பொருளாதார அபிவிருத்தி பிரதி அமைச்சர் நிஷாந்த ஜயவீர, மக்கள் வரி செலுத்துவோர் அடையாள எண்ணை (TIN) பெறாமலேயே தமது பொருளாதார நடவடிக்கைகளைத் தொடர்ந்து மேற்கொள்ள முடியும் என்று தெரிவித்தார்.
நாடாளுமன்றத்தில் உரையாற்றிய அவர், மக்கள் சம்பந்தப்பட்ட நிறுவனங்களுக்குச் சென்று, தமது தேசிய அடையாள அட்டையின் நகல், தொலைபேசி இலக்கம் மற்றும் மின்னஞ்சல் முகவரி (இருப்பின்) ஆகியவற்றை வழங்குவதன் மூலம் தமது கொடுக்கல் வாங்கல்களை மேற்கொள்ள முடியும் என்று கூறினார்.
வரி செலுத்துவோர் அடையாள எண்ணைப் (TIN) பெறுவதற்காக மக்கள் அவசரமாக உள்நாட்டு இறைவரித் திணைக்களத்திற்குச் செல்ல வேண்டிய அவசியமில்லை என்று அவர் வலியுறுத்தினார்.
இது குறித்த தெளிவுபடுத்தும் அறிக்கையை உள்நாட்டு இறைவரி ஆணையாளர் நாயகம் விரைவில் வெளியிடுவார் என்றும் பிரதி அமைச்சர் தெரிவித்தார்.
வரி செலுத்துவோர் அடையாள எண்ணைப் (TIN) பெறுவதற்காக பெருமளவிலான மக்கள் உள்நாட்டு இறைவரித் திணைக்களத்தின் தலைமை அலுவலகத்திற்குச் சென்றதால், அங்கு கடும் நெரிசல் ஏற்பட்டது.
