இன்று (13) மாலை 5:00 மணி முதல் இரவு 9:30 மணி வரை, நாடு முழுவதும் ஒரு மணித்தியால மின்வெட்டு அமுல்படுத்தப்படும் என மின் மற்றும் வலுச்சக்தி அமைச்சு அறிவித்துள்ளது.
பல்வேறு பகுதிகளுக்கான மின்வெட்டு கால குறிப்பிட்ட நேர அட்டவணை பின்னர் அறிவிக்கப்படும் என எதிர்பார்க்கப்படுகிறது. தற்காலிக மின்வெட்டுக்கு பொதுமக்கள் தயாராக இருக்குமாறு அமைச்சகம் வலியுறுத்தியுள்ளது. கால அட்டவணை தொடர்பான கூடுதல் அறிவிப்புகள் உரிய நேரத்தில் வழங்கப்படும் என தெரிவிக்கப்பட்டுள்ளது.
நுரைச்சோலை அனல் மின் நிலையத்தில் ஏற்பட்ட கோளாறு காரணமாக, மின்வெட்டுகள் அமுல்படுத்தப்படுகின்றன. இந்நிலையை சரிசெய்யும் பணிகள் நடைபெற்று வருகின்றன, மேலும் நிலைமை சீராகும் வரை மின்வெட்டுகள் தொடரலாம் என தெரிவிக்கப்பட்டிருந்தது.
மின்சார சபை நாடு முழுவதும் உள்ள பகுதிகளை A, B, C, D, E, F, G, H, U, V, I, J, K, L, P, Q, R, S, T, W எனப் பிரித்து, ஒவ்வொரு பிரிவுக்கும் மின்வெட்டு நேரங்களை ஒதுக்கியுள்ளது. அதனடிப்படையில் பிராந்தியத்தின் மின்வெட்டு நேர அட்டவணை பின்னர் உரிய நேரத்தில் வழங்கப்படும்.
மின்வெட்டு நேரங்கள் திட்டமிடப்பட்ட நேரத்திலிருந்து 30 நிமிடங்களுக்கு மாறக்கூடும் என்பதால், பொதுமக்கள் தயவுசெய்து முன்னெச்சரிக்கையுடன் இருக்குமாறு கேட்டுக்கொள்ளப்படுகின்றனர்.
