புத்தரின் போதனைகளுக்கு தவறான விளக்கங்களை வழங்கி, திரிபுபடுத்தப்பட்ட சித்தாந்தங்களை பரப்பிய விபரீத நபரின் மற்றொரு சீடர், நேற்று முன்தினம் (3) இரவு விஷம் குடித்து தற்கொலைக்கு முயன்றுள்ளார்.
பொலன்னறுவை சிறிபுர பலுதெனிய பிரதேசத்தை சேர்ந்த 27 வயதுடைய நபரே இவ்வாறு தற்கொலைக்கு முயன்றுள்ளார்.
ஹோமாகம, மகும்புரவில் உள்ள வீடொன்றில் விஷம் குடித்து தற்கொலை செய்துகொண்ட ருவன் பிரசன்ன குணரத்ன, இந்த உலகத்தில் வாழ்க்கையை முடிப்பது, நித்திய வாழ்வைப்பெறலாமென போலியான பிரச்சரத்தில் ஈடுபட்டு வந்தார். உலகம் அழியப் போகிறது, இனி வாழ்வதில் பலனில்லையென்றெல்லாம் குறிப்பிட்டு வந்துள்ளார். இதனால் அவர், மனைவி, 3 பிள்ளைகள் தற்கொலை செய்தனர். அவரது சீடர்களான பல்கலைக்கழகத்துக்கு தெரிவான மாணவி, அவரது காதலரும் தற்கொலை செய்தனர்.
இந்த நிலையில் மற்றெரு தற்கொலை முயற்சி நடந்துள்ளது.
தற்கொலைக்கு முயன்றவர் தற்போது மருத்துவமனையில் சிகிச்சை பெற்று வருவதாக சிறிபுர காவல்துறையின் மூத்த அதிகாரி ஒருவர் தெரிவித்தார். இந்த இளைஞன் சுமார் ஏழெட்டு வருடங்களாக தீவிரவாத விரிவுரைகளை வழங்கிய நபரை பின்பற்றி வந்துள்ளமை தெரியவந்துள்ளது. தீவிரவாத போதகர் சிறிபுரவில் வசிப்பவர் என்பதும், அவரைப் பின்பற்றுபவர்களாக அந்தப் பகுதியில் உள்ள பலர் அவரது விரிவுரைகளில் இணைந்திருப்பதும் தெரியவருவதாக மூத்த காவல்துறை அதிகாரி ஒருவர் தெரிவித்தார்.
அப்பகுதியில் உள்ள பிரபல கல் மில் உரிமையாளரின் மகனே தற்கொலைக்கு முயன்றுள்ளார். ஒரு பிள்ளையின் தந்தையான இவர், தீவிரவாத விரிவுரைகளை ஆற்றி தற்கொலை செய்து கொண்ட ருவன் பிரசன்ன குணரத்னவின் இறுதிச் சடங்கில் கலந்து கொள்வதற்காக நண்பர்கள் சிலருடன் கொழும்புக்கு வந்த பின்னர் தற்கொலைக்கு முயன்றதாக விசாரணைகளில் தெரியவந்துள்ளது.
ருவன் பிரசன்ன குணரத்ன கடந்த 28ஆம் திகதி மகும்புரவில் உள்ள அடுக்குமாடி குடியிருப்பில் அமைந்துள்ள வீடொன்றில் விஷம் அருந்தி தற்கொலை செய்துகொண்டார். அவரது இறுதிச் சடங்கு நடந்த அன்று, அவரது மனைவி மூன்று குழந்தைகளுடன் விஷம் குடித்து தற்கொலை செய்து கொண்டார். அவர் தனது பிள்ளைகளுடன் தற்கொலை செய்துகொண்ட போது, கொழும்பு சென்றிருந்த குழுவினருடன் இந்த வர்த்தகரின் மகனும் சிறிபுரவிற்கு வந்துள்ளார்.
இந்த இளைஞன் தனது தந்தையின் வியாபார விவகாரங்களில் ஈடுபட்டு வந்ததாகவும், ருவான் பிரசன்ன குணரத்னவின் விரிவுரைகளில் காதல் வயப்பட்டதாகவும் தெரியவந்துள்ளது. இந்த இளைஞன் நேற்று முன்தினம் (3) இரவு உணவு சாப்பிட்டுவிட்டு தூங்கிவிட்டு நள்ளிரவில் எழுந்து வீட்டுக்கு வெளியே சென்று விஷம் அருந்தியுள்ளதாக விசாரணைகளில் தெரியவந்துள்ளது.
ருவன் பிரசன்ன குணரத்னவின் மனைவி மற்றும் பிள்ளைகள் மற்றும் அவரது சீடர்களான, யக்கலட் மற்றும் மஹரகமவில் உயிரிழந்த இளைஞனும், யுவதியும் நள்ளிரவில் தற்கொலை செய்து கொண்டதுடன், சிறிபுர இளைஞனும் நள்ளிரவில் தற்கொலை செய்து கொள்ள முயற்சித்துள்ளதால், அதில் ஆர்வமும் மர்மமும் நிலவுகிறது.
இதுவரை, ருவான் பிரசன்ன குணரத்னவின் மனைவி மற்றும் பிள்ளைகளைத் தவிர, அவரது நெருங்கிய சீடர்கள் மூவர் விஷம் அருந்தியுள்ளனர். அவர்களில் இருவர் உயிரிழந்துள்ளதுடன், சிறிபுர பிரதேசத்தைச் சேர்ந்த இளைஞன் வைத்தியசாலையில் சிகிச்சை பெற்று வருகின்றார்.
தற்கொலை செய்து கொண்ட ருவன் பிரசன்ன குணரத்ன பௌத்த மதத்தை சிதைத்து பல்வேறு கருத்துக்களை பரப்பி வருவதாகவும் இதனால் இளைஞர் சமூகம் பலியாகி வருவதாகவும் விசாரணைகளில் தெரியவந்துள்ளது.
இந்த தற்செயலான தற்கொலை அலையாக மாற வாய்ப்புள்ளதால், அதனை தடுக்கும் வகையில் இந்த நபரை பின்தொடர்பவர்களை கண்டறிய போலீசார் விசாரணையை தொடங்கியுள்ளனர். இவர் தனது ஆதரவாளர்களை தொடர்பு கொண்டு உருவாக்கியுள்ள ‘சந்தஹம் சரண’ என்ற முகநூல் பக்கத்துடன் தொடர்பில் இருப்பவர்கள் தொடர்பில் புலனாய்வு பிரிவினரும் பொலிஸாரும் தொடர்ந்து கண்காணித்து வருவதாகவும் தெரிவிக்கப்படுகிறது.
ருவன் பிரசன்ன குணரத்ன தற்கொலை செய்து கொண்டதன் பின்னர், அவரது மனைவி மற்றும் பிள்ளைகள் தற்கொலை செய்து கொண்டதாக சந்தேகிக்கப்படுவதாகவும், ஆனால் இந்த சம்பவம் அதனை விட ஆழமானது என பொலிஸ் ஊடகப் பேச்சாளரும், சிரேஷ்ட பொலிஸ் அத்தியட்சகருமான சட்டத்தரணி நிஹால் தல்துவா தெரிவித்தார். எனவே, பதில் பொலிஸ் மா அதிபரின் ஆலோசனையின் பேரில், குற்றப் புலனாய்வுப் பிரிவினர் இது தொடர்பில் விசாரணைகளை மேற்கொள்வார்கள் எனத் தெரிவித்துள்ளார்.
அந்த விசாரணையில், அவரைப் பின்பற்றுபவர்கள் எத்தனை பேர், எந்தெந்தப் பகுதிகளில் சிதறிக்கிடக்கிறார்கள் என்பது குறித்து அதிக கவனம் செலுத்தப்பட்டுள்ளது. மேலும், இந்த தீவிரவாத விரிவுரைகளை வழங்கிய நபரை தொடர்ந்து இந்த தீவிரவாத விரிவுரைகளை தொடர்ந்து நடத்துபவர்கள் குறித்தும் விசேட கவனம் செலுத்தப்படும்.
இந்த தீவிரவாத விரிவுரைகளை வழங்கிய சதஹம் சரண என்ற நபர் தனது முகநூல் மூலம் ஆயிரக்கணக்கானோருக்கு தீவிரவாத கருத்துக்களை தெரிவித்துள்ளதாக பொலிஸாருக்கு தகவல் கிடைத்துள்ளதுடன், அதற்காக காலி, கிராந்துருகோட்டை, குருநாகல், கல்கமுவ உள்ளிட்ட கொழும்புக்கு வெளியில் உள்ள பல தொலைதூர கிராமங்கள் தெரிவு செய்யப்பட்டுள்ளதாக தெரிவிக்கப்படுகின்றது
கொழும்பிற்கு வெளியே உள்ள கிராமங்கள் அதிகமாக தெரிவு செய்யப்பட்டு அங்கு அமைந்துள்ள விகாரைகளின் பிக்குகளை சந்தித்து பௌத்தம் போதிக்கும் நிலையற்ற தன்மையை விளக்கி விரிவுரை நடத்த அனுமதி கோரி, தெரிவு செய்யும் வழிபாட்டாளர்களை தொடர்பு கொள்ள நுணுக்கமான முயற்சியை மேற்கொண்டுள்ளதாக தெரியவருகின்றது.
அதன்படி, ஒருமுறை பங்கேற்றவர் மீண்டும் பங்கேற்க மறுப்பது மிகவும் அரிது. இந்த பிரசங்கங்கள் உரையாடல் வடிவில் நடத்தப்படுகின்றன, அவை சுமார் இரண்டு அல்லது மூன்று மணி நேரம் நடத்தப்படுகின்றன. அங்கு ருவன் பிரசன்ன குணரத்ன அட்டாலோ தம்மா, திரிலக்ஷண, பஞ்சசீல போன்ற தலைப்புகளில் கலந்துரையாடுவார்.
இவரின் விரிவுரைகளில் கலந்து கொண்டவர்கள் நாடளாவிய ரீதியில் சிதறி கிடப்பதால், அவர்களை அவதானமாக இருக்குமாறும், அவ்வாறான விரிவுரைகளில் கலந்துகொண்டவர்கள் தொடர்பில் தகவல்களை வழங்குமாறும் பொலிஸார் பொதுமக்களை கேட்டுக்கொண்டுள்ளனர்.
