பாடசாலை ஆசிரியை ஒருவரை கத்தியால் வெட்டி காயப்படுத்திய குற்றச்சாட்டின் பேரில் மற்றுமொரு பாடசாலை ஆசிரியை நேற்று (19) கைது செய்யப்பட்டதாக பதுளை பொலிஸார் தெரிவித்தனர்.
காயமடைந்த 44 வயதுடைய ஆசிரியை பதுளை போதனா வைத்தியசாலையில் அனுமதிக்கப்பட்டுள்ளதாகவும், அவரது கால் மற்றும் கைகளில் வெட்டுக்காயங்கள் ஏற்பட்டுள்ளதாக பதுளை போதனா வைத்தியசாலையின் வைத்தியர் ஒருவர் தெரிவித்தார்.
கைது செய்யப்பட்ட 45 வயதுடைய சந்தேகநபரான ஆசிரியையிடம் இருந்து கத்தி ஒன்றும் காணப்பட்டதாக பொலிஸார் குறிப்பிட்டுள்ளனர்.
இவ்விரு ஆசிரியர்கள் இரு பாடசாலைகளில் பணியாற்றும் நண்பர்கள் எனவும், இருவருக்கும் இடையில் ஏற்பட்ட மனக்கசப்பு காரணமாக சந்தேகநபர் டெனிம் பேண்ட் அணிந்து நேற்று முன்தினம் (18) நள்ளிரவு மற்றைய ஆசிரியையின் வீட்டுக்குச் சென்று இந்தக் குற்றத்தை செய்துள்ளதாக பொலிஸார் தெரிவித்தனர். .
பிரதேசவாசிகள் சந்தேக நபரை பிடித்து 119 என்ற பொலிஸ் அவசர இலக்கத்திற்கு அறிவித்து பொலிஸாரிடம் ஒப்படைத்ததாக பொலிஸார் தெரிவித்தனர்.
காதல் விவகாரமே இந்தக் குற்றத்திற்குக் காரணம் என்றும் தெரியவந்துள்ளது.
