நாடு சார்ந்த மனித உரிமை ஆணைகள் காலவரையின்றி தொடர அனுமதிக்கக் கூடாது என்றும், அவை குறிப்பிட்ட கால இடைவெளிகளில் மீளாய்வு செய்யப்பட வேண்டும் என்றும் ஐக்கிய நாடுகள் மனித உரிமைகள் பேரவையில் இலங்கை வலியுறுத்தியுள்ளது.
ஜெனீவாவில் நடைபெற்ற ஐ.நா. மனித உரிமைகள் பேரவையின் 63ஆவது கூட்டத்தொடரில், நிகழ்ச்சி நிரல் 2 இன் கீழான பொது விவாதத்தில் இலங்கையின் ஜெனீவாவுக்கான நிரந்தரப் பிரதிநிதி தூதுவர் சுமித் தாசநாயக்க இந்தக் கோரிக்கையை முன்வைத்தார்.
ஐ.நா. மனித உரிமைகளுக்கான உயர் ஸ்தானிகர் வோல்கர் துர்க்கை நோக்கி உரையாற்றிய அவர், எந்தவொரு பேரவை ஆணையும் நிரந்தரமானதாகக் கருதப்படக் கூடாது எனத் தெரிவித்தார். குறிப்பாக, நாடு சார்ந்த ஆணைகள் தெளிவான இலக்குகள் மற்றும் அளவிடக்கூடிய பெறுபேறுகளின் அடிப்படையில் அவ்வப்போது மதிப்பாய்வு செய்யப்பட வேண்டும் என அவர் வலியுறுத்தினார்.
மேலும், பொருத்தமான சந்தர்ப்பங்களில் நாடு சார்ந்த தீர்மானங்களில் ‘Sunset Clauses’ மற்றும் ஆணைகளை படிப்படியாக நிறைவு செய்வதற்கான ஏற்பாடுகள் சேர்க்கப்பட வேண்டும் என்றும் இலங்கை தெரிவித்துள்ளது.
தேசிய செயல்முறைகள், பேச்சுவார்த்தை, ஒத்துழைப்பு மற்றும் தொழில்நுட்ப உதவிகளின் மூலம் முன்னேற்றத்தை வெளிப்படுத்தும் நாடுகளுக்கு, சம்பந்தப்பட்ட மனித உரிமை ஆணைகளை நிறைவு செய்வதற்கான தெளிவான பாதை வழங்கப்பட வேண்டும் என்றும் தாசநாயக்க கூறினார்.
மனித உரிமை ஆணைகள் தொடர்வது நிறுவன ரீதியான தொடர்ச்சிக்காக அல்லாமல், தெளிவாக நிரூபிக்கக்கூடிய தேவை மற்றும் பெறுபேறுகளின் அடிப்படையில் மட்டுமே நியாயப்படுத்தப்பட வேண்டும் என்றும் அவர் வலியுறுத்தினார்.
ஒன்றுக்கொன்று ஒத்த அல்லது மேலோட்டமாக இருக்கும் ஆணைகளை ஒருங்கிணைக்கவும், வளங்களை திறமையாகப் பயன்படுத்துவதற்காக அவற்றை பகுத்தறிவுடன் மறுசீரமைக்கவும் மனித உரிமைகள் பேரவை நடவடிக்கை எடுக்க வேண்டும் என்றும் இலங்கை கேட்டுக்கொண்டது.
உலகளாவிய ரீதியில் ஆயுத மோதல்கள், மனிதாபிமான நெருக்கடிகள் மற்றும் இடம்பெயர்வு போன்ற அவசரமான மனித உரிமை சவால்கள் நிலவும் நிலையில், பேரவையின் வரையறுக்கப்பட்ட வளங்கள் மிகவும் முக்கியமான பிரச்சினைகளில் கவனம் செலுத்த வேண்டும் என்றும் இலங்கை சுட்டிக்காட்டியது.
இதேவேளை, மனித உரிமைகளைப் பாதுகாத்தல் மற்றும் மேம்படுத்துதல் தொடர்பாக இலங்கையின் தேசிய செயல்முறைகளில் முன்னேற்றம் ஏற்பட்டுள்ளதாகவும், அந்த முன்னேற்றத்தை மனித உரிமைகள் பேரவை அங்கீகரிக்க வேண்டும் என்றும் தூதுவர் சுமித் தாசநாயக்க தெரிவித்தார்.
இலங்கையின் மனித உரிமைகள் நிலைமை தொடர்பான எழுத்துமூல புதுப்பிப்பு செப்டம்பர் 8ஆம் திகதி பேரவையில் சமர்ப்பிக்கப்பட்டிருந்ததுடன், அந்தக் கூட்டத்தில் ஐ.நா. மனித உரிமைகளுக்கான உயர் ஸ்தானிகர் வோல்கர் துர்க்கும் கலந்துகொண்டிருந்தார்.
இலங்கை, நாடு சார்ந்த அறிக்கையிடல் முறைகள் மேலும் கவனம் செலுத்தப்பட்ட, புறநிலையான மற்றும் குறிப்பிட்ட ஆணைகளை அடிப்படையாகக் கொண்டதாக இருக்க வேண்டும் என்றும், ஐ.நா. அமைப்பின் செயல்திறன் மற்றும் முன்னுரிமைகளை மேம்படுத்தும் சீர்திருத்தங்களுடன் இது முன்னெடுக்கப்பட வேண்டும் என்றும் வலியுறுத்தியுள்ளது
