கஹவத்தை, நீலகம பகுதியில் மர்மமான முறையில் காணாமல் போயிருந்த மாணிக்கக்கல் வர்த்தகரின் சடலம், நேற்று (30) சுரங்கக் குழி ஒன்றிலிருந்து மீட்கப்பட்டுள்ளது.
கஹவத்த பொலிஸ் பிரிவுக்குட்பட்ட கஹவத்துக்கந்தவில் உள்ள ஒரு பாழடைந்த வனப்பகுதியில் உள்ள சுரங்கக்குழியில் நேற்று (30) பிற்பகல் கண்டெடுக்கப்பட்டது. இறந்தவர் ஓபநாயக்கவின் ஹுனுவல பிரிவில் உள்ள லெந்தரவைச் சேர்ந்த வல்பிட்ட கமகே அனுரா (62) என அடையாளம் காணப்பட்டுள்ளார்.
அவர் 28 ஆம் திகதி காலையில் ஒரு இரத்தினக்கல் வாங்குவதற்காக வீட்டை விட்டு வெளியே சென்றிருந்தார், அவர் வீடு திரும்பாததால் அவரது உறவினர்கள் ஓபநாயக்க பொலிசில் புகார் அளித்திருந்தனர்.
இது தொடர்பாக பொலிசார் இரண்டு நாட்கள் விசாரணை நடத்திய நிலையில், பொலிஸ் மோப்பநாய் உதவியுடன் நேற்று பிற்பகல் வனப்பகுதியில் உள்ள ஒரு சுரங்கக்குழியில் உடல் கண்டெடுக்கப்பட்டது.
இரத்தினக்கல் பரிவர்த்தனை தொடர்பான தகராறு இந்த வியாபாரியின் கொலைக்கு வழிவகுத்திருக்கலாம் என பொலிசார் சந்தேகிக்கின்றனர். இறந்த வியாபாரி ஒருவரிடமிருந் ஒரு இரத்தினக்கல்லை வாங்கியிருந்தார். 80,000 ரூபாய் மதிப்புள்ள அந்தப் பொருளுக்காக அவர் ஆரம்பத்தில் 30,000 ரூபாய் செலுத்தியிருந்தார். மீதமுள்ள 50,000 ரூபாயைச் செலுத்தச் சென்றபோது அவர் கொலை செய்யப்பட்டிருக்கலாம் என காவல்துறை சந்தேகிக்கிறது. அவரது சடலம் ஒரு பழைய இரத்தினக்கல் சுரங்கத்தில் புதைக்கப்பட்ட நிலையில் கண்டெடுக்கப்பட்டது. குற்றவாளிகளைப் பிடிக்க காவல்துறை சிறப்பு நடவடிக்கையைத் தொடங்கியுள்ளது.
