யாழ்ப்பாணம் பாடசாலை மாணவி சிவலோகநாதன் வித்தியா படுகொலை வழக்கில் மரண தண்டனை விதிக்கப்பட்ட குற்றவாளிகள் தாக்கல் செய்த மேல்முறையீடு, இலங்கை உயர் நீதிமன்றத்தால் விசாரணைக்கு எடுத்துக் கொள்ளப்பட்டுள்ளது.
இன்று (06) உயர்நீதிமன்ற நீதியரசர்கள் ப்ரீத்தி பத்மன் சூரசேன, ஜனக் டி சில்வா மற்றும் சம்பத் அபேகோன் ஆகியோர் அடங்கிய மூவர் அடங்கிய நீதிமன்ற குழுவின் முன்னிலையில் இந்த மேல்முறையீட்டு மனுக்கள் பரிசீலிக்கப்பட்டன.
இதன்போது, அரசின் சார்பில் ஆஜரான சட்டமா அதிபரின் பிரதிநிதி, மேல்முறையீட்டை விசாரிக்க தேவையான தேதியை அறிவிக்குமாறு கோரியதையடுத்து, எதிர்வரும் ஓகஸ்ட் 25ம் திகதி விசாரணை நடைபெறுவதாக உயர் நீதிமன்றம் உத்தரவிட்டுள்ளது.
கடந்த 2015ம் ஆண்டு, மாணவி வித்தியாவைக் கடத்தி, பாலியல் துஷ்பிரயோகத்திற்கு உட்படுத்தி கொலை செய்ததாக குற்றம் சுமத்தப்பட்ட ஏழு பேருக்கு யாழ்ப்பாணம் மேல்நீதிமன்றம் மரண தண்டனை விதித்தது.
மேன்முறையீடு செய்த குற்றவாளிகள், இந்த தீர்ப்பு சட்டத்துக்கு முரணானது என்றும், தங்களுக்குச் சுமத்தப்பட்ட அனைத்து குற்றச்சாட்டுகளிலிருந்தும் முழுமையாக விடுவிக்க வேண்டும் என்றும் கோரி மேல்முறையீடு செய்துள்ளனர்.
