கொழும்பில் இருந்து ஹட்டன் நோக்கி பயணித்த ஹட்டன் இலங்கை போக்குவரத்துசபை டிப்போவிற்கு சொந்தமான பேருந்தின் சாரதி மற்றும் நடத்துனரை தாக்கிய நபர்களை முறையான விசாரணைகளை மேற்கொண்டு கைது செய்யுமாறு வெல்லம்பிட்டி பொலிஸாரிடம் ஹட்டன் இ.போ.ச டிப்போவின் நிர்வாகம் கோரியுள்ளது.
நேற்று முன்தினம் (15) கொழும்பில் இருந்து ஹட்டன் நோக்கி பயணித்த இ.போ.ச பேருந்து, வெல்லம்பிட்டிய, கொட்டிகாவத்தை பகுதியில் சென்று கொண்டிருந்த போது, முன்னால் சென்ற மோட்டார் சைக்கிள் பிரதான வீதியின் குறுக்கே சறுக்கி மோட்டார் சைக்கிளின் பின்னால் சென்ற பெண்ணொருவர் பிரதான வீதியின் குறுக்கே விழுந்துள்ளார். பேருந்து மோதியதில் பெண் சம்பவ இடத்திலேயே உயிரிழந்ததையடுத்து பேருந்தில் இருந்தவர்கள் மற்றும் பிரதேசவாசிகள் சிலர் ஆத்திரமடைந்து சாரதி மற்றும் நடத்துனரை கொடூரமாக தாக்கினர். இருவரும் காயம் அடைந்தனர்.
சாரதி தன்னைத் தாக்க வேண்டாம் என்று கெஞ்சினார், ஆனால் குழு அவரைத் தொடர்ந்து தாக்கியது, சாரதிக்கு காயம் ஏற்பட்டது.
விபத்தை ஏற்படுத்திய சந்தேகத்தின் பேரில் பேருந்தின் சாரதி வெல்லம்பிட்டி பொலிஸாரினால் கைது செய்யப்பட்டுள்ளதுடன், தாக்குதலினால் ஏற்பட்ட காயங்களினால் அவர் வைத்தியசாலையில் அனுமதிக்கப்பட வேண்டும் என ஹட்டன் டிப்போ நிர்வாகம் தெரிவித்த போதிலும் சாரதி வைத்தியசாலையில் அனுமதிக்கப்படவில்லையென தெரிவித்தனர்.
விபத்தை தொடர்ந்து அங்கிருந்த சிலர் சாரதி மற்றும் நடத்துனரை தாக்கியதை வன்மையாகக் கண்டிக்கப்பதாகவும் டிப்போ நிர்வாகம் தெரிவித்துள்ளது.
சாரதி மற்றும் நடத்துனரை தாக்கியவர்களை கைது செய்து நீதிமன்றத்தில் ஆஜர்படுத்த வெல்லம்பிட்டி பொலிஸார் நடவடிக்கை எடுக்காவிட்டால், ஹட்டன் இ.போ.ச டிப்போ ஊழியர்கள் தொழிற்சங்க போராட்டத்தில் ஈடுபட திட்டமிட்டுள்ளதாக நிர்வாகம் மேலும் தெரிவித்துள்ளது.
அந்த பேருந்தில் இருந்த பயணி ஒருவர் சாரதியை தாக்கியதை மொபைல் போனில் பதிவு செய்து சமூக வலைதளங்களில் வெளியிட்டார்.
