கொழும்பு துறைமுக நகரத் திட்டத்தில் முதலீடு செய்ய வருபவர்களை அச்சுறுத்தி பணம் பறித்தது உள்ளிட்ட பல்வேறு குற்றச் செயல்களில் ஈடுபட்டதாகக் கூறப்படும் சீனக் குற்றக்கும்பல் ஒன்றின் முக்கியத் தலைவர், கொழும்பில் உள்ள மத்திய குற்றப் புலனாய்வுப் பிரிவினரால் கைது செய்யப்பட்டுள்ளார்.
சீனாவில் பல்வேறு குற்றங்களைச் செய்த பிறகு அந்நாட்டுப் பொலிஸாரிடமிருந்து தப்பிப்பதற்காக இரகசியமாக இலங்கைக்கு வந்திருந்த இந்தக் குற்றக்கும்பல் தலைவர், கொழும்பில் உள்ள பல்வேறு ஹோட்டல்களில் தங்கியிருந்து குற்றச் செயல்களில் ஈடுபட்டு வந்தது விசாரணையில் தெரியவந்துள்ளது.
மத்திய குற்றப் புலனாய்வுப் பிரிவினர் பல நாட்கள் மேற்கொண்ட நடவடிக்கையின் மூலம், கொழும்பின் காலி முகத்திடல் பகுதியில் இருந்த குறித்த சீனக் குற்றக்கும்பல் தலைவர் கைது செய்யப்பட்டார். அவர் கைது செய்யப்பட்டபோது, அவரிடமிருந்து வெவ்வேறு நாடுகளைச் சேர்ந்த இரண்டு கடவுச்சீட்டுகள், வேறு ஏழு நபர்களுக்குச் சொந்தமான கடவுச்சீட்டுகள் மற்றும் 42 சிம் (SIM) அட்டைகள் கைப்பற்றப்பட்டன.
சீனத் தூதரகம் ஊடாக இந்தக் குற்றவாளியை இலங்கையிலிருந்து வெளியேற்றுவதற்கான நடவடிக்கைகள் மேற்கொள்ளப்பட்டு வருவதாக விசாரணை அதிகாரிகள் தெரிவித்துள்ளனர்.
கொழும்பு துறைமுக நகரத் திட்டத்தில் முதலீடு செய்ய வரும் சீனப் பிரஜைகளை அச்சுறுத்தி அவர்களிடம் பணம் பறித்ததாகக் கூறப்படும் குற்றச்சாட்டு தொடர்பில் விசாரணைகள் நடைபெற்று வருகின்றன.
