அமெரிக்க ஜனாதிபதியாகத் தேர்ந்தெடுக்கப்பட்டுள்ள டொனால்ட் ட்ரம்ப் புதன்கிழமை (நவம்பர் 27) உக்ரைனுக்கான சிறப்புத் தூதராக ஓய்வுபெற்ற லெப்டினன்ட் ஜெனரல் கீத் கெல்லாக் பணியாற்றுவார் என்று அறிவித்தார்.
ரஷ்யாவிற்கும் உக்ரைனுக்கும் இடையே நடந்து வரும் மோதலை முடிவுக்குக் கொண்டுவருவதற்கான திட்டத்தை கெல்லாக் முன்வைத்ததாகக் கூறி டிரம்ப் தனது ட்ரூத் சமூக ஊடகத்தில் அறிவித்தார்.
2017-2021 வரை வெள்ளை மாளிகையில் டிரம்பின் முதல் பதவிக்காலத்தில் கெல்லாக் தலைமை அதிகாரியாக இருந்தார்.
அப்போதைய அமெரிக்க துணை ஜனாதிபதி மைக் பென்ஸின் தேசிய பாதுகாப்பு ஆலோசகராகவும் இருந்தார்.
தற்போதைய அமெரிக்க நிர்வாகத்தில் உக்ரைன் போருக்கான சிறப்புத் தூதுவர் என்ற துறை இல்லை. இது ட்ரம்பின் இரண்டாவது பதவிக்காலத்தில் புதிதாக நிறுவப்பட்ட துறையாக இருக்கும்.
ரஷ்யா – உக்ரைன் மோதலை முடிவுக்கு கொண்டுவருவது என்பது ட்ரம்ப் தனது தேர்தல் பிரச்சாரத்தின் போது அளித்த முக்கிய வாக்குறுதியாக இருந்து வருகிறது. இருப்பினும், குடியரசுக் கட்சி அதை எப்படிச் செய்யத் திட்டமிடுகிறது என்பதைப் பகிர்ந்து கொள்ளவில்லை.
ரொய்ட்டர்ஸ் அறிக்கையின்படி, மோதலை முடிவுக்குக் கொண்டுவருவதற்கான கெல்லாக்கின் திட்டம், தற்போது உள்ள முன்வரிசையை அப்படியே பேணி, இரு தரப்பையும் பேச்சுவார்த்தைக்கு வருமாறு கட்டாயப்படுத்துவதாகும்.
ட்ரம்பின் தேசிய உளவுத்துறையின் முன்னாள் செயல் இயக்குனர் ரிச்சர்ட் கிரெனெலும் இந்த திட்டத்தின் ஒரு பகுதியாக இருப்பார் என்று அறிக்கை மேலும் கூறியுள்ளது.
கெல்லாக்கின் மூலோபாயத்தின்படி, அமைதி பேச்சுவார்த்தைக்கு மேசைக்கு வராத வரை, உக்ரைனுக்கு அதிக அமெரிக்க ஆயுதங்களையும் உதவிகளையும் அமெரிக்கா மறுக்கும்.
மறுபுறம், ரஷ்யா அமைதிப் பேச்சு மேசையில் சேரவில்லை என்றால், உக்ரைனுக்கு அமெரிக்க ஆயுத விநியோகத்தை அமெரிக்கா அதிகரிக்கும் என்று அமெரிக்கா ரஷ்யாவை எச்சரிக்கும்.
உக்ரைனின் நேட்டோ உறுப்புரிமை வாய்ப்பு பறிக்கப்படும் என்று திட்டம் மேலும் வலியுறுத்துகிறது.
ஒட்டுமொத்தமாக, உக்ரைனின் கிழக்குப் பகுதிகளை ரஷ்யாவின் கட்டுப்பாட்டில் கொடுக்க வேண்டிய கட்டாயம் ஏற்படும் என்பதால், இந்தத் திட்டத்தை உக்ரான் விரும்பாது. எனினும், ட்ரம்பின் பதவிக்காலம் உக்ரைனுக்கு பெரும் நெருக்கடியை ஏற்படுத்தும்.
மேலும், குடியரசுக் கட்சியினர் சிலர் உக்ரைனுக்கு கூடுதல் உதவி வழங்கும் யோசனைக்கு எதிர்ப்பு தெரிவிக்கவும் வாய்ப்புள்ளது.
