பயங்கரவாதத் தடைச் சட்டத்தின் கீழ் குற்றப் புலனாய்வுத் திணைக்களத்தால் (CID) கைது செய்யப்பட்டு தற்போது விளக்கமறியலில் வைக்கப்பட்டுள்ள கெஹெல்பத்தர பத்மே என்பவரால், போதைப்பொருள் கடத்தல் தொடர்பான குறிப்புகள் எழுதப்பட்டதாகக் கருதப்படும் எட்டு குறிப்பேடுகளை, கையெழுத்துப் பரிசோதனைக்காக அரச பகுப்பாய்வாளரிடம் ஒப்படைக்குமாறு கொழும்பு பிரதம நீதவான் அசங்க எஸ். போதரகம நேற்று (01) உத்தரவிட்டார்.
சந்தேகநபரின் போதைப்பொருள் கடத்தல் வலையமைப்பு தொடர்பான பதிவுகளைக் கொண்டிருக்கலாம் என சந்தேகிக்கப்படும் எட்டு குறிப்பேடுகளை விசாரணையின் போது மீட்டதாக குற்றப் புலனாய்வுத் திணைக்களம் நீதிமன்றத்திற்குத் தெரிவித்தது.
குறிப்பேடுகளில் உள்ள கையெழுத்தை சந்தேகநபரின் கையெழுத்துடன் ஒப்பிட்டுப் பார்ப்பதற்காக, அவற்றை அரச பகுப்பாய்வாளரிடம் ஒப்படைக்குமாறு உத்தரவிடுமாறு விசாரணை அதிகாரிகள் நீதிமன்றத்தைக் கோரினர். பெயர்கள், விவரங்கள் மற்றும் புள்ளிவிவரங்களைக் கொண்ட இக்குறிப்பேடுகளை கையெழுத்துப் பரிசோதனைக்காக அரச பகுப்பாய்வாளரிடம் ஒப்படைக்குமாறு நீதவான் உத்தரவிட்டதுடன், சந்தேகநபரை இம்மாதம் 15 ஆம் திகதி வரை விளக்கமறியலில் வைக்குமாறும் உத்தரவிட்டார்.
