காலி முகத்திடல் கோட்டா கோ கிராமத்தில் போராட்டத்தில் ஈடுபட்டிருந்த பிரித்தானிய பெண்ணான கெலிக் பிரேசரின் விசாவை ரத்து செய்து குடிவரவு குடியகல்வு கட்டுப்பாட்டாளர் பிறப்பித்த உத்தரவை ரத்து செய்ய உத்தரவிடுமாறு, அவர் தாக்கல் செய்த மேல்முறையீட்டு மனுவை தள்ளுபடி செய்த உயர்நீதிமன்றம், அவர் நாட்டை விட்டு வெளியேற வேண்டும் என்றும், நீதிமன்ற கட்டணமாக ரூ.250000 செலுத்த வேண்டும் என்று உத்தரவிட்டது.
நீதிபதிகள் மஹிந்த சமயவர்தன மற்றும் ஷிரான் குணரத்ன ஆகியோரின் இணக்கப்பாட்டுடன் உயர் நீதிமன்ற நீதிபதி காமினி அமரசேகர இந்த தீர்ப்பை அறிவித்தார்.
நீதிமன்றத்தில் தாக்கல் செய்யப்பட்ட மனுவில், குடிவரவு மற்றும் குடியகல்வுத் திணைக்களம் குடிவரவு வீசாவில் நாட்டில் தங்கியிருந்த போது வழங்கப்பட்ட விசாக்களை ரத்து செய்து 2022 ஓகஸ்ட் 15 ஆம் திகதிக்கு முன்னர் நாட்டை விட்டு வெளியேறுமாறு உத்தரவிட்டதாக மனுதாரர் குறிப்பிட்டுள்ளார்.
அதன் பின்னர், குடிவரவு மற்றும் குடியகல்வு கட்டுப்பாட்டாளரின் தீர்மானத்தை எதிர்த்து மேன்முறையீட்டு நீதிமன்றத்தில் மனுதாரர் தாக்கல் செய்த ரிட் மனுவை பரிசீலித்த மேன்முறையீட்டு நீதிமன்றம் அதனை நிராகரித்தது.
அதன்பிறகு, மேன்முறையீட்டு நீதிமன்றத்தின் உத்தரவு சட்டத்துக்கு எதிரானது என்றும், அதை செல்லாது என்று உத்தரவு பிறப்பிக்கக் கோரியும் தனது சட்டத்தரணிகள் மூலம் உயர் நீதிமன்றத்தில் மேல்முறையீட்டு மனு தாக்கல் செய்தார்.
மேன்முறையீட்டு மனு மீதான விசாரணையில் சட்டமா அதிபர் சார்பில் ஆஜரான பிரதி சொலிசிட்டர் ஜெனரல் கனிஷ்க டி சில்வா, பூர்வாங்க ஆட்சேபனைகளை முன்வைத்து, உரிய மேன்முறையீட்டு மனுவை நிராகரிக்குமாறு கோரிக்கை விடுத்தார்.
இந்த மனுவை விசாரிக்க நீதிமன்றத்திற்கு அதிகாரம் இல்லை எனவும், மனுதாரர் பொய்யான உண்மைகளை நீதிமன்றத்தில் சமர்ப்பித்துள்ளதாகவும், அவர் சமர்ப்பித்த வாக்குமூலம் சட்டத்திற்கு அமைய சமர்ப்பிக்கப்படவில்லை எனவும் குறிப்பிட்டார்.
முதற்கட்ட ஆட்சேபனைகள் மீது நீண்ட விசாரணை நடத்திய உயர் நீதிமன்றம், அவற்றை ஏற்று, அது தொடர்பான மேல்முறையீட்டு மனுவை தள்ளுபடி செய்ய முடிவு செய்தது.
அதன் பிறகு, மனுதாரர் நீதிமன்றக் கட்டணமாக 250000 ரூபாய் செலுத்த வேண்டும் என உத்தரவிட்டது.
