஞ்சவில்லை என்றும், தேவைப்பட்டால் விசாரணை அதிகாரிகளின் முன் ஆஜராகத் தயாராக இருப்பதாகவும் அர்ச்சுனா தெரிவித்துள்ளார். மேலும், சிறிய அளவிலான சம்பவங்களில் கவனம் செலுத்துவதற்குப் பதிலாக, நாட்டில் நடைபெறும் பாரிய மோசடிகள் மற்றும் ஊழல்கள் தொடர்பான சட்டத்தை நடைமுறைப்படுத்துமாறு ஜனாதிபதி அனுர குமார திஸாநாயக்கவை அவர் கூறினார்.
தற்போதைய அரசாங்கத்தை ஆட்சிக்குக் கொண்டுவருவதற்காகப் பொதுமக்களிடம் வாக்குக் கோரியிருந்த நிலையில், தற்போதைய சூழலைக் கருத்தில் கொள்ளும்போது, அவ்வாறு கோரிக்கை விடுத்ததற்காகத் தான் இப்போது மிகுந்த ஏமாற்றமும் அவமானமும் அடைவதாகவும் அர்ச்சுனா மேலும் குறிப்பிட்டார்.
