கனடாவின் ஒன்ராறியோ மாகாண பொலிஸ் உத்தியோகத்தர் ஒருவர் கடமையிலிருந்த போது சுட்டுக் கொல்லப்பட்டார். அவரை சுட்டுக்கொன்ற இருவர் கைது செய்யப்பட்டு காவலில் வைக்கப்பட்டுள்ளனர்.
27ஆம் திகதி பிற்பகல் 2:30 மணிக்குப் பிறகு ஹேகர்ஸ்வில்லின் மேற்கில் உள்ள இந்தியன் லைன் மற்றும் கன்செஷன் 14 இன் சந்திப்பில் உள்ள ஒரு பள்ளத்தில் ஒரு வாகனத்தை சோதனையிட முயன்ற போது துப்பாக்கிச்சூடு நடத்தப்பட்டது.
28 வயதான Grzegorz Pierzchala என்ற அந்த உத்தியோகத்தர், ஒரு வருடத்திற்கும் மேலாக ஒன்ராறியோ மாகாண பொலிஸ் சேவையில் பணியாற்றினார்.
செப்டம்பர் முதல் ஒன்ராறியோவில் சுட்டுக் கொல்லப்பட்ட நான்காவது பொலிஸ் உத்தியோகத்தர் Grzegorz Pierzchala ஆவார்.
கடுமையான, உயிருக்கு ஆபத்தான காயங்களுடன் பியர்சாலா உள்ளூர் மருத்துவமனைக்கு கொண்டு செல்லப்பட்டார். பின்னர் அவர் இறந்துவிட்டதாக அறிவிக்கப்பட்டது.
துப்பாக்கிச் சூடு நடத்தப்பட்ட இடத்தில் இருந்து இருவர் தப்பிச் செல்வதைக் காணக்கூடியதாக இருந்ததாக பொலிஸார் தெரிவித்தனர்.
மாலை 5:43 மணியளவில், சந்தேகத்திற்குரியவர்கள் ஆயுதம் ஏந்தியிருப்பதாக நம்பப்பட்டதால், அந்த பகுதி மக்களை வீடுகளில் தங்கியிருக்குமாறு அவசர எச்சரிக்கை செய்தி அனுப்பப்பட்டது.
அந்த எச்சரிக்கையில் 25 வயதான Randall McKenzie மற்றும் பெயர் தெரியாத பெண்ணின் புகைப்படம் இருந்தது. ஒன்டாரியோ உரிமத் தகடு கொண்ட 2021 கறுப்பு செவ்ரோலெட் பிக்கப் வாகனத்தில் அவர்கள் பயணித்தனர்.
பின்னர் எச்சரிக்கை ரத்து செய்யப்பட்டது.
அப்பகுதியில் பெரும் தேடுதலைத் தொடர்ந்து இரண்டு பேர் கைது செய்யப்பட்டதாக ஒன்ராறியோ பொலிஸார் கூறினர்.
செவ்வாய்க்கிழமை கைது செய்யப்பட்டவர்கள் பற்றிய மேலதிக விவரங்கள் வெளியிடப்படாது என்றும் அவர்கள் மேலும் தெரிவித்தனர்.
