இலங்கை தற்போது எல் நினோ (El Niño) காலநிலை தாக்கத்தின் கீழ் இருப்பதாகவும், அடுத்த சில மாதங்களில் குறைந்த மழை, வெள்ளப்பெருக்கு மற்றும் வறட்சி உள்ளிட்ட தீவிர வானிலை மாற்றங்கள் ஏற்படக்கூடும் என்றும் வானிலை அதிகாரிகள் எச்சரித்துள்ளனர்.
இலங்கை வானிலை ஆய்வு திணைக்களத்தின் மேலதிக பணிப்பாளர் நாயகம் அஜித் விஜேமன்ன தெரிவிக்கையில், தற்போது நாடு எல் நினோ தாக்கத்தில் உள்ளதாகவும், எதிர்வரும் மாதங்களில் வானிலை அமைப்பில் குறிப்பிடத்தக்க மாற்றங்கள் ஏற்படும் என்றும் கூறினார்.
அவரது விளக்கத்தின் படி, தற்போது வலுவான எல் நினோ உருவாகும் வாய்ப்பு 63% ஆகவும், பலவீனமான எல் நினோ உருவாகும் வாய்ப்பு 33% ஆகவும் உள்ளது.
எல் நினோவின் தாக்கம் காரணமாக ஆகஸ்ட் மாதத்தில் மிகவும் குறைந்த மழைப்பொழிவு பதிவாகும் என எதிர்பார்க்கப்படுகிறது. ஆனால் ஒக்டோபர் மற்றும் நவம்பர் மாதங்களில் மழை அதிகரிக்கக்கூடும் என்பதால், அதன் தீவிரத்தைப் பொறுத்து நாட்டின் சில பகுதிகளில் வெள்ளப்பெருக்கு அபாயமும் உருவாகலாம் என அவர் எச்சரித்தார்.
மேலும், அடுத்த ஆண்டின் முதல் கட்டத்தில் மீண்டும் வானிலை மாற்றம் ஏற்பட்டு, வறட்சி நிலை உருவாகும் சாத்தியம் இருப்பதாகவும், இது நீர்வளம், விவசாயம் மற்றும் பல முக்கிய துறைகளில் பாதிப்பை ஏற்படுத்தக்கூடும் என்றும் தெரிவித்தார்.
எல் நினோவின் சாத்தியமான தாக்கங்கள் குறித்து ஜனாதிபதி செயலகத்தில் நடைபெற்ற விசேட அமைச்சரவை உபக்குழு மற்றும் அதிகாரிகள் குழுவின் முதல் கூட்டத்தில் விரிவாக கலந்துரையாடப்பட்டது. இந்தக் கூட்டம் சுற்றுச்சூழல் அமைச்சர் டாக்டர் தம்மிக்கா பதபெந்தி தலைமையில் நடைபெற்றது.
அதிகாரிகள் தெரிவிக்கையில், எல் நினோவின் தாக்கத்தால் இலங்கையில் குறைந்த மழை, திடீர் வெள்ளப்பெருக்கு மற்றும் நீடித்த வறட்சி போன்ற தொடர்ச்சியான வானிலை தீவிரங்கள் ஏற்படக்கூடும் என மதிப்பிடப்பட்டுள்ளது.
ஜனாதிபதி அனுர குமார திசாநாயக்கவின் அறிவுறுத்தலின் பேரில் அமைக்கப்பட்டுள்ள இந்தக் குழுக்கள், உணவுப் பாதுகாப்பு, நீர்வள முகாமைத்துவம், ஆற்றல் சேமிப்பு உள்ளிட்ட துறைகளுக்கான குறுகிய, நடுத்தர மற்றும் நீண்டகால செயல் திட்டங்களை வகுப்பதுடன், அரச நிறுவனங்களுக்கிடையேயான ஒருங்கிணைப்பையும் வலுப்படுத்தும்.
அனைத்து அமைச்சுகளும் மற்றும் அரச திணைக்களங்களும், எல் நினோவால் உருவாகக்கூடிய அனைத்து நிலைகளையும் எதிர்கொள்ளும் வகையில் இரண்டு வாரங்களுக்குள் தங்களது செயல் திட்டங்களை சமர்ப்பிக்குமாறு அறிவுறுத்தப்பட்டுள்ளன.
மேலும், எல் நினோ தொடர்பான அனைத்து அதிகாரப்பூர்வ தகவல்களும் பொதுமக்களுக்கு வானிலை ஆய்வு திணைக்களத்தின் மூலமாக மட்டுமே வெளியிடப்படும் என்றும், முரண்பட்ட தகவல்கள் வெளியாகாமல் இருப்பதற்காக இந்த முடிவு எடுக்கப்பட்டதாகவும் தெரிவிக்கப்பட்டுள்ளது.
இந்த விசேட அமைச்சரவை உபக்குழுவில் அமைச்சர்கள் கே.டி. லால் காந்த, சமந்த வித்யாரத்ன, அனுர கருணாதிலக, வசந்த சமரசிங்க மற்றும் சுசில் ரணசிங்க ஆகியோர் உறுப்பினர்களாக உள்ளனர்.
