கனடாவில் வசித்த சீக்கியத் தலைவரான ஹர்தீப் சிங் நிஜ்ஜாரின் கொலை, இந்திய புலனாய்வு அமைப்பின் பயங்கரவாத செயலாக இருக்கலாம் என்ற வலுவான சந்தேகம் எழுந்துள்ளது.
கனடிய பிரதமர்ஜஸ்டின் ட்ரூடோ, கடந்த திங்கள்கிழமை நாடாளுமன்றத்தில் “இந்திய அரசாங்கத்தின் முகவர்களுக்கும் ஹர்தீப் சிங் நிஜ்ஜாரின் கொலைக்கும் சாத்தியமான தொடர்பு இருப்பதாக நம்பகமான குற்றச்சாட்டுகள் இருப்பதாகஸ தெரிவித்தார்.
இதையடுத்து, கனடாவில் இருந்து இந்திய தூதர் ஒருவர் வெளியேற்றப்பட்டார். பதிலுக்கு இந்தியாவும் கனடா இராஜதந்திரியொருவரை வெளியேற்றியுள்ளது.
இரு நாடுகளுக்குமிடையிலான இராஜதந்திர புயலை உருவாக்கிய ஹர்தீப் சிங் நிஜ்ஜார் கொலை இந்த ஆண்டு ஜூன் மாதம் நடந்தது. அவரது கொலைக்கான விசாரணை திறந்த நிலையில் உள்ளது. ஜூன் 18 அன்று, குருநானக் சீக்கிய குருத்வாராவிற்கு வெளியே இரவு 8:30 மணிக்கு ஒரு வாகனத்தில் 45 வயதான நிஜ்ஜார் பல துப்பாக்கிச் சூட்டுக் காயங்களால் உயிரிழந்தார்.
விசாரணையாளர்கள் ஆரம்பத்தில் இரண்டு சந்தேக நபர்களை “முகமூடி அணிந்த தடிமனான ஆண்கள்” என்று விவரித்தது. இருப்பினும், அவர்கள் தனியாக செயல்படவில்லை என்று பின்னர் தெரிவித்தனர்.
திங்களன்று, ட்ரூடோ, கொலைக்கும் இந்திய அரசாங்கத்துடன் தொடர்புடைய நபர்களுக்கும் இடையிலான தொடர்புகளை அதிகாரிகள் விசாரித்து வருவதாக உறுதிப்படுத்தினார். இந்தக் குற்றச்சாட்டுகளை இந்திய அரசு கடுமையாக நிராகரித்துள்ளது.
ஹர்தீப் சிங் நிஜ்ஜர் யார்?
பெப்ரவரி 1997 இல் பிளம்பர் ஆக கனடாவுக்கு குடிபெயர்ந்த நிஜ்ஜார், இந்திய துணைக் கண்டத்தில் சீக்கியர்களுக்கான தனி தாயகமான சுதந்திர காலிஸ்தானுக்கான இயக்கத்தில் முக்கிய நபராக இருந்தார்.
ஆனால் இந்திய அரசாங்கம் ஒரு பயங்கரவாதக் குழுவாகக் குறிப்பிடும் காலிஸ்தான் புலிப் படையின் (KTF) “தலைமை மூளை / செயலில் உள்ள உறுப்பினர்” எனக் கூறப்பட்டதற்காக அவர் தேடப்பட்டார்.
நிஜ்ஜாரின் நண்பரும் சக சீக்கிய தேசியவாதியுமான குர்பத்வந்த் சிங் பன்னூன், ஜூன் மாதம் இந்திய உளவுத்துறை முகவர்கள் தன் தலைக்கு வெகுமதி கொடுத்ததாக சிலர் எச்சரித்ததாக நிஜ்ஜார் கூறினார் என்று கூறினார்.
கனேடிய பாதுகாப்பு புலனாய்வு சேவையும் நிஜ்ஜாரிடம், அவர் “தொழில்முறை கொலையாளிகளால் அச்சுறுத்தலுக்கு உள்ளாகியிருக்கிறார்” என்று கூறியதாக பன்னூன் குறிப்பிட்டார்.
இந்தியாவில் 1980 கள் மற்றும் 1990 களின் முற்பகுதியில் சீக்கியர்கள் பெரும்பான்மையாக உள்ள வட மாநிலமான பஞ்சாபில் இந்திய அரசாங்கத்திற்கும் சீக்கிய பிரிவினைவாதிகளுக்கும் இடையே ஆயுத மோதல் ஏற்பட்டது. கிளர்ச்சிக்கு எதிரான ஒடுக்குமுறைக்கு மத்தியில், நிஜ்ஜாரின் சகோதரர் இந்தியாவில் போலீசாரால் கைது செய்யப்பட்டார். 1995 இல், நிஜ்ஜார் கைது செய்யப்பட்டார்.
கனடிய குடிவரவு அதிகாரிகளிடம் சத்தியப் பிரமாணப் பத்திரத்தில், தனது சகோதரனைப் பற்றிய தகவலுக்காக தான் அடித்து துன்புறுத்தப்பட்டதாக நிஜ்ஜார் கூறினார். லஞ்சம் கொடுத்து, தலைமுடியைக் குட்டையாக வெட்டிக் கொண்டு தப்பிச் சென்றதாகக் கூறினார்.
1997 ஆம் ஆண்டு, நிஜ்ஜார், தான் இந்திய காவல்துறையினரால் தாக்கப்பட்டு சித்திரவதை செய்யப்பட்டதாகக் கூறி, கனடாவிற்கு வந்தார். 1998 இல், அவரது அகதி கோரிக்கை நிராகரிக்கப்பட்டது. அவரது குடியேற்ற பதிவுகளின்படி, அவர் மோசடியான பாஸ்போர்ட்டைப் பயன்படுத்தினார், அது அவரை “ரவி சர்மா” என்று அடையாளப்படுத்தியது.
ஜூன் 9, 1998 திகதியிட்ட தனது பிரமாணப் பத்திரத்தில், “எனது தேசமான இந்தியாவுக்கு நான் திரும்பிச் செல்ல நேர்ந்தால் என் உயிருக்கு பெரும் ஆபத்து ஏற்படும் என்பதை நான் அறிவேன்“ என குறிப்பிட்டுள்ளார்.
அவரது விண்ணப்பம் நிராகரிக்கப்பட்டது. 11 நாட்களுக்குப் பிறகு நிஜ்ஜார் ஒரு கனடிய குடியுரிமையுள்ள பெண்ணை மணந்தார். நிஜ்ஜாரின் குடியேற்ற விசாவுக்கான ஏற்பாடுகளை அவரே மேற்கொண்டார்.
நிஜ்ஜாரின் விண்ணப்பப் படிவத்தில், “அரசியல், மத அல்லது சமூக நோக்கங்களை அடைய ஆயுதப் போராட்டம் அல்லது வன்முறையை” பயன்படுத்திய அல்லது வாதிடும் குழுவுடன் அவர் தொடர்புள்ளவரா என்று கேட்கப்பட்டது.
அவர் “இல்லை” என்று கூறினார். ஆனால் குடிவரவு அதிகாரிகள் அவரது திருமணத்தை, குடியுரிமை பெறுவதற்கானது என்று கருதினர். நிஜ்ஜாரின் விண்ணப்பத்தை நிராகரித்தனர். நிஜ்ஜார் நீதிமன்றங்களில் முறையிட்டார். 2001 இல் தோற்றார், ஆனால் பின்னர் அவர் தன்னை ஒரு கனேடிய குடிமகனாக அடையாளம் காட்டினார்.
செவ்வாயன்று, குடிவரவு அமைச்சர் மார்க் மில்லர், மார்ச் 3, 2015 அன்று நிஜ்ஜார் கனேடிய குடிமகனாக ஆனார் என்பதை உறுதிப்படுத்தினார். “அவர் கனேடியர் இல்லை என்ற அடிப்படையற்ற வதந்திகளை இது அகற்றும் என்று நம்புகிறேன்” என்று மில்லர் கூறினார்.
நிஜ்ஜார், சர்ரேயில் ஒரு பிளம்பிங் தொழிலை நடத்தி வந்தார், மேலும் காலிஸ்தான் – தனி சீக்கிய தேசத்தை உருவாக்குவதற்கான முக்கிய போராட்டக்காரராக உயர்ந்தார்.
அவர் உலகம் முழுவதும் பயணம் செய்து காலிஸ்தான் மீது பொதுவாக்கெடுப்பு நடத்த வேண்டும் என்று அழைப்பு விடுத்தார். இந்தியாவில் சீக்கியர்களுக்கு எதிரான வன்முறையை “இனப்படுகொலை” என்று அங்கீகரிக்க வேண்டும் என்று அழைப்பு விடுத்தார்.
2014 இல், இந்தியாவின் பிரதமர் நரேந்திர மோடி பதவியேற்ற சில மாதங்களுக்குப் பிறகு, இந்திய அதிகாரிகள் நிஜ்ஜாருக்கு கைது வாரண்ட் பிறப்பித்தனர். புது தில்லி நிஜ்ஜாரை காலிஸ்தான் புலிப்படை என்ற தீவிரவாதக் குழுவின் “தலைமை மூளை” என்று விவரித்தது.
2007ஆம் ஆண்டு பஞ்சாபில் திரையரங்கில் நடந்த குண்டுவெடிப்பில் அவருக்கு தொடர்பு இருப்பதாக குற்றம் சாட்டப்பட்டது. அவருக்கு எதிராக 2016 இன் இன்டர்போல் நோட்டீஸ் அவர் தாக்குதலில் ஒரு “முக்கிய சதிகாரர்” என்று குற்றம் சாட்டியது. ஆட்சேர்ப்பு, நிதி திரட்டலில் ஈடுபட்டதாக அவர் மீது குற்றம்சாட்டப்பட்டாலும், நிஜ்ஜார் அதை மறுத்தார்.
நிஜ்ஜாருடன் தொடர்புடைய பலர், அவர் குறிவைக்கப்படுவதாகவும், அவரது உயிருக்கு அச்சுறுத்தல் இருப்பதாகவும் அவர் அச்சம் தெரிவித்ததாகக் கூறினர். மேலும் குருத்வாராவுடன் தொடர்புடைய பிற நபர்களும் அச்சுறுத்தல்களை எதிர்கொண்டுள்ளனர்.
கடந்த வாரம், நிஜ்ஜார் தலைவராக பணியாற்றிய சர்ரேயின் குருநானக் சீக்கிய குருத்வாராவில், காலிஸ்தான் தேசத்திற்காக அதிகாரபூர்வமற்ற வாக்கெடுப்பு நடைபெற்றது. காலிஸ்தான் தேசத்திற்காக போராடும் ஒரு குழுவான நீதிக்கான சீக்கியர்களால் இந்த வாக்கெடுப்பு ஏற்பாடு செய்யப்பட்டது.
