ஐக்கிய தேசியக் கட்சியுடன் (UNP) இதுவரை மேற்கொள்ளப்பட்ட பேச்சுவார்த்தைகள் வெற்றிகரமாக அமைந்துள்ளதாகவும், எதிர்வரும் தேர்தல்களில் இரு கட்சிகளும் இணைந்து போட்டியிட ஒப்புக்கொண்டுள்ளதாகவும், ஐக்கிய மக்கள் சக்தியின் (SJB) தேசிய அமைப்பாளர் திஸ்ஸ அத்தநாயக்க தெரிவித்துள்ளார்.
இரு கட்சிகளின் தலைவர்களுக்கிடையே அடுத்த வாரம் ஒரு முக்கிய கலந்துரையாடல் நடைபெறவுள்ளதாக அவர் தெரிவித்துள்ளார். ஆரம்பகட்ட பேச்சுவார்த்தைகள் மிக நேர்மறையானதாக இருந்ததன் காரணமாக, எதிர்காலத்தில் தீர்க்கமான கூட்டங்களை நடத்துவதற்கான திட்டங்கள் தயாரிக்கப்பட்டுள்ளதாகவும் அவர் கூறினார்.
மேலும், எதிர்வரும் தேர்தல்களில் பயன்படுத்தப்படவுள்ள சின்னம், கூட்டணி அமைப்பு மற்றும் பிற முக்கிய காரணிகள் தொடர்பாகவும் விரிவான பேச்சுவார்த்தைகள் நடத்தப்படவுள்ளதாகவும், இந்த இணைப்பு அரசியல் நிலையினை மேலும் வலுப்படுத்தும் எனவும் அத்தநாயக்க தெரிவித்துள்ளார்.
இந்த கூட்டணியின் இறுதி உடன்படிக்கைகள் மற்றும் அதிகாரப்பூர்வ அறிவிப்புகள் விரைவில் வெளியிடப்படும் என எதிர்பார்க்கப்படுகிறது.
